قلق... و حاجات اخرى

بره قيّد، و موش لازم تنتخب

2011-07-26T05:00:00.002+01:00

لأنو التصويت... لا يعني أننا نرشح الأفضل ضرورة، بل أننا ع الأقل لا نمنح أصواتنا للأسوأ.

لأنو الانتخاب... حق قبل ما يكون واجب .

لأنو التقييد... لا يعني أنك مجبور بش تمشي تنتخب.

لأنو التونسي... ما يتفكّر التسبيح كان ليلة الرعد

بره قيّد يهديك

لأنك قد تكون (كيفي) موش فاهم توة، أما يمكن (يا ذنوبي) يجيك نهار و تفهم... كان ما تقيّدش توة، نهارتها ما تنجّمش تننخب.

لحد الآن مازلت ما قررتش شنوة الحزب اللي قد نرشحو في انتخابات المجلس التأسيسي اللي قد تصير في 23 أكتوبر 2011... و عندي شبه قناعة اللي أنا بش نقوم نهارتها الصباح و نقصد ربّي لمركز الاقتراع اللي اخترت أنو يكون المدرسة الابتدائية اللي قريت فيها (رغم اللي ثمة زوز مراكز اخرين أقرب للدار) و انا ما عندي في مخّي حتى قرار لأي ليستة بش ننتخبها... و بش ناخو الأوراق الكل، و ندخل للخلوة نقعد نغزرلهم، و في لمح البصر نغافل روحي و نحط ورقة فيهم.

و أغلب الظن عندي أنّي موش بش نكون مقتنع برشا بالقايمة اللي رشحتها... لكني بش نكون مقتنع ع الأقل بالقوايم اللي ما رشحتهاش.

و خاصة لأني في الأول و الآخر، ما نحبش نعطيهم الفرصة أنهم ينتخبولي.

لوڤو... وقيّت بش تقيّد راهو

2011-07-21T12:29:00.006+01:00

تفاعلا مع الحملة التدوينية المقررة ليومي 25 و 26 جويلية لتشجيع المواطنين التونسيين من أجل التسجيل بالقائمات الانتخابية الخاصة بانتخابات المجلس التأسيسي المقررة ليوم 23 أكتوبر 2011...

لمن يرغب في الإطلاع على مزيد من المعلومات، يمكن زيارة صفحة الحدث المعدة للغرض على موقع الفايس بوك (هنا)...

و بطلب من الأصدقاء "عمشة في بلاد العميان" و "قصة أون لاين"...

لمن يرغب في إضافة الشعار للمدونة متاعو

 <a href="http://tkharbich.blogspot.com/2011/07/blog-post.html">
<img src="http://i54.tinypic.com/1idje0.jpg"/>
</a>

لوڤو... مدونون تونسيون، يساندون الشعوب العربية الثائرة

2011-04-27T03:00:00.003+01:00

تضامنا مع الشعوب العربية الثائرة ضدّ أنظمتها القمعية... و مساندة لها في مطالبها.

و بطلب من الصديقة لينا بن مهنّي.

لمن يرغب في إضافة الشعار للمدونة متاعو

 <a href="http://tkharbich.blogspot.com/2011/04/blog-post.html">
<img src="http://oi56.tinypic.com/3484z68.jpg"/>
</a>

يوميات ثورة... تعددية سياسية

2011-02-10T17:30:00.000+01:00

بدات العباد تتلم بش يبداو المسيرة متاع العادة و العوايد... و كيما جرات العادة، تبدى الحكاية بحلقات و تجمعات بسيطة ثلاثة أربعة م الناس، قبل ما تكبر الحضبة و يولّي م اللازم أنو واحد م السادة اللي لاهين بالأمور ياخو المبادرة بالحديث على خاطر الحضور بدي يضرب فيهم القلق... و يطلع واحد م النقابيين المعروفين بالجهة و ياخو المبادرة بالحديث... و يقعد يحكي على إنجازات الثورة، و مطالب الشعب في سعي لإحماء الجماهير قبل انطلاق المسيرة

النقابي: (...) هذا الرئيس الذي هرب خوفا من إرادة هذا الشعب... الثورة، هذه الثّورة المجيدة، ثورة الياسمين

مواطن: (مش عاجبو) ما تقولش ياسمين... ماهيش مشموم الثورة متاعنا يعيشك!

و كانت ثمة بعض التدخّلات زادة تمشيا في نفس التوجه أصروا أصحابها انهم يقاطعوه، و كان بعضها صادر  م المواطنين أو حتى بقية النقابيين الحاضرين على عين المكان إلا انو السيد النقابي المعروف كان ماسك بزمام الأمور  كما يجب و فيسع ما يعاود يرجّع الأمور لنصابها

النقابي: أردت أن أقول، أنّ هذه الثورة، ثورة العز و الكرامة، لم تنته بعد

النقابي: (يبلع ريقو) نحن الآن نشهد انطلاقتها الحقيقية... يجب علينا حلّ التجمّع، هذا الحزب الدكتاتوري

مواطن: (يقاطعو) كلّمنا بالدارجة يهديك، نحبّوا نفهموك فاش تحكيلنا

و لاقى اقتراح المواطن اللي مازال كيف اتكلّم اعجاب العديد من الحضور اللي أيدوه في المطلب متاعو أنو يجب مخاطبتهم بلوغة الشعب، و اضطر السيّد اللي قاعد يحكي انو يدخّل بعض الكلمات بالدارجة في وسط حديثو و كان باين بالكاشف أنو قاعد يتقوّى على بدنو

و كانت الحضبة ماشية و تكبر و لوحظ حتى قدوم بعض التجمّعيين من أعضاء المجلس البلدي و من مناضلي الحزب اللي مازالوا ما قلبوش الفيستة.

و فجأة ينسل أحد خلايق البلاد من بين الحضور و يقرب للسيد اللي قاعد يحكي بحيث انتبه الجميع لوجودو يقعد يعيّط

الباربو: (يعيّط) يلزمني نتكلّم... مانيش نفهم فيكم و ماكمش قاعدين تفهّموا فيا

اعتقد البعض أنو عنصر مدسوس من هاك الجماعة الهدف متاعو أنو يقطع النسق التصاعدي للحماس اللي قاعد ينتاب الحضور تمهيدا لبدء المسيرة

مواطن: (مش عاجبو الجو) تي علاه هكة، خليه يكمّل ما عادش بكري ع المسيرة

مواطن: (ضاربو النوم) مازلنا ما رقدناش راهو... بايتين نعسّوا

الباربو: حتى انا ما رقدتش... حتى انا بايت نعس... حتى انا نحب نتكلّم

مواطن: بالنظام، ما يجيش هكة

مواطن: ماهوش معقول، قلقنا

مواطن: شكونو هذا؟

مواطن: تي أحكي برك... قول ش عندك و اخطانا

الباربو: (تتبدّل نبرتو بحيث يولّي عاطي للذل كارو، أما باقي يعيّط طبعا) آاااه، خاطرني من عامة الشعب

الباربو: (يشر لواحد طبيب حاضر وسط الجمع) خاطرني موش طبيب

الباربو: (يشير لواحد م المحامين) خاطرني موش محامي

الباربو: (يشير للسيد النقابي اللي كان اول مين خذي المبادرة بالكلام) خاطرني موش أستاذ

و كانت توجيه الإصبع متاعو في العبارة الاخرانية يحمل في طياتو برشة جرأة على عكس بقية العبارات خاطرو النقابي اللي قاعد يلقي في الخطاب كان أستاذ، الشي اللي خلاه يتدخّل

النقابي: (مع ابتسامة متاع فدّة) يا خويا اتفضّل قول ش عندك... انتهى عهد القمع، انتهى عهد الإستبداد، انتهى عهد سلب الحريات

مواطن: تي قول ش عندك و ازرب روحك يعيشك

الباربو: (بإشارة بيدو يطلب من خلالها شوية هدوء) قبل ما نبدى كلامي نحب نعرّف بروحي... أنا خليقة

تبتسم العباد الكل، البعض فيه يصدر بعض القهقهات الخفيفة بينما يمتعض البقية م الأسلوب الهمجي

الباربو: أي نعم، أنا خليقة و باربو، و ما دامكم بش تقعدوا هكة بش نقعدوا كيف ما أحنا

النقابي: (يعبّر عن رفضو) لا من فضلك، لا للأسلوب الهمجي، هذا غير معقول

الباربو: (يقاطعو) أسمعني يعيشك، عندك ربع ساعة تحكيلنا ما فهمنا منّك حتى شي... اسمعني و توة نعطيك المفيد

مواطن: خليوه يتكلّم

الباربو: أي نعم، بش نتكلّم، مانيش بش نسكت

الباربو: الثورة هذي، بداوها ناس بسطاء، بطالة... م اللي كنتوا تقولوا عليهم خلايق

الباربو: أما أنو بعد الثّورة تتلنصى انتي الأستاذ و تولّي مسؤول تحكم باحكامك، و نقعد أنا خليقة كيما انا وقتها نقوللك لا

الباربو: (يبلع ريقو، و تتبدّل نبرتو في الحديث بش تولّي فيها شوية صحة رقعة) وقتها نولّي أنا نجبدك ما نخلّيكش تطلع... و خلّينا نقعدوا كيما احنا عاد خير للعباد الكل

مواطن: برحم بوك

مواطن: اي نعم... كلامو صحيح

النقابي: (في محاولة لفض الإشكال) أي تفضّل، قول ش عندك

الباربو: (يتسائل) توة نسمع فيكم من قبولي و انتوما تتعايطوا... نسكروا التجمّع، نسكّروا التجمّع

النقابي: (يعاود يرجع للحماس المعهود متاعو) أي نعم... يجب ان نقوم بحل التجمع اللادستوري اللاديموقراطي، هذا الحزب الذي...

الباربو: (يقاطعو في الحديث متوجّها للحضور) تي هاو رجع يحكيلي بالصعيب، تي ماهو قالولك كلّمنا بلوغتنا يعيشك

تسكت العباد الكل، في انتظار الشي اللي بش يقولو الباربو، تشرئب أعناق بعض التجمعيين بينما يستجمع البعض فيهم ما تبقى له من شجاعة و يندس بين الحضور في محاولة منه للاقتراب و الإصغاء للشي اللي قاعد يقول فيه الباربو.

الباربو: توة أنا، و نحكي بلسان شطر خلايق البلاد الي نعرفهم و تعرفوهم

مواطن: أي أحكي أحكي... انتي تحكي بلسان الشعب

الباربو: مستانسين تلقانا قاعدين على أرواحنا، يعيطولنا جماعة الشعبة... مرة مؤتمر، مرة حفلة، مرة اجتماع

الباربو: و كنا نخدموا على ارواحنا، نصفقوا و نعيطوا و نخلّيوا العباد تصفّق و تعيّط بالسيف عليها

مواطن: تجمّعي... عميل

مواطن: قـــوّاد

الباربو: ما نكذبوش على ارواحنا... الكلنا حضرنا في اجتماعاتهم و كان تحبوني نتكلّم و نحل فمي و نقول شكون و شكون توة نقول... عندي كيف كيف راهو

بعض الحضور يبلعوا في ريقهم، بينما يبتسم البعض الآخر في هدوء... يخيّر بعض التجمعيين اللي قلبوا الفيستة و سعاو أنو تواجدهم يكون كعادتهم دائما في صدارة الاحداث التقهقر إلى الخلف قليلا، تجبنا لما قد لا تحمد عقباه

مواطن: كمّل كلامك...

مواطن: أخطانا

مواطن: ما عادش بكري

الباربو: أي توّة كي تقولوا أنكم بش تسكروا الشعب متاع التجمع... الخلايق اللي كيفي انا شنوّة بش نقعدوا نعملوا

النقابي: تستطيعون الإنضمام للاحزاب الجديدة

الباربو: و شكون قاللك اللي أحنا نحبوا ننضموا... أحنا نحبوا نخدموا على أرواحنا، نحبّوا نحصلوا خبزتنا

يتدخل أحد المحاميين اللي كانوا حاضرين في الاجتماع

المحامي: أي شنوة تحب م الآخر؟

الباربو: راهو قطع الأعناق و لا قطع الأرزاق... أحنا كنا نسترزقوا منهم الشعب متاع التجمع هاذم

النقابي: نعم، ستكون هناك عدة أحزاب أخرى ستمثّلكم و تستطيعون النشاط في صلبها

الباربو: ش معنتها؟؟

المحامي: معنتها بش نعملولكم برشا أحزاب أخرين، و توة تلقاو خبزتكم

الباربو: أيوااااه، برشا احزاب... موش حزب و الا زوز ما يتلموا كان مرة في فال، و بقيّة العام نقعدوا انّشوا في الذبان

النقابي: (شادد صحيح في العربية الفصحى) نعم، ستكون هناك عدّة أحزاب تمثّل جميع اطياف هذا الشعب الكريم، هذا الشعب المناضل، هذا الشعب المكافح

الباربو: (و قد بدت على ملامحه علامات الرضا) أيواه... هكة نتفاهموا

الباربو: نحبّوا برشا أحزاب... و برشا شُـعب

يتدخل احد المواطنين، عامل بسيط في احدى مراكب الصيد...

البحري: أحنا نحبّوا على حزب متاع أسلام

ما سمعو حد، لأنو البعض قاعد يسعى لإقناع الباربو أنو يترك البلاصة اللي خذاها في الصدارة بش يكملوا جماعة الاتحاد يقولوا الكليمتين متاعهم استعدادا لانطلاق المسيرة

البحري: أحنا نحبّوا على حزب متاع أسلام

باقي ما تلفتلو حد...

البحري: أحنا نحبّوا على حرب يعرف ربّي

و لا حياة لمن تنادي

البحري: (يصيح بكلّ ما أوتي من قوّة، و كشاكش البزاق تتطابر من فمو لتصيب من يقف على بعد زوز ميترو قدّامو) ينعندين ربكم!

تتلفت العباد الكل، باهتة، نحو مصدر الصوت... معظم الحضور ما سمعوهوش ش قال بالضبط، لكنها حركة الالتقات المفاجئة للبعض ليه خلات الجميع يتلفتولوا

البحري: (بكل ثقة بالنفس بعد ما شاف انها العباد الكل تغزرلو و يستناو فيه ش بش يقول) قلتلكم رانا نحبّوا على حزب متاع أسلام

مواطن: أي نعم

البحري: نحبّوا على حزب يعرف ربّي

مواطنون: أي نعم

البحري: حزب يعطي حق ربّي

مواطنون: أي نعم

البحري: حزب نصلّوا فيه من غير ما نخافوا

البحري: حزب نصّلوا فيه و ما ثماش شكون يعس علينا

مواطنون: أي نعم

و كان الأمر أشبه بمن يلقي الدعاء، و بقية الحضور تقول آمين... و كان واضح انو الأمر يتجه نحو الخروج عن السيطرة و الهدف المراد منو... لولا تدخّل أحد المعلّمين النقابيين اللي نجح في جلب الانتباه ليه بحكم موقعو القريب م الصدارة بحكم انو كان واقف بجانب النقابي اللي كان واخو الكلمة م الأول

المعلّم: نعم... سيكون للجميع الحق أنهم يتواجدوا في الأحزاب اللي يحبوا عليهم

المعلّم: (يبتسم) و في هذا الصدد، نحب نعلمكم اللي أحنا توة قررنا إنشاء حزبنا اللي بش نسميوه حزب البوعزيزي

و ينهال التصفيق و التصفير من كلّ حدب و صوب إعجابا بالفكرة

المعلّم: لكن قبل هذا، يلزمنا نطالبوا بحل التجمع، حزب الديكتاتور

المعلّم: و لهذا، بش تنطلق مسيرة اليوم... و ستكون كل يوم هناك مسيرة حاشدة

جميع الحضور: حماة الحمى يا حماة الحمى...

و انطلقت المسيرة...

يوميات ثورة... عسّة الليل

2011-02-05T03:30:00.000+01:00

بلاد صحيحة تحكي أنو المتلثمين قاعدين يخربوا، قالوا أنهم بش يعملوا لجان احياء تعس ع العباد و الاملاك في الليل... حاجة هايلة برشا و هاو ظهر بالحق أنو التونسي للتونسي رحمة موش تشقشيق حناك متاع لمّان فلوس.

سأل أولاد الحومة م العشية ع العسة وين و وقتاش بش تبدى، حتى حد ما يعرف... مشي يسأل في راجل كبير يلقاه قاعد ساس الحيط ينش في الذبان

هو: آ حاج... وقتاش تبدى العسة اللي يحكيوا عليها؟

الراجل: و الله ما نعرف عليهم وليدي... أما الأكثر بعد شقان الفطر متاع حظر التجوّل

هو: ش من شقان فطر بالله، باخي رمضان هو؟

الراجل: تي أهوكة الدنيا خلاء و قفار تقولشي عليها رمضان

ما زادش طوّل معاه في الحديث، توة في الليل يظهر كل شي.

عدّى ليلتو كي خلق ربّي الكل، شوية جزيرة على وطنية على فايسبوك على تويتر... نصف الليل قصد ربّي و خرج يلوّج على جماعة حومتو وين شادّين العسّة

ما قعدش يلوّج، شافهم ناصبين حذي الرمبوان مسكرين مدخل الحومة بطرف برامل و مادري لوح متاع بني... مشي للحضبة، يلقى زوز من أولاد حومتو، و البقية الكل ما يعرفهمش و الأكيد أنهم مش الحومة، و كان م الواضح اللي ثمة شكون كاريهم بالفلوس بش يعسوّلوا ع الرزق متاعو.

و كانت الأجواء تدلّ مما لا يدع مجالا للشك، انو خلط في آخر القعدة خاطر الجماعة الكلها تتلاوح، و فيهم البعض اللي شد تركينة ساس حيط و قعد يردّ و يتباوع لين قريب يطلّع مصارنو على برّه...

زاد سايس روحو شوية و حاول أنو يطفّيهم إلا انو يلقى الجو ما يعجبش و الجماعة دوروها عرك زلالط و طاحوا يفشخوا في بعضهم تفشيخ... حتى الجيش في عوض يقعد يدور و يلوّج ع الارهابيين المتلثمين اللي يحكيوا عليهم، الجنود رصّاتلهم يحزّوا فيهم...

ما لقاش خير من انّو يجبد روحو في صمت، من غير ما يحسوا بيه، و كان م الأكيد انو حتى حد ماهو بش يحس بيه أو يفتقدو و لا حتى اولاد حومتو الزوز اللي ما فاقش بيهم وقتاش اختفاو هوما زادة...

عدّى بقية ليلتو في لجنة الحي الافتراضية... اولاد حومتو الكل بما فيهم واحد م الزوز اللي لقاهم قبولي مكونكتين ع الفايسبوك و يتناقلوا في الأخبار اولا بأوّل.

قام من غدوة على حس العياط متاع المسيرة اللي اتعدات قدام الحومة، خرج يجري من غير ما يفطر، و التحق بالموكب متاع المتظاهرين، عيّط مع اللي يعيطوا، قعد مع اللي قعدوا، البلاد داروها حومة حومة و من بعد وقف واحد قال كليميتين و يرحم والديكم نعاودوها غدوة...

روّح يكر في رجليه كرّان، كلي فمّين بالحساب و مشي يلوّج ع المسحاة اللي عندهم في الدار، نحالها العصا متاعها و نظّفها و حطها مع جنب الباب... توة ولّى عندو زلاّط كي العباد الكل

عاود رجع للجو متاعو، الجزيرة، الوطنية، حنبعل، نسمة، الفايسبوك، التويتر... لين ليّل عليه الليل هز الزلاط متاعو و هبط للحومة، المرة هذي على بكري، و اليوم الجماعة يحكيوا اللي لا ثمة شراب لا حتى شي خاطرهم البارح عورولها.

نفس الوجوه متاع البارح، و نفس الديكور... سقطوا على سطل متاع زبلة متاع واحد م الجيران، فرغوه و عباوه باللوح و لهبوا فيه النار و اتلموا قعدوا يتدفّاو، اتلفّت واحد م الجماعة

حسن: اززح، مبردها... البارح لا لهبنا النار لا حتى شي و تحسو سخون الطقس

علي: (بنبرة مرحة) لا لا، البارح أبرد م الليلة... اما انتي البارح ليلة كاملة تضرب في البوخة على فرد جنب، ما حسيتش بالڨرس

حسن: آااه، أي أي...

حسن: (يسكت شوية) ياخي ما ثماش بوخة الليلة؟

علي: (بنبرة فيها شوية آسف) لا لا، ثمة بيرة كان تحب

قعد يخمم شوية، الوقت اللي نفخ بعض الهواء في يديه قبل ما يقوللو

حسن: (بنبرة تدل على إحباط شديد)  ما نحبّش، البيرة نشربها كان باردة... توة تڨرّسني

ما جاوب حد، رجعت العباد الكل تمد في يديها قدّام السطل متاع الزبلة تتدفّى... قبل ما ينطق واحد آخر

صالح: (القلق يعمل) تي هات البيرة... ش بش نقعدوا نعملوا بالله

و دارت شقوفات البيرّة ع الجمع الكريم الكل، و كان واضح انها من غنائم السطو على معاقل الشراب اللي في البلاد الكل ليلة سقوط النظام البائد.

و كان م الأكيد زادة أنّو اللي صار البارح بش يتعاود ليلتها، هذاكة علاش خيّر أنو يهز زلاّطو و ينسحب... أما المرة هذي قرر أنّو مش بش يروّح للدّار و إنما بش يمشي للرمبوان اللي في شافة الحومة من غادي لعلّ يلقى جو آخر.

و كان الامر كذلك، الأجواء تبعث ع الأمل... نفس الديكور زادة، برامل و مادري لوح متاع بني و ثمة فوق العشرة م الناس كانوا الكلهم من أولاد الحومة و من مختلف الشرائح العمرية.

كان الحديث يدور حول تنظيم العسة بحيث يتمكن الجميع م النوم ما يكفي بش العبد ينجّم يقاوم الدعك متاع النهار و ما يضمن انو العسة تقعد متواصلة بكفاءة ع الحومة طوال فترة حظر التجوّل و بعدد باهي م الحضور... و دخل معاهم في النقاش و شيئا فشيئا نجّم يسيطر ع النقاش بحكم اللي المقترحات اللي كان يقول فيهم تعتبر عمليّة شوية مقارنة ببقية الحديث... و ليه ليه ما تم وضع خطة محكمة تمكّن م السيطرة على جميع مداخل و مخارج الحومة (هو مدخل فقط يخرجوا منو زادة اما ثمة شكون شد صحيح في الجملة هذيكة يلزمها تتحط في الوقة اللي عملوا عليها جدول الاوقات اللي صححت عليه العباد الكل بش يلتزموا بيه).

و كانت الخطّة تقتضي انو يتولى الحراسة في الفيلق الثاني، م الأربعة للثمانية متاع الصباح و يحرس الضفة الشرقية وين موجود البوتو متاع الضو هو و طفل م الحومة ما يعرفوش مليح خاطرو ليه درى قداش م اللي روّح م الخارج و واحد من الباربوات اللي ما عندوش وين يدور الريح، و كان ثمة ثلاثة مقابلينهم في الضفة الأخرى م الكياس... و ثمة شكون لاهي بالتنسيق بين الزوز أفواج اللي ما كان يفصل بيناتهم كان ثمانية أو تسعة ميترو هي العرض متاع الكياس.

عاود روّح للدار، على أساس يرقد شوية بش يرجع قبل الأربعة بشوية يشد العسة مع جماعتو...

و كان الأمر كذلك، و الأربعة غير ربع كان شادد بلاصتو، هو و الباربو اللي خلط الأربعة قد قد... و قعدوا يستناو في ثالثهم.

الأربعة و نصف، شافوه جاي من بعيد، درى ش جايب في يديه...

الباربو: ياخي ش جايب معاه هذا؟

هو: منين ندري عليه أنا... هاو بظهرلي فيها راكات متاع تينيس

الباربو: ش من راكات حتى انتي... هذا كان في الخارج

هو: أي محسوب

الباربو: بالك راهو جايب معاه شطاير و مهربها م الديوانة

ما قال شي... اكتفى بالضحك و بصوت مرتفع كتعبير ع السخرية م الفكرة اللي طلع بيها ولد حومتو

الباربو: (بنبرة تكتسي شوية جديّة يحاول من خلالها اقناع الطرف المقابل بصحة كلامو) أضحك أضحك... انتي ما عشتش في الخارج و ما تعرفش الدمّار اللي غادي يا صاحبي

ما لقي قدامو غير أنو يلتزم الصمت، و يكتم ضحكتو... في انتظار اقتراب ولد الحومة و توة يظهر ش جايب معاه

وصللهم ولد الحومة و جبد هاك الساك اللي جايبها معاه و حلها... طلعت في وسطها ثمة كاسكة و عصا متاع بيزبول، جبدها و قعد يشلوح بيها في الهواء يحب يظهّر مهارتو

المرة هذي اتطرشق الباربو بالضحك و هو يسأل فيه

الباربو: جبتشي الكور متاعها معاها... ع الأقل نلقاو ما نعملوا في ها الليلة الكلبة.

ما لقي ما يقول المسكين، خاصة كي شاف السيف اللي الباربو كان جايبو معاه، و اللي اقترحو عليه في إطار مبادلة بالمضرب متاع البايزبول اللي جابو معاه.

و شدينا العسة، بكلّ حزم... اتعدات الساعة الأولى، الثانية و ما صار شي غير أنو كرهبة الجيش تتعدّى كل اربعة دراج أو نصف ساعة ع الأكثر تحييهم و يحيوها و تمشي على روحها.

اتلموا الزوز مجموعات و قعدوا يحكيوا كيفاش يلزمهم يعملوا لو اتعدّات كرهبة متاع العصابات المتلثمة... و كان حوار يفدّد خارج عن كل أطر الاحترام حيث أصر الباربو أنو ياخو المضرب متاع البايزبول بش درى وين يحشيه عند الزعيم متاع العصابة اللي بش تجيهم... و كان مرة يتغشش مرة يضحك كي ما يلقى بيها وين و يستنى وقتاش يتعدّاو ها الأربعة سوايع خلي يمشي على روحو.

مازالوا ملمومين كيف ما هوما و يسمعوا في واحد م الحومة واقف قدام باب دارو و يعيطلهم... ما سمع شي أما يغزر للجماعة الكل كي قالوا هكة و جراو مشاو وين الراجل كان واقف، ما قعد كان هو و القننو، و يغزر لهاك اللي زعمة زعمة لاهي بالتنسيق جاي يجري

هو: ش ثمّة؟

المنسّق: المقرونة طابت

هو: ش من مقرونة زادة... و العسّة؟

المنسّق: اما عسّة متاعك... ياخي جدّت عليك

قعد واقف في بلاصتو، يغزر للبرامل و اللوحات المحطوطين عليه، الزلالط و السيف متاع الباربو... قعد يخمم في الحومة، و العسة، و العصابات المتلثمة، لو كان تهد عليهم توّة؟؟

هو: و شنية حكاية المقرونة هذي؟

القننو: مقرونة... بالصانصة

هو: باللحم؟؟

القننو: لا لا ش من لحم... أما فيها كعبات عظم

هو: (بنبرة اتعمّد انها تظهّر برشا فرحة) عـــــــظم... و ما تقولش؟؟؟

و خلاه، و مشي يجري بش يخلط ع الجماعة، ع الأقل يخلطشي حتى على عظمة.

يوميات ثورة... بطاقة ارشادات

2011-01-31T01:58:00.008+01:00

حرقوا المركز، أوّل ما سمعوا  انّو المعلّم (القديم) ڨطّع، هدّوا ع المركز متاع الشرطة و ما اتهناو الا ما خربوه و حرقوه

ما همهمش حظر التجول، و لا محاولات التهدئة من بعض الحضور، حرقوا المركز متاع الشرطة و مركز الارشادات اللي تابعو و الإدارة متاع الفلاحة، و كملوا اتعدّاو للفوريار متاع البلدية دڨدڨوه و حرقوه.

و من غدوة، أوّل ما وفي حظر التجول هدّت العباد فرادي و جماعات ع المركز تتفرّج في الحالة الحليلة... أثاث مكسّر، بيروات محروقة، و أوراق مفرتة، فيشات متاع المواطنين الكل اتحرق البعض و منع البعض.

و خرجت برشا اوراق... برشا عباد أتيحت لها الفرصة بش تكتشف أسرار عالم الامن في تونس و تفهم جانب من طريقة عمل البوليسيّة و جمعهم للمعلومات خاصة عبر ما يسمّى بطاقات الإرشادات اللي ظلت العباد تلقّط فيهم تلقيط م الاوراق المتناثرة ع القاعة متاع مركز الشرطة.

كانوا مجتمعين في القهوة كيما الشعب التونسي الكل يحكيوا ع الشي اللي صاير في البلاد، إلا انهم كانوا يتميزوا في حديثهم بنبرة التمعير اللي يحكيوا بيها على فلول المناضلين و الوطنيين اللي كثروا في البلاد المدة هذي الكل وقت ما جاهم واحد و قاللهم انو ولدو كيف مشي يطل ع المركز بعد ما اتحرق يلقى ورقة متاع صاحبهم، فلان

المعلومات الي فيها كانت عادية جدا، ما فيها حتى شي يبعث ع الاهتمام، بل بالعكس تخلّي المطّلع عليها يستغرب علاش يتم تدوين بطاقة ارشادات بالمعلومات هذي... لذا، و سعيا لمزيد م الجو كان لازم اضافة بعض الحوايج ضمانا لضحكة يلزمها تكون عالميّة

اتفاجأ كي جاوه صوحابو و هو قاعد في القهوة...

قالولوا: هاو ثمة شكون لقي بطاقة الارشادات متاعك م المركز

ابتسم، و بدافع الفضول حب يعرف ش كان الحاكم مقيّد عليه

قاللهم: تراه تراه، ش يحكيوا عليا الجماعة

اتلفتلو صاحبو اللي شادد الورقة

قاللو: (بنبرة حاول أنو يخليها بديهية) تي ش عندهم ما يعرفوا عليك

جاوبو: ابّـــي.. تي نحلف عليهم يعرفوني اكثر من روحي

ابتسم، بكل مكر المرة هذي و هو يمدلو في الورقة (بطاقة الارشادات) متاعو

قاللو: انتي قلت

شد الورقة، بكل لهفة و بدي يقرى في المعلومات المدونة عليها... و فجأة دخل بعضو، و بدي وجهو يحمار و ما لقاش ش يعمل قدام الضحكات و القهقهات اللي ملات القهوة... كانت العباد الكل في بالها باللعبة

التزم الصمت، و حط البطاقة في جيبو و هو يغزر للجماعة كيفاش يضحكوا... اكتفى ببعض تمتمات صامتة بشفايفو كان واضح انو من خلالها سبّلهم الطوايف متاعهم نفرا نفرا.

كان السطر اللي زادهولو الجماعة مكتوب عليه بخط قريب جدا للخط اللي اتكتبت بيه بقية المعلومات، و أغلب الظن أنو قد يكون نفس الخط عبارة عن مطة مكتوب قدّامها:

 شاذ جنسيا

يوميات ثورة... سرقة

2011-01-30T03:04:00.004+01:00

هدّوا ع المغازة العامة... خلعوها و نهبوها و ما خلاو فيها حتى شي... ثمة شكون عبّى شاريو كامل و قعد يكركر فيه في الشارع، و اللي هازز بانو بلاستيك، و اللي هازز شكارة معبية بالكوشات (متاع نساء) مش فاهم علاش.

و ثمة شكون داه في دبّوزة... الفين و حداش، و الشراب بلاش

قعدت شوية، نتفرّج. قبل ما نفد و نقلق و نمشي نروّح على روحي... وصلت للحومة.

اتعدّى واحد جهامة، محمّل فريجيدار على ظهرو، ، ارتفاعها قريب الميترو و ثمانين... بالسيف ماهو يهز فيها

سامو فيها واحد متعدّي بالصدفة، بعد أخذ و رد اتفاهموا على عشرة دينارات.

فريجيدار، سومها أقل ما يكون أربعمياة أو خمسمياة دينار... ع القليلة سبعين ثمانين كيلو يهزها على ظهرو قريب الكيلومتر و نص بش يبيعها في الآخر بعشرة آلاف.

قعدنا باهتين، خاصة و أنو السيد (السارق) نظرتو لينا كانت تدل على السعادة و تبعث على الفخر...

ما نجمتش نمنع روحي من انّي نتدخّل كيف قربّلنا و نقترح عليه أنّو يحمّلني على ظهرو و يهزني حتى المغازة العامة مقابل عشرة دينارات (نفس المسافة، و نتصور نوزن أقل م الفريجيدار) تكون حلال محلّل.

الجهامة: (بنبرة تدل ع الاستهزاء) تحب العباد تقول عليا مهبول؟؟

البرباش: حاشاك، أما تي أهوكة بلاد صحيحة شافتك هازز فريجيدار مسروقة

البرباش: ماهو بش يقولوا عليك سارق.

الجهامة: (يڨحرلي على فرد جنب) لا، هذيكة موش كيف... شطر البلاد ظهروا سرّاق، و الشطر الآخر قعد يتفرّج عليهم.

في هذي غلبني، ما لقيت ما نقول... تي بره على روحك، لا يجعلني جرّة.

ربي يهدي ما خلق و برّه.

يوميات ثورة... لكريموجان

2011-01-29T03:00:00.000+01:00

حرقوا الجامعة متاع ما كان يسمّى بحزب التجمّع الدستوري الديمقراطي... و النار كلات المقر الكل اللي كان يضم مقر شعبة، بيرو العمدة، و بعض البيروات التابعين للبلدية... و أصبحت تشكّل تهديد بانهيار المبنى و الاتيان على المبنى المجاور ليه و كان بالتالي تدخّل الحماية المدنية أمر واجب و ضروري.

حاول الأمن أنو يتدخل لتفريق المتظاهرين قدام المقر اللي قاعد يلهب للسماح لعربة الاطفاء بالدخول و تسهيل مهمة اعوان الحماية إلا انو جوبه باعتراض المواطنين و قعد الجدال بين كرّ و فرّ الشي اللي خلّى البوليسية يستعملوا القنابل المسيلة للدموع لابعاد المتظاهرين.

و كان الأمر كذلك و تمكنت الكميونة متاع الحماية م الوقوف قدّام المقرّ و هبطوا الأعوان يدرسوا في الموقف للقيام بما يجب و ما يمكن فعله و كنا قاعدين موش بعيد.. بالسيف ما نحلّوا في عينينا اللي كانت تدمع تحت تأثير الغاز.

وقت ما وقفت مع جنبي بسكلات يركبها راجل في الخمسينات من عمرو...

الشيباني: يعيّش ولدي... لحظة

البرباش: اتفضّل يا حاج

الشيباني: (نبرتو تعطي احساس اللي هو قريب يبكي، ربما لحالة الاختناق اللي سببتها الغازات المسيلة للدموع) ياخي شبيها عيني تحرق فيا؟

البرباش: البوليسية رماو علينا القنابل المسيلة للدموع

الشيباني: آه... صارة هذا هو اللكريموجان اللي يحكيوا عليه في الأنترنت

قعدت باهت... لانها الهيئة و البسكلات متاع الشايب اللي قاعد نحكي معاه أبعد ما يكون ع الجو متاع الانترنت أو أنو قد يفهم المعنى متاع كلمة اللكريموجان اللي كنت اتعمّدت ما نستعملهاش في حديثي معاه و نخاطبو بمفردات تصوّرت انها قد تكون مناسبة ليه.

البرباش: (نبتسم) أي نعم... هذاكة هو يا حاج

و ما كان م الشايب غير انو ابتسملي في كل بلاهة قبل ما يتمتم بطريقة ما فهمتش هل انو يحكي وحدو او قاعد يواصل في حديثو معايا

الشيباني: (بنبرة أقرب ما تكون للسخرية) الحمدولله يا ربّي... كي طوّلتلي في عمري و خلّيتني نخلط ع النهار اللي نشم فيه الاكريموجان و عينيّا تدمع

و عاود ركب على بسكلاتو... و مشي على روحو.

كل شي... ع الفايسبوك

2011-01-10T02:30:00.000+01:00

ابتسم بكل ما أوتي من بلاهة و هو يحط في المفتاح متاع الكونكسيون في الفيشة متاع الأورديناتور... اتنهد و هو يتمتم بينو و بين روحو

يقول: توة ما عاد حد خير من حد.

ماهوش مغروم بالأخبار، آخر مرة اتفرج فيها على نشرة متاع أخبار كاملة من أوّلها لآخرها كانت ع الجزيرة في حربة الخليج وقت ما طيحوا التمثال متاع الصّدّام...

اما كي خاضت المدة هذي، يلقى العباد الكل ولات ما تحكي كان ع الاخبار، و الفايسبوك... و الجزيرة.

عندو سنين ربي عايش على نفس النمط... يكمل الخدمة الخمسة متاع العشية، يتعدى للقهوة يتلم مع الجماعة يلعبوا طرح رامي و يحكيوا شوية في الأثناء... السبعة يكون في الدار، يتلم مع الصغار شوية ياخو يعطي معاهم في الحديث على ما يحضر العشاء، يتعشى و يتمد قدام التلفزة يتفرّج في المسلسلات اللي متبعتهم المرى لين تاخذو عينو، يعدي السهرية شطر فايق شطر ناعس

تكمل المرى مسلسلاتها الكل تولي تفيقوا بش يمشيوا يرقدوا في الفرش متاع بيت النوم، يمشي يفرش الفرش بينما تطّمن هي ع الصغار و تغطيهم و تشوف ش يزيدهم و ش ينقصهم... و كل ليلة و قسمها.

المدة الاخرانية، اتبدّل الوضع... بطل طرح الرامي توة درى قداش من نهار و صوحابو م اللي يتلموا لين تتفرق الحضبة و هوما ما يحكيوا كان على سيدي بوزيد و تالة و القصرين و كيفاش الدنيا شايشة...

اتغرم بالحصاد المغاربي متاع الجزيرة... حتى انو وصل بيه الامر بش فرض على زوجتو انها الجزيرة تتحل كل ليلة م العشرة لين تجي النشرة متاع الحصاد المغاربي، و يكملوا حديثهم على تونس... و تقعد هاك المرى تتغبّن ع الأحداث المصيرية اللي بش تفوتها في الحلقة ميا و درى قداش في المسلسل متاعها اللي اتبع فيه على أم_بي_سي دراما و اللي مازالوا ع القليلة فوق المياة حلقة أخرين بش يوفى... و تمرجلو الكبدة متاعو كيف تقول هكة وتغافلو و تحط المسلسل متاعها، حتى ظانو مؤخّرا ولّى يصر بش الكومند متاع التلفزة تقعد عندو وقت ما تلقاها الجزيرة محلولة... و كان انو قدر يفرض قرارو، بكلّ حزم.

و هكاكة ولّى ينجم يشارك في الحديث مع صوحابو... يكفي انو يكون متبّع الاحداث بش يبدى يجيب و يجلّب و يعطي تكهناتو المسبقة بالشي اللي بش يصير.

اما غلبوه صوحابو، كي ظهر الشي اللي قاعد يتفرّج فيه ع الجزيرة قاعد يهبط ع الفايس بوك من قبل بسوايع... حس بروحو ديفازي عليهم شوية، كاينو قاعد يتفرج في أخبار بايتة و ماشي في بالو انو قاعد يتبّع في الوضع اوّلا بأوّل.

ولّى حتى م النشرة متاع الحصاد المغاربي يحس بالملل و هو يتفرج فيها، حتى أنو استسلم في بعض المناسبات لتخرنين المرى و خلاها تكمّل المسلسل متاعها من غير ما يشد صحيح في الاخبار كيما جرات العادة الأيامات الفايتة الكل.

و فجأة، اتخذ قرارو بأنو يلزم يدخّل الانترنت للدار... كان لسان حالو

يقول: زايد، ما عادش فيها

العباد اللي تفهم قالولوا أنو إذا يحب يدخّل الانترنت العادية يلزموا يستنى بعض الأيامات لين الدوسي متاعو يحضر، خاطرو يلزم يتعدّى ع التيليكوم و الداخلية و يوافقولو... و إذا ما يحبّش يستنى ينجم يدخّل الأنترنت اللي بالفيشة متاع الأورنج، اما هذي أغلى شوية و الفيشة وحدها بميا و ثلاثين دينار يدفعهم م الاول

اختار انو يدخل الانترنت اللي بالفيشة، مش على خاطرو مزروب، صحيح توة النهار بحسابو و يمكن الامور تركح في أي لحظة و ما توصللو الانترنت الا تلقاها الحكاية ماتت... اما كلمة الداخلية دخلتو بعضو و خلاتو يخيٍّر يدفع اللي بش يدفعو و يكونكتي و هو رايض بأقل مشاكل.

من غدوة، كمل خدمتو كيما جرات العادة مع الخمسة متاع العشية، اتعدى باس الحيط متاع البانكة و خذي ما كتبلو، منها مشي للبوتيك متاع الاورنج بش يعمل الأنترنت... الحكاية ما طولتش على عكس ما كان يتوقّع، نصف ساعة و الباكو اللي فيه الانترنت كان في يدّو، الستة و نصف كان في الدار قدام الأورديناتور متاعو.

عمرو ما كان يتصوّر اللي هو بش يجي النهار اللي يشري فيه اورديناتور، اما قالولوا اللي هو توة حاجة لازمة في الدار، كيفو كي الغسالة الاوتوماتيك اللي مرتو شدت صحيح بش تتشري، أما الأورديناتور هذا لازم لقراية الصغار، و كي الحكاية فيها مصلحة الصغار يولي اللعب ما ثماش... و زيد اهوكة حتى م الكتب متاع الصغار معاهم سيديهات توة، معنتها وقفت الزنقة للهارب.

و مسكين هاك الاورديناتور ش قاسى م الصغار... عمرو ما يتذكر أنو واحد من صغارو قعد قدامو و عمل حاجة غير انو يلعب بلعبة م اللعب اللي مصبوبين فيه... السيديهات اللي موجودين مع الكتب معظمهم قعدوا في البوشات متاعهم ما خرجوش منها الا في المرات القليلة اللي كان يجبرهم فيها بش يستعملوهم... الشي اللي خلاه يفد و يحطو في بيت النوم.

حط الفيشة في الاورديناتور (بعد ما ابتسم)، سمّى بسم الله و قعد يتبّع في النصايح الموجودة في الكتاب اللي لقاه وسط الباكو، و اللي حكاتلو عليهم الطفلة اللي في البوتيك متاع الاورنج... الحكاية ما كانتش بالصعوبة اللي تصورها، و ما هي إلا بضع لحظات قصيرة مرت بش يلقى روحو يحكي وحدو
يقول: الحمدولله عليه اللي بش يصلح لحاجة ها القصديرة متاع وذني.
من غير ما يخمم، دخل طول ع الفايسبوك، غلط في الادريسة م الاول اما نجم يدخل في ثاني محاولة

اصطدم بضرورة التسجيل بش يدخل للموقع... الحكاية تبان ساهلة، درى قداش من كاز ما عليه غير انو يعمرهم و يا ناس ما كان باس

الموقع طلبو في ايمايل، يتذكر أنو في الصيف شارك في دورة تكوينية في علوم و تكنولوجيات المولتيمديا و علموهم وقتها كيفاش يعملوا ايمايل، و بعثوا لبعضهم ايمايلوات المشاركين الكل... الحاصل، عملوا جو

وقتها عمل ايمايل ع الياهوو... يتذكر الباسوورد اللي كان هو بيدو نومرو بطاقة التعريف، اما الأدريسة غابت عليه، ش خلاه يقوم يجري يلوّج في الكراسة اللي هزها معاه وقت الدورة التكوينية بش يقيّد فيها المعلومات الكل... و استطاع بسهولة انو يلقى الأدريسة متاع الايمايل، ما فهمش هل أنو يلزمو يستعمل نفس كلمة السر و الا لا، و بش ما يكسّرش راسو، حط نفس الباسوورد متاع الايمايل.

بضع دقايق، و نجم يدخل ع الفايسبوك... طالبينو في تصويرتو و سيرة حياتو، اما بما انو مزروب اتجاهل الطلبات الكل... يا مين عاش من بعد توة يتفاضالهم في راحة عقلو و يوسّع بالو معاهم، اما توة حاجتو بالاخبار و الفيديوات

قعد يغزر للفايسبوك متاعو... و يستنى في الفيديوات بش تبدى هابطة عليه من كل شيرة كيما يحكيوا صوحابو... لكن ما صار شي

غزر للمنقالة متاع الاورديناتور... السبعة متاع العشية

قعد يستنى، و يتمنى... السبعة و نصف، الثمانية... و باقي شي

قلق، ضربتو الڤينية، اتكى بمرفقو ع الطاولة و حط خدو على يدّو... خذاتو عينو، و فاق ليه ليه، يلقاها الثمانية و نصف، اتنهّد

قال: ما عادش فيها

يجبد البورطابل... يطلب واحد من صوحابو اللي ديمة يحكيوا ع الفيديوات و الفايس بوك في القهوة، سألو ش يلزمو يعمل قاللو أنو يلزمو يزيد برشا صوحاب بش يولي يشوف الشي اللي ينشروا فيه، و أعطاه ادريسة قاللو ادخللها تو تلقى فيها الشي الكل

قعد يلوّج في الفايسبوك، حط اللقب متاعو ياخي طلعتلو تصويرة خوه اللي يسكن في الخارج... فرح، طار بالفرحة، بعثلو دعوة متاع اضافة و قعد يبربش في الليستة متاع اصحاب خوه، يلقى مرت خوه بعثلها انفيتاسيون هي زادة، اختو، و راجل اختو و طاح يبعث في الانفيتاسيونات و هو يتمتم

يقول: تي هاو العالم الكلو هوني

اتفاجأ كيف لقي التصويرة متاع ولدو، حتى من ولدو عندو فايس بوك زادة؟... ضرب كف بكف و اتطرشق بالضحك و هو

يقول: ملا جنون ها المفرخ متاع تو

هذا الكل و ما شاف حتى فيديو، و ما تبدل شي في الفايسبوك متاعو
حب يكتب الادريسة اللي هجاهالو صاحبو وقت ما كلمو قبولي شوية... تطلعلو درى شنوة مكتوبة 404 ما فهم منها حتى شي، اعتقد انو صاحبو قد يكون بلفطو.

جات التسعة و نصف... العشرة غير ربع، و لا حياة لمن تنادي... الدقيقة ولات بحسابها و ها الفايسبوك لا حب يهبّط حاجة

العشرة غير درج... سكّر الاورديناتور م الفلسة طول (قص عليه الضو) لعن الانترنت، و الفايسبوك، و النهار اللي شري فيه الاورديناتور.

هز روحو و مشي للصالة، الاخبار متاع الجزيرة عيدك بيها تبدى.

ان شاء المرى يهديها ربي و تخليه يتفرّج رايض... يلزمو يخمم في تلفزة و ريسبتور جدد.

هو و هي: م البرّه... جزء ثاني

2010-12-11T04:20:00.000+01:00

استناتو يرجع النهار الاول، الثاني، الثالث... شي

اعتقدت أنو قد يكون بطّل من حكاية الماخذة، و ما انتبهتش لروحها كيفاش نسات الهدرة و رجعت اتلهات في الريق الفارغ متاع العادة و العوايد اللي سنست روحها انها تتلهي فيه في انتظار انو تتبدّل الأمور.

قد تكون ما عجبتوش، ما حلاتش في عينيه... الله أعلم بيه

هي: يدبّر راسو، أمورو، و الحكاية في الاول و الآخر مكتوب

اتنهدت، و هي تجاوب في مولاة الفارماسي بعد ما سألتها على سر غياب المسيو.

كانت حكاتلها انو السيد هذاكة قاعد يتردد ع الفارماسي على خاطرو قد يكون ناوي يخطبها... و كان الاتفاق أنها هي فقط تتعامل معاه كل ما يدخل للفارماسي

يكب سعدو ها المكتوب... يعطيهم إخذة ناس بكري كي قالوا سعود مش تعرية زنود

دخل للفارماسي بنفس البلاهة اللي يحب يظهّر بيها انو المشيان و الجيان المتكرر ع الفارماسي عادي... ما فيبالوش اللي الجماعة الكل غاديكة شالقين بيه.

ابتسم كي وقف في وسط الفارماسي مش لاقي ش يعمل... اقترح عليه بعض الاصحاب انو في إطار التبديل، ينجم يدخل يوزن روحو و يخرج، أهوكة ع الأقل يشوفها و يمركي الحضور متاعو.

فاجئتو الابتسامة متاع مولاة الفارماسي... و انتبه لوجود الطفلة اللي قاعدة واقفة وراء الكونتوار تستنى فيه ش بي يعمل، ما لقاش غير انو يمشيلها

هو: عسلامة... شنحوالك؟

هي: لاباس، يعيشك... اتفضل

هو: باكو "سبالت" بربي

عجبتها الفازة كيفاش انو سأل على أحوالها، تقدّم ملحوظ يذكر فيشكر، اما الدواء هذا اللي سال عليه أول مرة تسمع بيه... قعدت تغزرلو و ملامح وجهها تستفسر ع الشي هذا.

حتى هو ما كانش يعرف شنوة السبالت هذا، كان اسم متاع دواء، موجود في المانيا... و على ما قالولوا اولاد الحلال انو ما يتباع كان في المانيا، او في أوروبا قد يكون... المهم أنو مش موجود في تونس

هو: دواء... زعمة ش بش يكون؟

خلاتو و مشات تسأل في عرفتها من بعد رجعتلو تعتذر أنو الدواء اللي يسأل عليه مش موجود.

ما نساش بش يشكرها قبل ما يخرج م الفارماسي.

رجع من غدوة، انتابها شعور بالسعادة لمجرد رؤيتو داخل م الباب متاع الفارماسي.

ما كانش ناوي بش يجي اليوم، اما حس بروحو كاينو ناقصتو حاجة، كاينو محتاج بش يشوفها

هو: باكو "سبالت" بالله

هي: (متعجبة) "السبالت"... هذا متاع البارح؟

هو: أي، هو بيدو

ارتسمت على وجهها ملامح متاع أسف شديد

هي: لا لا، ماو قلتلك البارح ما ثماش

اتظاهر بالاسف و هو يقوللها

هو: (بنبرة كلها إحباط) أي... و ما جبتوش منو اليوم؟

جاوبتو بالنفي... فما كان منو إلا أنو تأسفلها و خرج م الفارماسي بعد ما خلاها باهتة ماهي فاهمة حتى شي م الحكاية الدواء اللي طلعلها بيها.

قعد نهارين، ما عاودش رجع فيهم... في الأثناء عاودت وصلتها أخبار مؤكدة انها أمّو مازالت تسأل عليها و على أحوالها و عايلتها و كل ما يتعلّق بيها.

رجع النهار الثالث، مشالها طول، على غير عادتو قبل، و بابتسامة عريضة على وجهو قاللها

هو: هــــاك الـ...

ما خلاتوش يكمّل، ابتسمت و هي تقص على كلامو و تقوللو

هي: "السبالت"... و الله ما نكسابوه

اتكى بمرفقو ع الكونتوار، بعد ما غزر ع اليمين بطرف عينو و اتاكد انها مولاة الفارماسي موش لاهية بيهم

هو: أي... ما ثماش أمل تجيبوا منّو؟

هي: شنوة هو السبالت هذا؟

هو: و أنا منين نعرف عليه... تي ماهو دواء و برّه

هي: آه... امالا كي هو هكة، هاك ديمة طل، و أسأل

اتلفت يمين و يسار، و زاد قربلها كاينو بش يوشوشلها

هو: تي ماني، وليت نحشم

هي: أيا باهي... و الله ما في بالي

هو: تي لا، ما فهمتنيش... ماهم تو يقولوا شبيه هذا داخل خارج على غير ماهو قاعد يشري

هي: امالا هاك خليلنا نومروك تو كي نجيبوا منو هذا ش اسمو

هو: سبالت

هي: اي هذاكة... كي نجيبوه تو نتصلوا بيك

هو: و علاه تقلقوا في ارواحكم و تخسروا في حق الأبال

هي: امالا ش تحبني نعمللك

هو: تي هات النومرو تو نطلب انا نسأل.

الحديث بيناتهم كان مرح للغاية، إلا أنها ما نجمتش تشد ضحكتها قدام طريقتو في طلبان النومرو، و ما لقات غير انها تنصاع لرغبتو و تجبد ورقة صغيرة م المحطوطين ع الكاسة كتبت عليها نورمورها و مدتهالو

<
مازادش طوّل في الحديث معاها، فيسع ما دخل حريف آخر للفارماسي اتسبب بيه و شكرها... و خرج.

هو و هي: وجيعة راس... جزء أوّل

2010-11-27T02:30:00.000+01:00

شافتها أمو أوّل مرة وقت ما مشات اتعزّي في درى شكون اتوفّى يقربلهم... سألتها عليها بنت شكون و أصلها و فصلها و روحت لولدها تجري كاينها جايبة الصيد من وذنو.

أمّو: الطفلة تخدم في فارماسي... مش فارماسيان أما و الله تفهم خير م الفارماسيان.

رغم اللي ما عينتوش بش يدخل في دولاب متاع ماخذة و خطوبة المدة هذي، أما أمو حلفتو براسها و جيهتّو بالأيمانات السبعة اللي هو ملزوم ما يمشي و يطل

أمّو: تي بالك تعجبك؟

هو: قلتلك الرّيق هذا ما عادش نحبك تجبدهولي

أمّو: ش عندك بش تخسر... انتي شوفها و من بعد احكم

عدّى أيامات لين نساها الحكاية... لين درى كيفاش نهار م النهارات يلقى روحو متعدّي قدام الفارماسي هذيكة... سمّى باسم الله، و دخل... و قعد يستنى لين جاه الدور

هي: (و هي تبتسم) اتفضّل

ما جاوبهاش... قعد يغزرلها شوية و هو ساكت مع ابتسامة خفيفة

حليلتها... مصلّي ع النبي عليها كيما يقولوا

هو: باكو ايفيرالڤان بربّي

مدت يدها للخزانة اللي مع جنبها، و مدتلو باكو الحرابش، خلّصها و خرج.

رجع من غدوة، عاود شري باكو افيرالڤان واحد آخر.

من بعد غدوة كيف كيف.

فاق بروحو ساعات كي يتفاضى و يسرح بمخو... يخمم فيها، و كل وين يخمم فيها راسو يوجعو، يولي يجبد حربوشة اتشتش يرميها في كاس ماء... و يشربها.

و قعد هكاكة ايامات... و كمية الافيرالڤان اللي عندو ماشية و تزيد مش عارف ش بش يعمل بيها، و الأهم أنو مش فاهم وين واصلة حكايتو مع الطفلة.

عاودت امو جبدتلو عليها و حكالها انو شافها... فرحتها كانت ما تتوصفش.

دخل عليها مرة م المرات للفارماسي، دوب ما شافتو اتبسّمت

هي: اتفضّل

كانت متأكدة انو بش يطلب منها الطلب متاع كل مرة... كان وصللها الخبر اللي أمو قاعدة تسأل عليها تحب تاخذها لولدها، و كانت عاجبتها الفكرة، و مبدئيا ما عندها حتى اعتراض

هو: بالله سامحني... بش نسألك؟

أخيرا... بش يطلب أنو يقابلها، يتعرّف عليها، بش يطلب منها نورموها، كانت في كل الاحول بش تجاوبو ع الطلب متاعو بالموافقة و تمشي معاه ع الخط لعل يبدل ها الهدرة متاع الحرابش اللي مكبّش فيها و مش مبطّل.

هي: نعم؟

هو: (بنبرة فيها شوية تعجّب) الايفيرالڤان

ما فهمتوش ش يقصد... أما رغم اللي مازال شادد صحيح في هدرة الافيرالڤان، ما فيها باس تمشي معاه ع الخط و بشوف ماه وين بش يصبّ.

هي: شبيه زادة؟

هو: ما تبيعوا كان بالباكو؟

هي: سامحني... ما فهمتكش؟

هو: لا... حبيت نسأل ع الافيرالڤان؟

هي: أي فهمتك... أما شبيه؟

هو: ما تبيعوش بالكعبة؟

هي: (تبتسم) آه، لا لا، سامحني... ماناش عطرية هوني

هو: خسارة... (يتنهّد) الله غالب

و خرج م الفارماسي، شايخ بالضحك... خلاها حالّة فمها ماهي فاهمة حتى شي

قعد ثنية كاملة و هو يخمم أنو يلزمو يبدّل الهدرة، و يطلع بطلعة أخرى غير الافيرالڤان.

شيء... عن الكتاب

2010-11-15T04:00:00.001+01:00

استجابة لنداء المدونة الصديقة ڤيڤوز... نواصل اللعبة هذي

و لو امخر شوية، و الأصح ما ريت حتى حد م المدونين غير ڤيڤوز، اللي طلبت مني نشارك في اللعبة هذي و اللي تقول أنها لعبة انطلقت في البلوغسفير المغربية... و الأصح أكثر ما عادش نشوف في مدونات جملة واحدة (نحكي ع التوانسة، خلّي المغاربة عاد) إلا ما قلّ و ندر، كعبتين و كعبة م اللي عليهم العين.

آخر عهدي باللعب م النوع هذا كان مع تدوينة "هيا بنا نلعب" اللي كانت أطلقتها الصديقة ولادة... و استغربت حقا كي لقيت الكومنتار متاع قيقوز ع التدوينة متاعي (هنا) لأني اعتقدت أنو الحكايات هذي انتهى عهدها في بلوغسفيرنا، و لو اني ضد استيراد الأفكار من بلوغسفيرات العباد الأخرين أما بما انها ڤيڤوز في اللعبة و لأنها اول مرة تطلب مني طلب ما يجيش منو نكسر بخاطرها.

حكايتي مع الكتب... هي حكاية حل الصرة تلقى خيط هههههه، مانيش مغروم جملة بالمطالعة أو القراءة (حتى كي تكون جريدة) هذاكة علاش برشا أسئلة مانيش بش نجاوب عليهم لتعذر وجود إجابة تصلح، و بش نحاول انو كلامي يكون متسلسل زمنيا فقط

أول كتاب مازلت نتذكر اللي أنا قريتو في حياتي، قصة اسمها الوسام... خذاتو واحدة من أخوتي جايزة في الابتدائي و كانت قصتو كانت كالتالي:

يحكيوا على قبيلة متاع نمل، ضربهم الشر و الجوع و قعدوا يلوجوا على حاجة ياكلوها... قعدوا يدوروا هايمين من بلاصة لبلاصة حتى لين ثمة نمالة صغيرة جاتهم تصيح فرحانة اللي هي لقات حاجة تتاكل، مشاو يشوفوا يلقاوها قطعة متاع حلويات في صحن داير بيها العسل... قعدت الملكة متاع النمل حايرة ش بش يعملوا لين اتقدمت نمالة و قالت أنها مستعدة تضحي بحياتها في سبيل أنو بقية النمل متاع المملكة يعيش، و رمات بروحها في العسل... و تبعوها برشا نمال اللي هذا يرمي بروحو في العسل لين نجموا يوصلوا لقطعة الحلويات (النمال ولى يمشي فوق الجثث متاع اللي رماو أرواحهم) و هكاكة كلات المملكة الكل لين شبعت و زادوا هزوا ما يززيهم مؤونة الشتاء.

أيا قعدوا النمل من بعد فرحانين... ياخي جاتهم الملكة قالتلهم يلزمني نحكي على زوز حاجات، الأولى هي أننا ما يلزمناش ننساو النمل اللي ضحى بحياتو من أجل بقية أفراد المجموعة، و الثانية هي أنو يلزمنا نشكروا النمالة اللي لقات الصحفة متاع العسل اللي فيها قطعة الحلويات و اللي كان مش هي رانا متنا بالشر و بالمناسبة هذي أنا بش نعطيها وسام (وسام تقدير مش بش تعرسلها براجل اسمو وسام، هههههه) و قعدوا النمال الكل يصفقوا و هتفوا بحياة راس الملكة.

هذي كانت أول قصة قريتها في حياتي، الصفحات كانت من الحجم الكبير (عشرة صفحات تقريبا في مقاس ورقة بيضاء عادية) و استعمل فيه اللونين الأكحل و الأزرق فقط... القصة قعدت حتى وقت قريب تتناثر في الدار منها اختفات فرد ضربة مش عارف عليها ويني.

قريت بعدها برشا قصص، خاصة في الثالثة ابتدائي، نتذكر وقتها كنت ممحون بحاجة اسمها مطالعة و قصص و حتى فلوس مصروفي (بين قوسين، خاطر ما كانتش ثمة النوسيون متاع المصروف هذي قبل... أما الفلوس اللي تطيح بين يديا بصفة عامة) الكلهم نصرفهم على شريان القصص.

السنة الثالثة ابتدائي تحديدا... م اللي كنت تلميذ طيارة و م الأوائل طارت النفحة متاع القراية و وليت تلميذ عادي، متوسط و في بعض المواد (الفرنسية خاصة) أقل م المتوسط... و وليت نتسبب في برشا مشاكل خاصة مع المعلمة متاع الفرنسي اللي كنت في نظرها و حد التريميستة الاولى واحد من أبهم التلامذة في القسم و كلاتلي الڤلب متاعي بالمسبط، ما سلكتها كان من بعد ما اعطاونا الكرنيات و ظهرت اللي أنا أصلي تلميذ باهي و الأصل يغلب و برّه.

المعلمة هذي، مدام نجيبة يذكرها بالخير... طلبت منا أول العام أننا "التلامذة البهايم" الكل نجيبوا اباهاتنا بش تقابلهم، و كنت أنا منهم بالطبيعة... عاد من غدوة هزيت بابا للبيرو متاع المديرة اللي قعدت باهتة كيفاش أنا توصل تطلب مني المعلمة نجيب بابا خاطرني م البهايم متاع القسم، و كمحاولة منها لرفع معنوياتي أعطاتني قصة و طلبت مني نقراها و من بعد نلخصها و نعطي التلخيص لسيدتي تصلحو و من بعد ترجعلي القصة و التلخيص متاعها بش تحطهم في المكتبة اللي في بيروها.

القصة كان عنوانها ذات الطرطور (الرداء) الأحمر، و النسخة كانت مخصصة للأطفال الصغار بالكل و مش مذكور فيها انو الذيب أكل الجدة متاع الطفلة (و لا حتى أنها الجدة اتخبات في الخزانة)، ربما مراعاة لمشاعر الصغار اللي بش يقراوها و حرصا على انو تكون للقصة نهاية سعيدة تفرّح...

و اللي كتب الإصدار هذاكة ما أحسنش صياغة الاحداث بحيث تحس أنو بلفط الحكاية تبلفيط، و طبعا تبلفيطو ما اتعداتش عليا و مشيت نسأل في سيدتي اللي هي بيدها قرات القصة و بلفطتني في الإجابة... وليت عاد ما عملتش الملخص حرصا أنّي ما نبلفطش سيدتي المديرة اللي ما رجعتلهاش القصة (خذيتها) كيما طلبت مني.

و قعدت هكاكة نتطلفح، لا نطالع لا حتى شي، عدى إصراري الغريب على تتبع مجلة ماجد بصفة أسبوعية و كنت م اللي يحكيوا عليها نقرى المجلة م الغلاف للغلاف...

لين في الأولى و إلا هي الثانية ثانوي (السابعة أو الثامنة أساسي بالسيستام الجديد) فرق علينا الأستاذ متاع العربية قصص و طلب منا أننا نقراوهم و نلخصوهم للحديث عليهم في الحصة المخصصة للمطالعة... كانت المجموعة متاعي مطالبة بمطالعة قصة حليمة (محمد العروسي المطوي).

أتعداو الأسبوعين و طبعا كيما كان متوقع حتى حد ما قراها القصة، جيت نسأل في واحد م الجماعة قال أنو قراها و هي تحكي على حليمة السعدية مرضعة الرسول صلى الله عليه و سلم... و جات بزهري و خرجني الأستاذ شفاهي و قعدت نحكيلو ما قاللي صاحبي.

ما خذاش في حقي حتى اجراء، لأني كنت م التلامذة الممتازين عندو (كنت الأول في العربية) أما نصحني أني نعمل اشتراك في المكتبة العمومية و نولي نطالع شوية... خذيت بنصيحتو، و عملت الاشتراك في وقتها و قريت بعض القصص أما كنت ديمة نوخّر في ترجيع الكتب حتى من بعد كي اتعدى العام الأول طلبوني في خمسة دينارات و درى قداش غرامة متاع تأخير، وليت بطّلت ما جددتش الاشتراك، حتى انو ثمة كتاب قعد عندي ما رجعتوش ليومنا هذا (قصة الفيل الأبيض) اتعدات مدة مستحفظ بيه في الدار ما نحبش نهزو للمكتبة خوفا لا يجبروني على دفع غرامة التأخير.

الإشتراك في المكتبة العمومية كان فرصة بش انجم نقى برشا قصص أهمها المجموعة العالمية للفتيان (قصص عالمية مترجمة) اللي نذكر منها خاصة دون كي شوت و جزيرة الكنز.

إلى حد تلك الفترة، كانت عندي موهبة الحفظ... أني كل ما نقراه نحفظو عن ظهر قلب م القراءة الأولى، مهما يكون طولو، جمبع النصوص اللي في كتب القراءة، جميع القصص اللي كان أني قريتهم، كل ما يتقال قدامي من كلام و حديث... حتى أني نتذكر مليح كيف كنت نمشي للمحل متاع الوالد و نسلّم عليه كل ما نروّح م المكتب هو و اللي نلقاه معاه و نسرططلو عن ظهر قلب كل ما قريتو و ما قالهولنا المعلم، و من بعد نتعدّى للدار.

كيف كيف زادة كنت نحفظ برشا أجزاء م القرآن الكريم، و ثمة برشا سور م اللي ما كناش نقراوهم في المكتب و انما كنت نقراهم وحدي.

و من بعد بالشوية بالشوية بدات تمشي على روحها الخكاية هذي و وليت ما عادش انلوّج برشا ع الحفيظة و لو أنها الموهبة الحق متاع ربي مازالت موجودة لحد الآن غير أنو وسع البال ما ثماش و برّه.

في السنة الثالثة ثانوي... خذيت أول إنذار في مسيرتي الدراسية، و كانت حصة متاع عربية.

نسيت إذا كانت حصة مطالعة و الا شرح نص... كل اللي نتذكرو اننا كنا نحكيوا على قصة سهرت منه الليالي (علي الدوعاجي) اللي كنت خذيتها ضمن القصص اللي اعطاوهملي في الجايزة اللي خذيتها في السنة الأولى ثانوي...

و كنا قسم كامل خايضين كي راس المجنون حتى أنها الأستاذة كل مرة تهيج في واحد م التلامذة بش البقية يسكتوا، لين مرة جات فيا الضربة و عيطت عليا، يتلفتلها الطفل اللي مع جنبي

يقوللها: (بنبرة متاع تنرفيز) قوللو ... من قبولي و هو يقوللي سهرت فوقه الليالي

و رغم المفاجأة و خطورة الموقف ما نجمتش نمنع روحي أني ندهش بالضحك، كيما كان حال التلامذة الكل، حتى الأستاذة ما نجمتش تشد روحها أنها تضحك... و كان الإنذار اللي خذيناه أنا و الطفل اللي مع جنبي وقتها بسبب التشويش داخل القسم.

و كملت بقية الأعوام لا نطالع كتب و لا غير، لهّاني التوجه متاعي خاصة (رياضيات ثمة ميكانيك من بعد في السوبريور) أني نبتعد تقريبا بصفة كلية ع الدومان متاع الكتب و القصص... عدى الكتب متاع الاختصاص اللي قريت منهم برشا، و نصرف عليهم برشا من فلوسي و وقتي زادة.

عندي غرام أني نمتلك بعض العناوين في نسختها الأصلية (ما تكونش مطبوعات فوتوكوبي) و الحاجة الوحيدة اللي نوصّي عليها جماعة الخارج (هذا كي نوصّي طبعا) ما تكون عادة كان بعض العناوين متاع كتب تهتم بالميكانيك بصفة عامة.

في الأثناء كانتلي بعض المطالعات اللي تتعد على صوابع اليدين، قصة اللص و الكلاب متاع طه حسين، كليلة و دمنة، ألف ليلة و ليلة (مش الكل) الكتاب الوحيد اللي قريتو بالفرنسية كان كوكب القردة، بديت درى قداش من مرة نقرى في قصة البؤساء (فيكتور هيغو) أما عمري ما اتعديت الجزء الأول (فيسع ما نفد).

في المبيت... اكتشفت مجموعة قصص رجل المستحيل أدهم صبري، قريت أربعة أو خمسة قصص لكني فديت م المبالغة متاع المصاروة في شكرهم لأرواحهم.

ما عندي حتى اسم لكاتب أو لكتاب حاليا نخمم أني قد نقرالو أو اني يستحيل نقرالو في المستقبل القريب (و لا حتى البعيد)، نفد برشا  م الشعر (لأسباب كنت اتطرقتلها في تدوينة قديمة) و ما انجمش نتبع قراية ثلاثة أربعة أبيات على بعضهم، نفضّل أني نستمع للإلقاء الصوتي (نحبذ يكون أوديو حتى فيديو لا خاطر منظر الشاعر يخدع في معظم الأحيان و يعطي فكرة غير اللي يكون العبد متصورها... كنت نعرف الحكاية هذي و زدت اتأكدت منها كي مشيت لمهرجان دوز توة عامين لتالي).

آخر كتاب قريتو كان توة درى قداش من شهر... حواديت التاكسي (خالد الخميسي) بعد ما سمعت شهاب في احدى لقاءاتي بيه يشكر فيه و يحكي عليه.

هذي بصفة عامة حكايتي مع الكتب... قد تكون مخيبة لتطلعات البعض، لكن هذاكة الواقع الله غالب... التدوينة هذي ما كنتش نكتبها لولا وعد وعدتو للمدونة ڤيڤوز اللي (كيما يقول بروفيلها ع الفايسبوك) احتفلت البارح بعيد ميلادها، إن شاء الله كل عام و هي حية بخير.

شوية... تبعبيع

2010-11-10T03:00:00.000+01:00

دخل للسوق متاع العلالش... نفس العادة في الوقت هذا من كل عام.

أول ما يخبروا وقتاش العيد في الأخبار يمشي يعمل طلة... يعدّي جمعة و يمشي يعمل طلة اخرى... و من بعد يرجع نهارت الوقفة في العشية امخر و يشري العلوش

ما عندوش وين يحطّو، و زيد الاعوام الاخرانية السرقة ولات بزايد... يشريه ليلة العيد و يعدّيها ليلة كاملة يعس عليه، ما يصدّق لربي وقتاش يتعدّى الذبّاح الاول في الحومة يذبحو و ياكل تفتوفة لحم و يخلي العايلة لاهية فيه و يمشي يتكى يرقد شوية قبل ما يدور يعيّد ع الفاميليا.

يطلع سومو و الا يهبط، عندو تفتوفة فلوس يلم فيها م العيد الصغير... بش يشري بيهم العلوش اللي كتب.

المرة هذي ما عجبوش السوق، الدنيا ساكتة ما ثماش حس، مستانسة قبل واكلة بعضها بالتبعبيع و العباد تعيّط تسوم في العلالش و دزني و ندزك.

توة يدور في راحتو ما زاحمو حد... العباد الكل تغزر لبعضها تقولشي عليهم جايين لحصة تعارف... و العلالش ساكتة، العلوش اللي يغزرلو بش يثبتو يحس كاينو يڤحرلو مش عاجبو الجو.

وقف ع النصبة الاولى، الثانية، عجبو علوش... قعد يستنى في العباد بش تبدى تسوم شي، ما ثمة حد قاعد يسوم... كان الفرايجية و برّه.

ما يحبّش يسوم خاطر ساعات ثمة بياعة يكبشوا فيه، حصل مرة و سام علوش رصاتلو شراه... مروح بيه يتدحدح و هو يميّل في راسو تقولشي جايب الصيد من وذنو، عدّالو ليلة كاملة و هو يبول لين صبح عليه الصباح يلقاه عقاب كمشة قد القطوس.

من وقتها ما عاد يشري كان العلوش اللي يلقى العباد تشكر فيه و تعطي في سومها.

النصبة الخامسة، يلقى علوش قد اللي شراه عمناول... وقف غزرلو من هوني، دارلو من غادي، يسوم ما يسومش... قعد واقف شوية.

عمناول شراه بميتين و ثمانين دينار، وصلوا ساموه ميتين و سبعين و الراجل مش حابب يبيع بالسيف و المزية خذاه بميتين و ثمانين.

اتلفت للبيّاع

سألو: بقدّاش سام ها العلوش بربّي؟

قالولوا انهم العام هذا اغلى شوية... بينو و بين روحو قال أنو لو كان يقوللو ثلاثميا و عشرين و دينار يشري... و حتى من قبل بجمعة، يدبّر وين يحطّو مش مشكلة.

مولى العلوش قعد يهز فيه و يحط منها

جاوبو: أربعميا و عشرين

ضحك...

قاللو: ساموك أربعة ميا و عشرين؟؟

رد عليه: اي نعم

قاللو: و ما بعتش؟

جاوبو بوجهو ما يعني النفي.

وقتها برك لقي إجابة لحالة الصمت اللي استغربلها أول ما دخل للسوق... و ولّى يجيب خبرة للڤحرة متاع العلالش. و فهم الإحساس اللي انتابو م اللي دخل للسوق كل ما يغزر لعلّوش و يحس اللي هو بش يهد عليه ينطحو

قرر انو يلزمو يروّح، زايد... يا ذنوبي كان بش يشري علوش المرة هذي و هو خارج يعرضو المكّاس... شادد الكرني متاع التواصل يمروح بيه.

وقف وقف قدّامو منها ضحكلو

و قاللو: بعععععع

و خرج يضحك، عامل جو... حس بروحو اتفرهد كي بعبع

اتخذ قرارو أنو مش بش يشري علوش العيد هذا

أورنج...

2010-07-21T05:00:00.000+01:00

شد التليفون بورطابل بيدو و قعد يغزرلو مليح قبل ما يمدهولي

يقوللي: تراه بالله شوف يا برباش، تنجمشي تخدم الأنترنت فيه

بورطابل عادي، نوكيا 3100، ما نتصورش (على حد علمي و ما نعرف) أنو قد يخدّملو الانترنت كيف ما يحكي... ما فهمتش السبب اللي خلاه يطلب الطلب متاعو... رجعتلو البورطابل

قلتلو: لا ما ظاهرلي... هذا حتى كان بش تخدم بيه الانترنت، مرجها اكثر منها

قربلي، و هو شادد البورطابل بين يديه كأنو يحب يوريني حاجة... وقتها برك فين جبت خبرة للعلامة متاع اورنج المحطوطة ع البورطابل

قاللي: ساعة نورمالمون يحل أورنج... مش قالوا أورنج دخلت الـ 3G لتونس سايي

قلتلو: (و انا نحاول اني نمنع ابتسامتي انها تظهر) أي، قالوا هكة

قاللي: زعمة ما يحلهاش هذايا الـ 3G متاع وذني

قلتلو: لا يا ذنوبي

قعد باقي يغزر للبورطابل بنفس التركيز... قبل ما يعاود يتلفتلي

يسألني: تي أهوكة محطوط عليه يحل أورنج... علاه ما يحللهمش الريزو متاعهم؟

قلتلو: ياخي هي حكاية ريزو... تي بره أعمل نومرو  تو يعطيوك في عوض الـ puce زوز و اخطاك

قاللي: ساعة كي جابوهولي من فرنسا كانت معاه puce اورنج

ما قلت شي، فهمت انو زايد الكلام... و زيد مازلت شادد صحيح أني ما نضحكش

قاللي(بنبرة كلها حسرة): مني انا، هكاكة ما نستحفظش ع الحاجة.. كان في بالي اللي هي أورنج بش يجي نهار و تحل هوني راني استحفظت بيها

ما زدتش معاه برشا... قمت و خليتو

فرجة... في السينما

2010-07-15T03:00:00.002+01:00

مسرح الهواء الطلق، اللي كان يمثل مكان لعرض بعض الافلام في إطار ما يسمى بالمسابقة الدولية...

الدنيا ظلمة، ما تسمع كان الأصوات غير المفهومة الصادرة عن مضخمات الصوت او بعض الضحكات المكتومة لبعض الكوبلوات المرشقة هنا و هناك في كل مكان...

طقس منسّم يبعث على الاسترخاء لولا انتباه البعض لوجود زوز أعوان بالزي المدني "سيفيل" شتت تفكيرهم، و تركيزهم

فيلم كوري، نسيت إذا كان صامت أو ناطق، و ما نتصورش انو كانت تفرق برشا النقطة هذي... كل اللي نتذكرو هو طفلة تهرول و تلهث، و ثمة راجل عزوز راقد على سرير مستشفى قاعد يتنهّد و كان م الواضح أنو يعدّي في آخر لحظاتو...

الفيلم يبعث على الملل لدرجة انو ثمة شلة قاعدة في المقاعد الخلفية اتلهاو يحكيوا و شيئا فشيئا بدات ضحكاتهم تملأ المكان... الشي اللي ما عجبش آنسة (أو هي سيدة، الدنيا كانت ظلمة، و ما كانتش بش تفرق زادة الحكاية) اللي ابدت انزعاجها م الضحك متاعهم على خاطرو ما خلاهاش تركّز مع الفيلم

كنت نستغرب انو ثمة شكون قاعد يحاول يركّز مع الفيلم... إلا أنّو استغرابي تلاشى قبل بشويّة لأنّي أنا زادة و قبل بضع لحظات كنت نمثّل مصدر إزعاج لأحد اصحاب الرّوس المغوّفة و ذلك بسبب صوتي اللي على ما يبدو كان مرتفع اثناء تجاذبي لاطراف الحديث مع الصديقة لينا، و اللي الظاهر انو ما خلاهوش يستمتع بلحظة التجلي اللي السيد كان عايشها مع صديقتو

الحاصل، انو الآنسة اللي كانت متقلقة أصبحت تعبّر على استياءها م الضحك متاع الشلة اللي قاعدة موش بعيد علينا و ذلك انها تعيّط عليهم من تحت لتحت في محاولة يائسة انها تنبزهم بقلّة تربيتهم... دون جدوى

هذ الكل و الفيلم الكوري قاعد يخدم... الطفلة اللي كانت تهرول وقفتو قعدت تلهث، ثمة صرخة ما نعرفش علاش بالضبط لكن في جرتها هزو الراجل العزوز اللي كان يتنهد و قعدوا يتجاروا بيه وسط كولوار طويل كان واضح انو في مستشفى، لكن للاسف توفى (جبدوا عليه الملحفة) قبل ما يوصلوا بيه للبلاصة اللي كانوا ناوين يهزوه ليها

تتعدى طفلة صغيرة تبيع في بعض الماكولات على ما يبدو، توقف مع جنب الآنسة اللي كنت نحكي عليها و تبدى

تعيّط: قطانيا... قلوب

توقفلها الآنسة تعيّط هي زادة

تقوللها: برّه عاد ما ناقصتك كان انتي توّة عاد

قبل ما تتلفت وين قاعدين الجماعة اللي شايخين بالضحك

تقوللهم: موش معقول جملة راهو... نحترموا بعضنا شوية يعيشكم

قالتها بالفرنسية طبعا، لكن ما يهمّش... رجعت قعدت بعد ما قالت هاك الكلمتين و كلها احساس بالنشوة أنها نجمت تفرّغ قلبها... الطفلة الصغيرة اللي تبيع في القطانيا، اتفاعلت معاها و بكل براءة

قالتلها: (بنبرة فيها شوية تعاطف مع المشهد) شفت بالله ما أفل تربيتهم، الراجل مازال كيف مات و هوما قاعدين يضحكوا

و اترشقت العباد الكل بالضحك... بما فيهم الآنسة اللي كانت متقلقة قبولي شوية.

و انتهى الفيلم الكوري، كيف ما بدي بالضبط، من غير ما تفهملو بداية من نهاية... أصلا ما جبت خبرة للنهاية متاعو إلا كي تلفتتلي لينا اللي على ما يبدو مازالت كي فاقت م النوم

سألتني: ياخي كيفاش وفى الفيلم؟

و جاوبتها: ياخي انتي تتذكرو كيفاش بدي؟

التصويت... في تن-بلوڤ / جزء سابع

2010-03-11T03:00:00.001+01:00

و بعد انقطاع دام قريب الستة أشهر...

على اثر الاحداث اللي صارت خلال شهر رمضان الفارط و اللي على اثرها قرر حسين (هنا) ايقاف عمليات التسجيل للمصوتين ع التن-بلوڤ

الأحداث اللي كنت اتحدثت عليها في تدوينة [التصويت في تن-بلوڤ / جزء سادس] اليوم...

تم اليوم إعادة فتح أبواب التسجيل من جديد للمصوتين على مجمع المدونات التونسي

يمكن التسجيل عبر هذا الرابط (هنا)

حكاية... عِشرة

2010-03-06T23:45:00.002+01:00

ما نعرفش علاش كي نجي نقضي من عند العطار... من غير ما نشعر نلقى روحي في حانوت عم صلاح(كنت اتحدثت على عم صلاح العطار في تدوينة [الحليب... و حكاية تجيب حكاية].

رغم اللي تو ثمة أربعة حوانت عطرية يعرضوني في ثنيتي، غير الحوانت الاخرين اللي يتسماو اقرب (و اللي متعارك مع معظمهم و ما نقضيش من عندهم، حتى كنت اتحدثت قبل ع الحكاية هذي في تدوينة [الشنقة مع الجماعة... خلاعة])، إلا انو ما نحب نقضي كان من عند عم صلاح.

تقعد حاجة برك اللي نحاول نتجنب ما نشريهاش من عند عم صلاح، اللي هي الخبز.

البرباش: تي شبيه خبزك هكة عم صلاح!

عم صلاح: (يبتسم) تي اهوكة نعمة ربي... شبيه زادة؟

البرباش: تي باسل درى كيفنو

البرباش: (نبتسم شوية) كي كنت صغير، دوب ما ندخل ع الوالدة بالخبزة ديركت تعرفها اللي هي من عندك

عم صلاح: (يضحك) كيفاش؟

البرباش: تقوللي حاشى نعمة ربي الخبزة تقولشي عليها يد متاع ميت

يدهش عم صلاح بالضحك لين يولّي ما عادش ينجّم يشد روحو، يتكى على كدس الحليب (موش الدليس، خاطرو الدليس يتباع بالوجوه)

البرباش: تي علاش ما تبدّلش الكوشة؟

عم صلاح: تي علاه نبدّل فيها... الخبز اللي نجيبو يتباع

البرباش: تولي تجيب اكثر... تبيع اكثر... و تصوّر اكثر

عم صلاح: على زوز صوردي... ينعنبو الدنيا

عم صلاح: (يسكت شوية) تي الكواش صاحبي و عشرة سنين... تو فوق الاربعين عام م اللي حليت و احنا نخدموا مع بعضنا بش نجي تو عقاب عمري نبدلوا على زوز دورو

البرباش:  تي نحكيلك و بره

عم صلاح: تي هو الراجل (مولى الكوشة) كبر و تو عيدك بيه يموت... كيف يموت تو نبدّلها الكوشة

عم صلاح: (يسكت شوية و يقعد يغزرلي و هو يدوّح في راسو) عندي عشرة سنين و أنا نقول في الكلام هذا... كان ما متت انا و قعد فيها هو.

البرباش: ما تعرفهاش عند شكون عم صلاح...

نهز خبزتي... و نخرج م الحانوت

سكريبت... تضامنا مع المدونات المحجوبة

2010-02-26T02:00:00.005+01:00

أمام تنامي ظاهرة حجب المدونات اللي طالت مؤخرا عديد المدونين... على سبيل الذكر لا الحصر المدون سبجكتيف، الكلاندستان، أرابيكا، طارق الكحلاوي، بنية تونسية ..

تعبيرا عن تضامننا مع أصحاب المدونات المحجوبة، و في إطار التنديد بالعملية هذي

لكل من يرغب في إضافة هذا السكريبت للمدونة متاعو

 <script language='javascript' type='text/javascript'>
function showhidediv(id){
try{
  var panel=document.getElementById(id);
  if(panel){
    if(panel.style.display=='none'){
      panel.style.display='block';
    }else{
      panel.style.display='none';
    }
  }
}catch(e){}
}
</script>

<div id='ammar404' style='background:#000000; border:5px #FF0000 solid; display:scroll; overflow:visible; z-index:7777; position:fixed; left:10px; right:10px;  top:10px; bottom:10px; filter:alpha(opacity=90); -moz-opacity:.90; opacity:.90; border-radius:20px; -webkit-border-radius:20px; -khtml-border-radius:20px; -moz-border-radius:20px;'>

<div width='100%' style='position:relative; display:scroll; top:20px; text-align:center; '>
<img src='http://i48.tinypic.com/2r2mxqg' />
</div>

<div width='100%' style='position:relative; display:scroll; top:40px; text-align:center; '>
<img src='http://i50.tinypic.com/200bfgp' />
</div>

<div onclick='showhidediv("ammar404");' width='100%' style='position:fixed; display:scroll; bottom:30px; left:30px; cursor:pointer;'>
<img src='http://i48.tinypic.com/2jedzsm' />
</div>

</div>

ملاحظة: بالنسبة لبقية المدونات التي تم إنشاؤها على خدمات استضافة اخرى (كيف الووردبرس، مكتوب مثلا، أو المدونات اللي عندهم اسم نطاق خاص، و مواقع الانترنت الأخرى)... يكفي إضافة السكريبت المذكور مباشرة بعد الكود:

<body>

في الصفحة الخاصة بمنظر المدونة (فقط لمن لديهم فكرة عن برمجة الـ HTML.. و البرباش غير مسؤول عن أي تبلبيزة يمكن تحصل.)

تحيين: تم تغيير بسيط في السكريبت اثر عطل طرأ على الموقع الحافظ للصور.

البنية التونسية... لينا

2010-02-24T20:45:00.003+01:00

الطفلة هذي:

اللي كان سبقلي و اتحدثت عليها في تدوينة: فتيات في البلوغسفير (هنا)... وقت ما نورت وجه تونس بـ "كرعيها" و جابتلنا ميدالية فضية في بطولة العالم لرياضة المنتفعين بزرع الأعضاء في أستراليا 2009.

اليوم قرّر عشيرنا عمار 404 صنصرة مدونتها بنية تونسية (هنا) و كذلك صفحتها على الفايس بوك (هنا)

معتقدا انو بالشيء هذا بش يكون وضع حد لمسيرتها التدوينية...

نفي مدونة: أفكار ليلية ضيفة على قلق، و حاجات أخرى

2010-02-09T05:02:00.009+01:00

تقديم

نحب في البداية نقول إلي فكرة استضافة مدونات محجوبة إلي بادرو بها أنتيكور و برباش فكرة جميلة.. و بالطبيعة هذا ما يعنيش أنو مدونة "أفكار ليلية" بش توقف أو ماهياش بش ترجع في ثوب جديد و مش بش تنتهي لمجرد قرار الرقيب أنها تتحجب... لكن لأن فكرة التجاء مدونة محجوبة لمنبر مدونة شقيقة بهدف أنها تكون مقروءة في تونس (لأنها تبقى مقروءة في بقية العالم بعد هذا و ذاك) فكرة جديدة و مثيرة للانتباه فإنو يظهرلي تستحق منا على الأقل أننا نجربوها... هذية إذا تدوينة باسم مدونة "أفكار ليلية" في مدونة "قلق... و حاجات أخرى" و بالطبيعة نفس الشي بش يجرى في مدونة "أنتيكور"..

نفي مدونة

المدونة من الناحية التقنية البحتة ما عندهاش جنسية... هي تتصنع في "بلاتفورم" في بلاد، و ربما تتكتب في بلاد أخرى، و الكاتب عندو جنسية بلاد ثالثة، و تتقرى في النهاية في جميع أنحاء العالم... لكن من ناحية روحها و اهتماماتها و خاصة جنسية و ميول و خلفية كاتبها تنجم تكتسب جنسية... "أفكار ليلية" بالمعنى هذا هي مدونة تونسية لأن صاحبها تونسي و يعتز بانتماؤو لتونس و لأن اهتماماتها تونسية بالأساس رغم اهتمامها بمجالات أخرى في نفس الوقت، و لأن "لوغتها" بالمعنى الحرفي و الدلالي للكلمة زادة تونسية...

و بالمعنى هذا حجب الرقيب لموقع و في الحالة هذية بشكل محدد لمدونة، منع التوانسة المقيمين في تونس من قراءتها، إبعادها بصفتها الالكترونية من التراب التونسي يعني عمليا نفيها إلى خارج الوطن.. يعني نفي المدونة.. قرار الحجب بالمعنى هذا ماعادش مجرد قرار تقني و بيروقراطي يستهدف إلغاء إمكانية المبحر في الانترنت في تونس من أنو يوصل لعنوان معين... قرار الحجب عندو في النهاية معنى أعمق، سواء قصدو الرقيب أو ما قصدوش، هو بمثابة قرار من جانب واحد، بدون محكمة، مجرد قرار تنفيذي بالضغط على زر، هو قرار يحاول نزع جنسية المدونة...

لكن هل يمكن أن نمنح حقوق المواطنة و الحق في التقاضي لمدونة؟ لهيكل الكتروني افتراضي؟ حقوق كيفها كيف حقوق البشر؟

مش بالضرورة... المدونة في النهاية ما تنتخبش، و ما ننتخبوهاش.. المدونة ما تدفعش الضرائب و ما تسافرش بجواز سفر... لكن في ذات الوقت تستحق حد أدنى من الحقوق بالذات لأنها كتيبة و لأن الكتيبة هي أحد التعبيرات على وجودنا كبشر... نفي مدونة عمرو أو زيد هو في نهاية الأمر نفي للكتيبة متاع عمرو أو زيد... و بالمعنى هذاكة نفي لأحد تمظهرات وجود عمرو أو زيد...

نفي مدونة.. يعني أيضا نفي المدون

عن "أفكار ليلية"
طارق الكحلاوي

الصفحة البديلة المؤقتة لمدونة "أفكار ليلية" على فايسبوك

لوڤو... لا، لسجن الطلبة

2010-01-16T23:17:00.010+01:00

تضامنا مع الطلبة المسجونين، و تعبيرا عن رفضنا لاعتقالهم على خلفية أنشطتهم النقابية و السياسية، حيث أنّ مكانهم الطبيعي هو مدرج الجامعة... و حتى يتم إطلاق سراحهم في أقرب الآجاللمن يرغب في الإطلاع على مزيد من المعلومات، يمكن زيارة مجموعة الفايس بوك المعدة للغرض (هنا)...

Blogueurs Tunisiens contre la Détention des Etudiants

و كذلك المدونة (هنا)...

/http://freejailedtunisianstudents.blogspot.com

كما يمكن متابعة آخر التطورات عبر نقاشات التويتر على الرابط المعد للغرض (هنا)...

لكل من يرغب في إضافة هذا البانر للمدونة متاعو

 <a style="display:scroll; position:fixed;
top:0px; left:0px;" title="لا... لسجن الطلبة"
href="http://freejailedtunisianstudents.blogspot.com/">
<img src="http://i41.tinypic.com/1s15kg.jpg"/>
</a>

ملاحظة: بالنسبة لبقية المدونات التي تم إنشاؤها على خدمات استضافة اخرى (كيف الووردبرس، مكتوب مثلا، أو المدونات اللي عندهم اسم نطاق خاص، و مواقع الانترنت الأخرى)... يكفي إضافة السكريبت المذكور مباشرة بعد الكود:

<body>

في الصفحة الخاصة بواجهة الموقع (فقط لمن لديهم فكرة عن برمجة الـ HTML.. و البرباش غير مسؤول عن أي تبلبيزة يمكن تحصل.)

لوڤو... على دربك يا حشاد

2010-01-15T13:00:00.002+01:00

تزامنا مع ذكرى تأسيس الإتحاد العام التونسي للشغل يوم 20 جانفي 1946 و هو الحدث الذي لعب فيه الشهيد فرحات حشاد دورا رئيسيا و انتخب على إثره أول أمين عام للمنظمة النقابية.

لمن يرغب في الإطلاع على مزيد من المعلومات، يمكن زيارة مجموعة الفايس بوك المعدة للغرض (هنا) و كذلك المدونة (هنا)...

و تفاعلا مع النقاش الذي طرحه المدون طارق الكحلاوي عبر الفايس بوك تحت عنوان

بمناسبة ذكرى تأسيس "الاتحاد العام التونسي للشغل"
أسئلة حول النقابي و السياسي

و ذلك ضمن نقاشات مجموعة الفايس بوك "تاريخ تونس" لمؤسسها المؤرخ التونسي (و المدوّن) السيد عدنان منصر.

و تفعيلا... و تذكيرا بالعريضة اللي تم نشرها (هنا) للمطالبة بملاحقة قتلة حشاد... يمكن الامضاء على العريضة بإرسال الاسم و الصفة على العنوان التالي

farhat.hashad@gmail.com

لمن يرغب في إضافة الشعار للمدونة متاعو

 <a href="http://tkharbich.blogspot.com/2010/01/blog-post.html">
<img src="http://i45.tinypic.com/x2o5u1.jpg"/>
</a>

أحنا... و هوما/ العياط

2009-12-16T23:17:00.005+01:00

سيدي بوسعيد، الرمبوان متاع الحمام الأبيض...

قاعدين في هاك القهوة الشعبية نستناو في وصول ثلة م الأصدقاء "المدونين" اللي بطاو شوية ع الموعد المتّفق عليه.

طقس تحفون، ربيعي مشمس كيف ما يقولوا جماعة النشرة الجوية... و الدنيا حافلة بالتوريست تقولشي علينا في عز الصيف.

كرهبة متاع شرطة من نوع بيجو بارتنر، يسوق فيها واحد سيڥيل وحدو (دون مرافق) تعمل في دورة بحيث أنها تتعدى م الرمبوان بصفة منتظمة كل درجين أو ربع ساعة.

و عون أمن (حرس) بالزي الرسمي متاعو ينظّم في حركة المرور... ماهو قاعد يعمل في حتى شي لكن مجرد وجودو يخلّي الأمور تمشي بطبيعتها.

متعدّي سرب متاع توريست، خمسة ألمان... اللي و برغم الشعور بالبرد اللي يفرضو فصل الشتاء اللي مازال كيف دخل، إلا أنهم استغلوا الدفء اللي أوجدتو الشمس الزارقة بش يتشخلعوا كيف ما يحبوا.

الملفت للنظر في الجماعة التوريست هو عياطهم و صياحهم المستفز اللي كيف نضيفولوا دبابس الشراب اللي كان البعض منهم حاملينها في يديهم نفهموا علاش هاك الكوبل اللي جايين من بعيد خيروا يشقّوا الطريق للجهة المقابلة تجنبا لأي إحراج

بالصدفة تتعدّى هاك البارتنر متاع الشرطة... و تتوقف

كان باين أنو التوقف متاعها كان لدواعي أمنية، بش السيد السيڥيل اللي قاعد يسوق يتمكن من مواكبة الاجواء أولا بأول.

ثمة زوز شيّاب قاعدين في الطاولة اللي مع جنبنا، اتلفت واحد فيهم لصاحبو

قاللو: هاو تو بش يهبطلهم... يحشيهم في الفڤّونة متاع الكرهبة.

اتلفتلو صاحبو و بنبرة كلها رصانة

جاوبو: لا لا، أما تو ينبّه عليهم بش ينقصوا م الحس

قاللو: تي آش مين ينبّه عليهم... و الله إلا ما يهزهم طش

اتلفّتلي السيد اللي قاعد مع جنبي، و قربلي بش يوشوشلي و الكلام يقعد محصور بيناتنا

قاللي: تو ******* فيه

ضحكت، و انا نغمز فيه بطرف لساني، و قعدنا نتفرجوا في الموقف... و كان الأمر كيف ما قال صاحبي، السيد السيڥيل استطرد براسو (أخطى راسي و أضرب) و عاود خدّم الكرهبة و قصد ربّي يكمّل في الجولة السياحية متاعو...

هذ الكل و هاك العون متاع الحرس واقف في بلاصتو ما تحركتلوش حتى شعرة.

ما يجيش ربع ساعة، و تتوقف كار بيضاء في الجهة المقابلة م الطريق لكن بعيد علينا شوية ، مكتوب عليها بالبنفسجي و بخط واضح:

هدية رئيس الجمهورية إلى الكشافة التونسية

و هبط منها الشوفير و في جرتو هاك الاولاد متاع الكشافة شادين الصف بطريقة منظمة قليل وين مازلنا نشوفوها...

كملوا اصطفوا هاك الصغيرات مع جنب الكار قبل ما القايد متاعهم يعطيهم الإشارة بش بش يبدوا يمشوا خطوة خطوة في اتجاه أنهم يطلعوا لسيدي بوسعيد الفوق.

دقيقة من زمان، و كانوا متعدّين قدّامنا، يغنّوا في هاك الاناشيد الكشفية متاعهم (يا حسرة)...

ما وصلوا للرمبوان وين أحنا قاعدين إلا و كانت هاك البيجو بارتنر في الموعد...

لكن السيد السيڥيل المرة هذي ما قعدش يدوّر فيها في مخو برشا الحكاية، ديركت هبط م الكرهبة (و بالطبيعة خلاها واقفة وسط الطريق في الطريق، ما يلوم عليه حد... بوليس)

و مشي ديركت لقايد الفوج يعيّط عليه و يجبد فيه من كتفو كيف اللي يحب يهز يركبوا في الكرهبة و الطفل مسكين يجبد في روحو...

و كمّل خلط الشوفير متاع الكار و قعد السيد السيڥيل يعيّط عليه و هو يرد عليه بنفس النبرة قبل ما يتلفّت للصغيرات و هو يصيح

يقول: تي سكروا افّامكم... ما تنجموش تمشوا ساكتين؟

قاعدين نتفرجوا في الحضبة و نسمع في واحد من هاك الزوز شياب يحكي مع صاحبو

يقوللو: هاو الوشقة الآخر خلط عليهم

نلقاوه هاك العون متاع المرور جاي ينڤـّز، دوب ما وصللهم قعد هو زادة يصيح على قايد الفوج و الوليدات الصغار متاع الكشافة و يريّض في السيڥيل اللي مسكين كان على أعصابو و هو يسعى جاهدا لفرض النظام، و اللي زادة ما زادش برشا قبل ما يركب في الكرهبة اللي يسوق فيها و يقصد ربي...

يتلفت واحد من هاك الشياب لصاحبو

يقوللو: ازززح... معنتها الڤورّة يجونا لبلادنا و يعيطوا و يبرطعوا، ما يكلمهمش... و صغارنا حتى الغناء و الصياح لا

يجاوبو الآخر بنبرة تدل على حزن عميق و فدة

يقوللو: ش تحب تعمل يا صاحبي... هذاكة حال الدنيا.

يتلفتلي صاحبي، يقربلي و يوشوسلي كيف ما قبولي

يقوللي: ش من دنيا... ينعنبو الوقت و بره.

لوڤو... الحرّية، لفاطمة أرابيكا

2009-11-06T01:41:00.010+01:00

تضامنا، و تعبيرا عن مساندتنا للمدونة فاطمة ارابيكا، فيما تتعرّض له من ممارسات جرّاء نشاطها التدويني... و حتى يتم إطلاق سراحها في أقرب الآجال.

لمن يرغب في الإطلاع على مزيد من المعلومات، يمكن زيارة مجموعة الفايس بوك المعدة للغرض (هنا) و كذلك المدونة (هنا)...

http://freearabicca.wordpress.com

 <a style="display:scroll; position:fixed;
top:0px; left:0px;" title="الحرّية.. لفاطمة أرابيكا"
href="http://freearabicca.wordpress.com/">
<img src="http://i36.tinypic.com/10ftisi.jpg"/>
</a>

ملاحظة: بالنسبة لبقية المدونات التي تم إنشاؤها على خدمات استضافة اخرى (كيف الووردبرس، مكتوب مثلا، أو المدونات اللي عندهم اسم نطاق خاص، و مواقع الانترنت الأخرى)... يكفي إضافة السكريبت المذكور مباشرة بعد الكود:

<body>

فايس بوك... لا يعايروك

2009-11-05T00:34:00.000+01:00

كلّمني و طلب منّي بش نمشي معاه، على خاطر جماعة التوبنات بعثولوا ميساج و قالولوا اللي الأنترنت متاعو حاضرة و يلزموا يتصل باللي عمل عندو الاشتراك بش ياخو الماتريال اللازم... و بما انو ما يفهم م الشي شي، كلّمني بش نمشي معاه باش ما يعطيوهوش عدّة مغشوشة.

مشينا للحانوت، و من بعد اتعدّينا للدار ركّبنا العدّة كيف ما يقول هو، خدّمتلو الانترنت، و حليتيو بعض المواقع... همّيت بش نمشي على روحي ياخي

قاللي: تي استنّى، شبيك مزروب

قلتلو: تي خ نمشي بالله.. عندي ألف حاجة و حاجة تستنى فيّ

ابتسم و هو

يقوللي: تي أقعد اقعد، حاجتي بيك تعمللي كونت ايمايل، و تزيد من بعد تحللي كونت ع الفايس بوك.

ع الأقل كيف ظهر يعرف انو الحكاية يلزمها ايمايل، حاجة تبشّر بكل خير...

فيسع ما عملتلو الإيمايل، حليتلو كونت فايس بوك، و زدتلو هاك العفسة متاع الميساج اللي يوصل ع التليفون و فيه الكود متاع الفيريفيكاسيون، قعد يحل ما يغلق باهت في عجب ربي

قلتلو: أيا مرحبي بيك ع الفايس بوك... عوم بحرك!

قعد يغزر للايكرون متاع الاورديناتور... نظرتو كانت تدل انو ماهوش فاهم م الشي حتى شي، قعد شوية مصهمم قبل ما

يقوللي: أي... وينهم العباد!؟!

قلتلو: اناهم عباد؟

قاللي: العباد، اللي في الفايس بوك؟؟

قلتلو: أي... شبيهم؟

قاللي: تي هاو ما ثمة حد

قلتلو: ماك مازلت جديد

قاللي: شبيني نشوف فيهم في الخدمة، تصاور و فيديوات و دولاب قوي، الجماعة تشاتي و تبزنس و تلقاهم النهار و طولو و هوما شايخين بالضحك

قلتلو: أي ماك خاطرك مازلت جديد... تو بالشوية بالشوية تعمل صوحاب و تولّي حتى انتي تشاتي و تباطي

قاللي: اي باهي كيفاش نشوفهم انا توة الجماعة

قلتلو: هاك لوج عليهم... و ابعثلهم قوللهم يزيدوك

غزرلي على فرد جنب، ما كانش يغزرلي و إنما يڤحرلي (بش يكون الوصف أدق) و ظهرت على وجهو ملامح متاع خيبة أمل

قاللي: صارة يلزمني نبعثلهم؟

قلتلو: و يلزمهم يوافقوا زادة... امالا هي مسيبة!

قعد يدوّح في راسو شوية قبل ما يتلفّتلي

يقوللي: اوه على وذني... تي هاي طلعت هدرتو فارغة هـ الفايس بوك

ضحكت... بعد ما فهمتو ش كان ناوي

قلتلو: علاه انتي ش كنت ناوي؟

قاللي: نستخايل اتحل كونت... تولي تشوف العباد الكل

قلتلو: اي انتي مثلا... على شكون اتحب اتنسنس؟

ضحك... و بنبرة كلها مكر و خباثة

قاللي: تي لا... اما ثمة طفلة تخدم معايا في الإدارة، الجماعة النهار الكل و هوما يحكيو كيفاش عاملين عليها جو في الفايس بوك

قلتلو: أي

قاللي: حبيت نستقصي و نعرف فاش قاعدين يعملوا

قلتلو: اعمل كيفهم و ابعثلها ع الفايس بوك

قاللي: ما اتنجّمش هكة تشوفهالي بالسرقة

قلتلو: لاااا... صعيبة شوية راهي الحكاية

كيف فهم انو الحكاية ما ثماش فيها امل... اتلفتلي و بنبرة كلها إحباط
قاللي: تي برّه... كيف قدّر عليّ ربّي، أبعثلها بالله خليها تزيدني

قلتلو: ش اسمها؟

قاللي: سميّة

قلتلو: سمية شنوة؟

قاللي: و انا منين ندري عليها... العباد الكل تعيطلها سمية

قلتلو: أي، و كيفاش بش نطلعها ع الفايس بوك انا

قاللي: و انا منين نعرف عليك... امالا علاه عيطتلك؟

دهشت بالضحك... قبل ما نقوم من بلاصتي وانا

نقوللو: هذي أبعثلها جواب مسوڤر على عنوان الإدارة متاعكم و قوللها تو تزيدك هي ع الفايس بوك متاعها... هكاكة خير.

هههه... مقوى سعدي

2009-10-26T22:03:00.003+01:00

قاعد على روحي، و ينوقز البورطابل... ميساج!

البورطابل عندو مدة أمورو ما تعجبش، كنت اتحدّثت في التدوينة اللي قبل هذي [مقوى... سعدي] ع الميساجات اللي يُقال أنها قاعدة تجي هكاكة وحدها وحدها (و لو انّو ماذا بيّ لو ما تكونش الحكاية بالرسمي هكاكة، هههههه)... زيد ولات فيه فازة ما نحلّو بش نشوف ميساج أو نطلب كونتاكت م الليستة إلا ما الروح متاعي تطلع و انا نحاول اني ننزل ع الفلس بطريقة فيها برشا حكمة بش تجي قد قد، و تخطف.

أيا مازلت نحاول أنّي نشوف من عند شكون الميساج المرة هذي، و إذا بيه يعاود ينوقز مرة اخرى (ميساج آخر)... هو البورطابل داخل بعضو و كمّل زاد دخّلني بعضي انا معاه.

أيا بعد بضع محاولات نجمت نشوف الميساجات نلقاهم ميساجات "بلاش عنوان" جاييني من عند بنت عايلة...

قبل كانوا يجيوني ميساجات "موش كاملين" و ما يتحلّوش جملة واحدة... و من نومرو آخر مش من عند بنت عايلة.

المرة هذي، الميساجات يتحلّو أما فارغين، و العين جات على بنت عايلة... صحيح قعدت متحيّر في الحكاية شنوة يمكن تكون، لكن هذا ما منعنيش من انّي في عز البهتة و الدهشة، لقيت وقت بش نبتسم في قرارة نفسي و أنا

نقول: مقوى سعدي

أيا مازلت هكاكة نكشّخ بيني و بين روحي، و يعاود ينوقز البورطابل مرة اخرى... ميساج!

أي عاد شبيه، حتى هوما ناس بكري

قالوها: كيف تجي تجي مع بعضها...

و زيادة الخير خيرين، و ثلاثة...

حليت نشوف في الميساج الاخراني، ياخي نلقاه كيف كيف من عند بنت عايلة، أما المرة هذي اتحل

و كيف جيت نقرى فيه نلقاها

تقوللي: حتى انا نحب بوست على ميساجاتي

هههههه... ملا عفسة بصراحة، يقوى عليك ربّي يا فاتن

حاضر باش، غالي و الطلب رخيص... و رغم كل شي نقعد شادد صحيح انّي نعاود

نقول: مقوى سعدي

مقوى... سعدي

2009-10-23T05:45:00.001+01:00

الحكاية بدات ليها مدّة قصيرة... قاعد على روحي و إذا بالبورطابل ينوقز، نلقاها باعثتلي ثلاثة ميساجات فرد ضربة...

قلت: مقوى سعدي.

أما المشكل انّي كيف جيت نحل فيهم، ما حبوش يتحلّوا... البورطابل يكتبلي ما معناه انو الميساج ماهوش كامل.

المرة الاولى مشي في بالي انها باعثتلي ميساج بالعربي، ميساج على ماهو طويل، اتقسم على ثلاثة ميساجات... و بما انو البورطابل متاعي ما يستعرفش بالعربي، هذاكة علاش ما نجمتش انحلهم.

رغم اللي هي نورمالومون كيف تجي بش تبعث ميساج، تبعثوا بالفرنسي، او كيف يقدّر عليها ربي باللونڤاج أس م اس –دارجة بحروف لاتينية)... اما قلت بالك تعرفني نحب الكتيبة بالعربي، حبت تاخولي بخاطري.

حتى طلبتها وقتها دزيت فيها نسأل ع الاحوال و "الغيبة"، رغم اللي انا هو اللي نعتبر وقتها غايب... ما جبدتليش ع الميساجات جملة، قلت بالك حاشمة، شكون يعرف عليها، و زيد البنات تو ما يتفهموش.

أما قعدت شايخ ع الفازة أيامات... لين نهار جاني ميساج من نومرو ما نعرفوش، كيف جيت انحل فيه نلقاه كلّو مربعات.

طلبت النومرو، نستفسر... طلع واحد صاحبي و عشيري لينا سنوات ما تقابلناش، أيا بعد السلام و اللازم منو سألتو ع الميساج، قاللي انو بعثو بالعربي هذاكة علاش يمكن ما نجمتش نقراه.

طفيتو صاحبي، و قعد حاير في الحكاية... تي شبيهم ميساجاتها ما اتحلّوش امالا؟
نهارين من زمان و إذا بيه يوصلني من عندها ميساج آخر كيف الأخرين... ما يتحلّش زادة.

ما كسّرتش راسي برشا، ليه ليه ما لقيت الحل، أنو ما تكون كان باعثتلي تصويرة بالـ أم أم أس... و مرة أخرى

قلت: مقوى سعدي

و قعدت الحكاية ملزوم ما تتعاود كل أربعة خمسة ايام، و كل مرة في وقت نوع، مرة وجوه الصباح، مرة عقاب الليل، مرة في العشية... و كنت كل مرة نخلق ظرف نعتقد انها بعثتلي فيه الميساج، و كل مرة جاني فيها ميساج إلا و ميّلت راسي و

قلت: مقوى سعدي

صحيح عمرو ما ميساج فيهم اتحل، اما كيف ما يقولوا الفرنسيس

C'est le geste qui compte

أيا بره قعدنا ع الحالة هذيكة أيامات، لين اتقابلنا مرة... بعد السلام و السؤال ع الحال و الاحوال و شوية حديث

قلتلها: ياخي ما تقولليش شنوة حكاية الميساجات اللي نهار نهارين تبعثلي فيهم.

استغربت

و قالتلي: اما ميساجات؟

اتفجعت أنا زادة

و قلتلها: شنوة اما ميساجات.... الميساجات اللي عندك مدة تبعثلي فيهم

بلعت ريقي قبل ما نكمّل

نقوللها: تي اليوم برك جاني منك ميساج

قالتلي: آه بون... شنوة فيه؟

قلتلها: ما يتحلّش ما فيه حتى شي

قالتلي: بيزار!؟!

قلتلها: هذي تقريبا خامس و إلا هي سادس مرة يجيني فيها من عندك ميساج كيف ما هكاكة

قالتلي: ووه... و الله لا عمري عملتها العملة هذي

يا والله عملة، امالا الميساجات هذوكم شنوة حكايتهم؟

لحد اللحظة هذيكة، كان ماشي في بالي اللي هي اتلّف في الجرة... قلت بالك ماشي في بالها اني نشوف فيهم التصاور (الله اعلم ش فيهم) و نحب نتبولد عليها، ياخي هي طلعت أذكى مني و حبّت اتدز فازتها هي زادة.

ما أمّنت إلا ما جبدت التليفون و وريتها البعض م الميساجات، و اتفجعت هي و اتخلخلت، و دخلت بعضها و خلتني بعضي انا زادة.

و قعدت تسأل ع الفازة شنوة يمكن تكون، و وليت انا نتلّف في الجرة و ناخذلها بخاطرها و نطمّن فيها انو البورطابل متاعي مقربع (كيف مولاه) ساعات يبدى يجيب و يجلّب وحدو...

في آخر محاولة قبل ما نأيّس م الحكاية

قلتلها: مش مقيّد عندك انو بعثتلي ميساج، أس م اس، ام ام اس.. اي حاجة

قالتلي: لا لا، ما ثماش حتى ميساجات مبعوثين ليك

قلتلها: حتى ميساجات؟

قعدت نڤحرلها على فرد جنب و انا ندوّح في راسي، و كنت بيني و بين روحي

نقول: مقوى سعدي

أيا هدات شوية، قبل ما تغزرلي

و تقوللي: أمانك، بربشلي عليها الفازة و شوفلي شنوة الحكاية هذي

و قعدت تقرّق و تعاود تقولشي عليها مسألة حياة أو موت، و في الآخر، و قبل ما نمشي، و بش تزيد تاكّد في الإلحاح متاعها اتلفتتلي

و قالتلي: ما تنساش عاد بربّي... يقوّي سعدك

ههههه، أكثر من هكة... يولّي عدم!

من فضلك... سامحني

2009-10-16T02:04:00.003+01:00

عدّاتلي أيامات سلاطة... يوميا مع الأربعة و إلا هي الخمسة متاع الصباح تطلبني م الفيكس، نفيق ع التنوقيزة متاع البورطابل، من غير ما نثبّت في النومرو

نقوللها: آلــوو

تضحك بالقوي و هي

تقوللي: أهلا بالضايع... ياخي مازلت راقد؟

نقوللها: ياخي هو اللي يعرفك، مازال يجيه النوم!

تزيد تعاود تضحك... و تعلّق عليّ... نعاود نرجع نرقد م الاول و جديد
عدّاتهولي قريب النصف شهر... لين ولّيت معدّل ع الابال متاعها، ساعات نفيق من قبل ما تنوقزلي جملة واحدة.

و قصت فرد ضربة... لول مرة قلت لعلّ ربي هداها و حشمت على روحها
حتى طلبتها عامل فيها نسأل على احوالها و امورها، قلت تو تنطق وحدها وحدها... شي، و الحق متاع ربي حشمت أنّي نسألها.

إلا انها قعدتلي كيف الدودة تلعبلي في مخّي... هكاكة لا طاح لا دزّوه تعدّيلي جمعتين سلاطة النوم ما نعرفوش، و كيف استحليت الحكاية و خذيت ع الريتم تقص عليّ فرد ضربة.

قلت ناخو بثاري... ولّيت كل ليلة نعمّر البورطابل الأربعة و نصف متاع الصباح... نفيق، انوقزلها ع الفيكس، اوّل ما تتهز السماعة انعلّق.
و نقعد شايخ عليها بالضحك و انا نستخايل في الموقف.

حتى طلبتها مرة في العشية كيف ما العادة عامل فيها نسأل ع الأحوال، ما جبدتش جملة ع الحكاية... حسّيت انها عاملة بالمستعني، ما جبدتلهاش عليها انا زادة.

عدّيتها قريب النصف شهر انا زادة، على نفس المعد... لا كلّيت و لا ملّيت، لين بديت انفد

قررت انو المرة الجاية بش انكلّمها كيف تهز السماعة.

كيف ما العادة، في الليلة الموعودة، الأربعة و نصف متاع الصباح تنوقز الفياقة متاع البورطابل، نفيق

التليفون ينوقز... التنوقيزة الاولى، الثانية، الثالثة، الرابعة...

التليفون: ألووو

صوت راجل... صوت غليظ، كيف ما يقولوا أجش، و باين عليه الغش و التنرفيز
ما لقيت ما نقول، قعدت نخمم زعمة شكون يطلع السيد، بوها، خوها...

تطلعشي عرست زادة؟

استجمعت شوية الشجاعة اللي يمكنلي بش نلقاهو في الوقت هذاكة و الموقف هذاكة... خذيت نفس طويل

قلتلو: بالله شكون معايا خويا؟

بنفس النبرة متاعو

قاللي: بالله طالبني وجوه الصباح بش تسألني انا شكون؟

قعدت ساكت، ما لقيت ما نقول زادة... حتى هو قعد ساكت، يظهرلي يستنى فيّ بش نتكلم، وقت اللي فهم اللي أنا ما عندي ما نقوللو

قاللي: انتي اللي طالب خويا راهو... اتفضّل، ش تحب؟

ابتسمت، من غير ما نضحكلو أو نخليه يفهم اللي انا قاعد نضحك

قلتلو: سامحني بالله، موش انتي... هي

ضحك، ضحكة المغلوب على امرو

قاللي: هكة تو... صوتي انا ينجم يكون صوتها هي؟

قلتلو: غريبة و الله... هذايا نومروها

جاوبني، و باين عليه انو اتفرهد نوعا ما

قاللي: نومرو شكون...خويا انا الكاري الجديد راهو.

آهــه، صارة هي بدلت الكرية، و شبيها ما تقولش... هههههه، ملا حشومة مع الراجل.

قلتلو: معنتها انا المدة الفايتة الكل، قاعد نطلب فيك انتي؟

قاللي: أي نعم... كل ليلة اتطيرلي النوم و عمري ما نعاود نرجع نرقد، بش يكون في علمك.

مرة اخرى نلقى روحي ما عندي ما نقول... إلا اني ما لقيت غير أني نجاوبو و بكل وقاحة

نقوللو: سامحني خويا

يقوللي: بالله هكة... تعمل عملتك، و في الآخر ما تخسر عليّ كان كلمة سامحني

قلتلو: ش تحب نعمللك... شنوة الشي اللي يرضّيك؟

المرة هذي هو اللي ما لفي ما يقول، غير انّو ياخو نفس طويل و يرجعو الكلو في السماعة متاع التليفون بقوة

يقوللي: بره خويا... بصحتك

قلتلو: الله غالب خويا

و علّقت التليفون... و كانت هذيكة آخر مرة نكلمو فيها، و حتى هي ما عاودتش كلمتها من وقتها.

حتى انها كانت آخر مرة البورطابل متاعي ينوقز في الوقت هذاكة، سواء مكالمة و إلا فيّاقة

لوڤو... لن ننسى 1 اكتوبر

2009-10-01T23:10:00.009+01:00

في ذكرى العدوان الإسرائيلي على تونس و قصفها لمدينة حمام الشط يوم الإثنين 01 أكتوبر 2009 وين اتخلطت دماء الشهداء الفلسطينيين و التونسيين اللي بلغ عددهم ستين و أكثر من مياة جريح.

و إحياء لهذه الذكرى و حتى يعلم من يريد أن يعلم أننا لم و لن ننسى ما حدث و ما يحدث.

לעולם לא
we will never

לשכוח
forget

لمن يرغب في إضافة الشعار للمدونة متاعو

 <a href="http://tkharbich.blogspot.com/2009/09/blog-post_1.html">
<img src="http://i38.tinypic.com/28qcuw.jpg"/>
</a>

لوڤو... حداد، على ضحايا الفيضانات

2009-09-25T03:00:00.010+01:00

حدادا على ضحايا الفيضانات التي تشهدها عديد مناطق الجمهورية...

وقفة تضامنية، مع عائلات و اهالي الضحايا... و احتراما لمشاعرهم، تقرر أن يكون يوما الخميس 24 و الجمعة 25 سبتمبر 2009 حدادا على مستوى الفضاءات الإفتراضية التونسية.

Journée de deuil et de solidarité
avec les habitants de Rdeyef

لمن يرغب في الإطلاع على مزيد من المعلومات، يمكن زيارة مجموعة الفايس بوك المعدة للغرض (هنا)...

لكل من يرغب في إضافة هذا الشعار للمدونة متاعو

 <a style="display:scroll; position:fixed;
top:0px; left:0px;" title="حداد.. على ضحايا الفيضانات"
href="http://tkharbich.blogspot.com/2009/09/blog-post_25.html">
<img src="http://i38.tinypic.com/1zvrdbr.jpg"/>
</a>

ملاحظة: بالنسبة لبقية المدونات التي تم إنشاؤها على خدمات استضافة اخرى (كيف الووردبرس، مكتوب مثلا، أو المدونات اللي عندهم اسم نطاق خاص، و مواقع الانترنت الأخرى)... يكفي إضافة السكريبت المذكور مباشرة بعد الكود:

<body>

في الصفحة الخاصة بمنظر المدونة (فقط لمن لديهم فكرة عن برمجة الـ HTML.. و البرباش غير مسؤول عن أي تبلبيزة يمكن تحصل.)

لوڤو... المرصد الافتراضي للإنتخابات

2009-09-18T14:44:00.008+01:00

في تواصل مع هاته التدوينة (هنا)... و لمن يرغب في الإطلاع على مزيد من المعلومات، يمكن زيارة مجموعة الفايس بوك المعدة للغرض (هنا)... و كذلك موقع الحملة (هنا)

صديقي المدون.

يسعدنا لو كان تشارك معانا في حملة تدوينية جديدة سميناها "المرصد الإفتراضي للإنتخابات"

الفكرة ساهلة ياسر، ابتداء من عشرين سبتمبر، إذا كان توافق تشارك معانا في هالحملة، مطلوب منك تنشر مواضيع تخص الإنتخابات التونسية. تعليق على خبر قريتو، رايك بعد اجتماع حضرتلو، تعليقك على مقال والا برنامج تلفزي... إللي هو ! المهم مواضيع تخص الإنتخابات... والأهم من هكة، تعليقك على مختلف البرامج الإنتخابية متع الأحزاب المشاركة في الإنتخابات.

من 11 إلى 23 أكتوبر باش تصير الحملة الإنتخابية في تونس. المقالات اللي تكتبها في الفترة هاذيكة تنجم تتناول بالتحليل والتعليق رؤيتك لمشاركة الأطياف السياسية للحملة، مدى ظهور المعارضة في التلفزة والجرايد ... إلخ.

مطلوب منك زادة، إذا كانت عندك الرغبة، تحكيلنا بالتفصيل كيفاش مشيت تنتخب نهارة إلإنتخابات (إذا كان مشيت). فماش حاجة لاحظتها واستغربت منها، كيفاش تم استقبالك، كيفاش انتخبت، آش قالولك... إذا كانك عندك صيفة مراقب وإلا شاركت في الفرز، يهمنا ياسر تحكيلنا كيفاش عشت النهار هاذاكة، آش شفت بالضبط، وآش عملت...

الهدف متاع الحملة ماعندو حتى علاقة بالسياسة، الناس اللي باش تشارك فيها تنجم تكون معارضة، مع السلطة، بلاش راي، ضد الإنتخاب أصلا...إلخ. نطلبو منك، إذا كان تحب تشارك، تحكي الأحداث كما هي، بلا زيادة ولا نقصان، اللي صار صار...

حاجتين باش يجمعونا في هالفترة هاذي :

ـ حبنا لتونس
ـ رغبتنا باش نكونو شاهدين عالعصر وعلى الحدث هاذا بالذات

مافمة حتى صنصرة على الأفكار السياسية اللي ممكن تعبر عليها في مقالاتك. "المرصد الإفتراضي للإنتخابات" ماهواش جمعية، ماهواش حزب، ماهواش منظمة من أي نوع كان. نحن تجمع متع مواطنين توانسة، أكهو.

كيف تحط اللوغو متع الحملة يعني أنك توافق عاللي قريتو تو في التدوينة هاذي، واللي هو ننجمو نعملوه ميثاق للناس اللي مشاركين في الحملة هاذي.

ملاحظة : المشاركة تنجم تكون بالعربي، بالدارجة... وإلا باللي تحب ! وتنجم تكون في شكل صور

لكل من يرغب في إضافة الشعار للمدونة متاعو

 <a href="http://tkharbich.blogspot.com/2009/09/blog-post_18.html">
<img src="http://i27.tinypic.com/2n1w2kk.jpg"/>
</a>

Mise a jour:

une copie francisée du logo de l'observatoire virtuel des élections:

Pour ceux qui veulent ajouter le logo à leurs blogs:

 <a href="http://tkharbich.blogspot.com/2009/09/blog-post_18.html">
<img src="http://i37.tinypic.com/21b5do6.jpg"/>
</a>

فتيات... في البلوغسفير

2009-09-02T03:54:00.002+01:00

هاك العام، وقت ما الڤمودي خذالنا أول ميدالية ذهبية تونسية في الألعاب الأولمبية المانيا 1968...

أول ما هبط م الطيارة

قاللهم: نايا نوّرت وجه تونس بكرعيّ

و اليوم، نلقاو عندنا مدونة (بلوڤيرة) اللي هي لينا بن مهني، متحصلة زادة هي على ميدالية فضية في بطولة العالم لرياضة المنتفعين بزرع الأعضاء في أستراليا 2009

زعمة موش من حقنا (كمدونين) نفتخروا بكون لينا مدونة تونسية

و نقولوا: راهي لينا نورت البلوغسفير بكرعيها.

 برافو لينا... و إن شاء الله من حسن إلى أحسن

لوڤو... لا للكلام الزايد

2009-08-28T18:15:00.008+01:00

في تواصل مع هاته التدوينة (هنا)... و دون سعي للترويج او التحضير لحملة ما رغم مساندتي ليها

لكن، لمن يرغب في إضافة الشعار للمدونة متاعو

 <a href="http://tkharbich.blogspot.com/2009/08/blog-post_28.html">
<img src="http://i27.tinypic.com/2vwio8l.jpg"/>
</a>

التصويت... في تن-بلوڤ / جزء سادس

2009-08-25T23:06:00.007+01:00

الأكيد انو العباد الكل (مدونين و قراء) تبعت المرة هذي الراغلة اللي صارت ع التصويت في مجمع المدونات التونسية تن-بلوﭪ.

حتى العباد اللي طفّات الضو المرة اللي فاتت (هنا) و عملت (وذن من طين و وذن من عجين) روحها لا رات لا سمعت، البعض منهم أبدى تحمسو المرة هذي و بدي يحكي و ينبّر و يعلّق.

موقف لا يمكن تفسيرو إلا بازدواجية المعايير في تقييم المشاكل التدوينية، الشيء اللي يعكس الانقسامات الصايرة في وسط المجتمع الإفتراضي الصغير هذا، اللي مازال البعض يصر انو يمثل انموذج هايل للشارع التونسي.

كنت اتعرّضت انا بيدي في فترة سابقة لحادثة مشابهة من انتحال الشخصية في التصويت، و خيّرت عدم نشر الموضوع بش ما تتكاثرش الحكاية و اتصلت بحسين و اعلمتو بالموضوع و اتدخل مشكورا و تم فض المشكل.

فقط للتذكير انو البسودو اللي نصوّت بيه هو

- barbach: votes (ici) - profil (ici) - email (barbach78@gmail.com)

و موش البسودو هذا (اللي تم حذفو حاليا)

- barbech: votes (ici) - profil (ici) - email (barbech@gmail.com)

كنت سابقا اتصلت بحسين (هنا) زادة وقت ما اتحدّثت ع التصويت في تن-بلوﭪ في فترة سابقة و اتحدّثت ع الإستغلال الممنهج اللي يستعمل فيه عاشور لعملية التصويت و المصوتين الوهميين، إلا انو تعلل بانشغالو و عدم توفر الوقت الكافي ليه للنظر في المسألة.

تعليل فسرو البعض بسعي حسين انو يكون على حياد، و له الحق في ذلك باعتبار انو تعامل حسين مع التن-بلوﭪ كصاحب موقع يختلف عن نظرتنا ليه كمجرد مدونين دورنا فقط هو تنشيطو.

نرجع لحكاية التصويت اللي صارت المدة هذي... حيث سارع حسين و على غير ما صار المرة الفايتة بكتابة تدوينة في الغرض (هنا) معلنا القضاء على جميع حسابات المدونين الوهميين (و غلق باب الإشتراكات للمصوتين الجدد في انتظار الصيغة الجديدة اللي بش يكون عليها الأمر)، منبّها انو الاي بي ما يكذبش (نتذكر المدونة يسر كانت حكاتلنا قبل وقت ما تمت استضافتها على مدونة الرديون ع النقطة هذي اللي كشفت تلاعب في التصويت على احسن مدونة تونسية لسنة 2007... و للتذكير مسابقة 2008 ما تمتش، و يا ذنوبي كان بش تكون ثمة مسابقة لسنة 2009 هههههه)، كأنو يحمل في طياتو نبرة متاع تهديد، في حكاية باين بالكاشف انها متاع دزان بيدق و تفوريخ و إدخال بلبلة ليس إلا... نبرة ما ريناهاش مع اللي تلاعبوا بالتصويت في وقت سابق و كانت ليهم أغراض، أجمع معظم المعلقين (هنا) و (هنا) على دناءتها

و تنجموا تلاحظوا عبر الروابط هذي كيفاش أنو البعض م المدونين الوهميين تم حذف حسابانهم و بالتالي لا تحتوي على أي تدوينة تم التصويت لها.

- MeTaLLisTiCaTiOnZ: votes (ici) - profil (ici)

- titou: votes (ici) - profil (ici)

- antijboura: votes (ici) - profil (ici)

و عاودت اتصلت بحسين، عبر الكومنتار اللي خليتهولو في مدونتو (هنا)، و كذلك عبر التويتر (هنا) و (هنا)... نذكرو بالحكاية القديمة اللي صارت ع التصويت (مع الإشارة للرابط هذا طبعا)، و نطلب منو بما انو عندو الوقت (المرة هذي)... يتدخل.

و جاوبني (مشكورا)، عبر التويتر (هنا) ليؤكد (وحدو وحدو من غير ما اجبرو حد او لزّم عليه) انو تم بالفعل حذف جميع المصوتين اللي كنت أشرتلهم في تدوينتي

يقول القايل ع الأقل البلبلة هذي كان ليها أثر إيجابي و بلوغة اخرى أعطات أكلها، وخلات حسين بعد قرابة الخمسة أشهر يتفاضى و يلقى الوقت و يتدخل، و يظهّر انو بالحق محايد (و لو موش برشا، اما خير من بلاش).

لكن و للاسف، ردو كان مجرد كلام في كلام... ذر رماد في العيون كيف ما يقولوا، لأنو المصوتين إياهم و لحد الساعة مازالوا موجودين... اتنجموا تطلعوا ع البروفيلات متاعهم عبر هذه الروابط

- fawzibenyahmed: votes (ici) - profil (ici) - email (f@gmail.com)

- haffs: votes (ici) - profil (ici) - email (h@gmail.com)

- ouness: votes (ici) - profil (ici) - email (o@yh.net)

- hajri: votes (ici) - profil (ici) - email (h@gmail.coml)

- wannable: votes (ici) - profil (ici) - email (ww@yy.tt)

فيهم حتى اليوم الصباح (الثلاثاء 25 اوت 2009) قام بالتصويت (هنا)، بينما ادّعى حسين في الليلة اللي قبل أنو قام بفسخ جميع تلك الحسابات الوهمية...

حتى كيف عاودت راسلتو عبر التويتر مرة اخرى (هنا)... طفّاني و ما جاوبنيش...

الشي اللي و للأسف، إن لم يكن عن سهو... كيف نظيفولو رفض حسين سابقا إنضمام تيتوف (بمدونتو القديمة حماس) و البعض الآخر م المدونات ذات الصبغة الدينية و عدم قيامو بذلك إلا بعد تدخل من طارق الكحلاوي... يعكس عدم الحياد الواضح متاع حسين.

قد يطالب البعض حسين بالكشف عن المسؤول ع العملة هذي و شخصيتو (الإفتراضية طبعا، و علاش لا الإي بي متاعو، لعل تصير متابعة قضائية، حاجة ماهيش غريبة ع البلوغسفير و سبقلنا باش سمعنا بتهديدات م النوع هذا بين المدونين)

و بالتالي لو كان الشخص هذا مدوّن فيجب و بدون ادنى تردد حذف مدونتو من قائمة تن-بلوﭪ... لكن في المقابل يحقلي أيضا كمدون أنا (على أساس أنّي مازلت مدون و مدوناتي مدرجة في تن-بلوﭪ... هذا لو قعدت، هههههه) و زادة البعض م المدونين اللي علقوا ع التدوينات السابقة متاع التصويت (هنا) و (هنا) انو تكون المعاملة بالمثل، و يتم شطب مدونة عاشور الناجي (خواطر مسلم سابق) م المجمع هذا...

ملاحظة أخرى: للي يطالبوا بحذف التصويت من تن-بلوﭪ... فقط رأي شخصي، نرى أنو التصويت هو الميزة الوحيدة اللي تخلي تن-بلوﭪ متفوق (من ناحية الإقبال) على بقية المجمعات التدوينية الموجودة على الساحة و هي تونيبلوغز (هنا)، تحت السور (هنا)، تن بلا-نت (هنا) و حتى بربروس في فترة ما (هنا) و خاصة تونيسفير (هنا).

أنا واحد م الناس، الرابط الوحيد اللي قعد يربطني بالتن-بلوﭪ هو عملية التصويت، رغم اللي ما عادش نصوّت من شهر و نصف تقريبا إلا في بعض المرات القليلة اللي نظن عددها ما يتجاوزش عدد أصابع اليد الواحدة (لكن الدودة متاع التنسنيس)... خاصة بوجود خدمة كيف اللي يوفرها مجمع تونيسفير عبر التويتر

إضافة للميزات اللي يوفرها التويتر في حد ذاتو (و خاصة خدمةالار اس اس هنا)...

و الاكيد زادة انو حسين اكثر واحد مقتنع بأهمية التصويت و إلا ما كانش يزيد هاك الحملة الإشهارية اللي نلقاوها في الصفحة اللي نحبوا من خلالها نطلعوا على اللي قاموا بالتصويت على أي تدوينة.

ثمة زادة شكون يقترح انو كيف ما يصير التدوين بالإيجاب، علاش لا يصير تدوين سلبي، يعني تولي الحكاية أزرق و احمر، شكون عجبتو المدونة و شكون ما عجبتوش... هكاكة نوليو في عوض نعانيو من زوز "معسكرات" متاع مدونين، يولّي كل واحد يحارب على روحو، و ذراعك يا علاّف

سؤال... في غير محلّو

2009-08-23T18:39:00.003+01:00

مع أول نهار في رمضان... نلقى الفاتورة متاع الضو تحت الباب.

مع أنّي مازلت كيف خلّصت الفاتورة اللي قبل منها، و في وقتها... إلا اني ما استغربتش، الأيام تجري كيف الريح في البريمة.

نفس القيمة تقريبا اللي متعود ندفعها كل مرة.

و نفس السؤال زادة اللي نتساءلو كل مرة:

علادش ديمة يحطّولي اللي انا عندي دين غير مسدّد؟

رغم اللي انا اموري الكلها خالصة معاهم... و ما نتفكّرش مرة مشيت بش نخلّص و طلعوا فلوسي ناقصين قالولي خلّي تو نزيدوهملك ع الفاتورة الجاية!؟!

علاش حتى و أنا خالص معاهم... يقيدوني مُسال؟

أحنا... و هوما/ الياغرت

2009-08-19T23:20:00.005+01:00

دخلت للدار محمّل مزمّل (كيف ما تشتهي الوالدة تشوفني)... اتعدّيت قدّام البونبري نلقاها متفاضية، على غير ما جرات بيه العادة في مثل الايامات هذي اللي تسبق رمضان، عاد ولّيت اغتنمت الفرصة و شريت باللي عندي الكل ياغرت.

داخل نزمل فيهم هاك الزوز ساشيات، و كل عباية بالطبيعة يلزم نحطها في زوز ساشيات... زعمة زعمة خايف لا تتقطّع الساشي في الثنية و هي الهدرة و ما فيها أنهم يصلحوا للزبلة.

دخلت نلقى رؤى بنت اختي تلعب في الصالة دوب ما شافتني جاتني تجري، و عينيها مرشوقين في هاك الساشيات تنسنس ش فيهم

قالتلي: خالي حمة... شنوّة جبتلي؟

قلتلها: جبتلك برشا حاجات

دخلت للكوجينة، و هي بالطبيعة في جرتي... حطيت الساشيات ع الكونتوار

قلتلها: تحبشي... كعبة ياغرت

قالتلي: أي

جبدت كعبة ياغرت، و مديتهالها...

غزرتلها على فرد جنب، من غير حتى ما تمد يدها بش تاخوها من عندي

قالتلي: شنوة هذيكة؟

قلتلها: ياغرطة... زعمة شنوة؟

قالتلي: أنا ما ناكلوش هذاكة!

قلتلها: امالا ش تاكل بالله؟

قالتلي: ما عندكش دانات و إلا داناب؟

الدانات نعرفها...

أما الاخرى اللي قالتلي عليها اول مرة نسمع بيها

قلتلها: شنوة الاخرى.. داناب؟

قالتلي: اي، هذيكة هاك اللي نخضّوها و بعداش نشربوها

و ابتسمت شوية قبل ما تدوّح راها و تخرّج لسانها من فمها و تبتسملي و هي

تقول: امممممم... ما بنها!

عرفتها ش تقصد، لكنها كانت مناسبة بش نعرف الإسم...غزرت للكعبة ياغرت اللي في يدّي نلقاها محطوط عليها اللوغو متاع الدانون

قلتلها: تي هاي هذي دانون زادة

من غير ما تجي و تثبّت...

قالتلي: تي لا، نحكي ع الدانات

سكتت شوية قبل ما تكمّل

تقوللي: هاك الياغرت اللي تلقاه بالشلاطة و إلا بالبوفريوه

قلتلها: آاااه، لا لا... اللي عندي الكلو ياغرت نورمال... أبيض

اتنهدت، و بانت على وجهها علامات اشمئزاز أقرب ما تكون إلى التقزز، و بنبرة كلها حسرة

قالتلي: ما نحبّوش هذاكة... ماسط.

شوف يا سيدي صغار تو ش يطلع منهم... في عمرها، نعرف اليوغرت نوعين، الناتيرال (الطبيعي) و البانان (الموز)، و إلا هي فانيليا، و الله ما تعرف عليها، كل مرة يحطوا تصويرة متاع حاجة، و ذوق تو تعرف... هو مهما يكون المطعم، القروصية اللي فيه بش تخليه يفقد النكهة متاعو.

الياغرت شكلاطة كنت ما نعرفوا كان في رمضان... و يلزمني نقعد عاقل و رايض و إلا ترصيلي في كعبة ياغرت نورمال.

أيا... رمضانكم مبروك.

أحنا... و هوما/ البوسطة

2009-08-14T19:01:00.002+01:00

أستاذ إيطالية احتاج أنّو يجيب بعض الاوراق م البوسطة بش يعلّم التلامذة متاعو كيفاش يعمروا الفورميلار متاع بعض المعاملات الإدارية... رغم أنهم الاوراق متاع البوسطة متاعنا تلقاهم بالعربي و الفرنسي، إلا انو بينو و بين روحو

قال: مايسالش... خير من بلاش.

أيّا مشي للبوسطة، و شد الصف (اللي بزهرو ما كانش طويل) لين ووصللو الدور.

توجّه للسيدة اللي شادة وراء الكونتوار، طبّس راسو و ثنى رقبتو بش صوتو ينجّم يتعدّى م الفجوة اللي بين رخامة الكونتوار و البلاّرة و بكل أدب و فيناس

قاللها: مرحبا... بالله

جاوبتو بنبرة مزروبة متاع ما تعطّلنيش يرحم بوك

قالتلو: هات هات

قاللها: لاااا... انا راهو جيت نحب ناخو الفورميلار اللي عندكم

قالتلو: علاه؟

قاللها: أنا أستاذ، و نقرّي في اللغة الإيطالية... و نحب ناخو الفورميلار اللي عندكم بش نقرّي بيهم

قالتلو: آااااه... تي ماو قول هكاكة م الاول

و جبدت طيشتلو ورقة متاع جواب مسوڤر و ورقة متاع حوالة بريدية ع الكونتوار

قالتلو: اهوكة... هذوكم الاوراق اللي عندنا

حب يزيد يستفسر منها إذا ثمة اوراق اخرين، كيفاش يتعمروا الأوراق... اي حاجة او معلومة يمكنلها تصلحلو إلا انها ما خلاتلوش النفس

قالتلو: قول للتلامذة يجوا يبعثوا جوابات... تو يتعلموا كيفاش يعمروهم الاوراق ع البلاصة خيرللهم... و أرتحلك.

عرف انو زايد الحديث معاها... بالسيف واحد مواطن عمل عليه مزيّة و نعتو ع السبورة المعلقة في بهو البوسطة و قاللو أنو ينجّم يلقى عليها كيفاش يعمّر الفورميلار بش يبعث ماندة بألفين فرنك للحرس (متاع البطاقة عدد3).

نفس الأستاذ... اتصل بصديق ليه طلياني من أيام الدراسة و طلب منو انو كيف يجي جاي لتونس يجيبلو الأوراق متاع البوسطة اللي عندهم.

الطلياني ما كانش م العاكسين، توجّه لأقرب بوسطة ليه و اتجه للعون اللي لقاه واقف عند الباب، و سألوا ع الاوراق و كيفاش ياخذهم و كيفاش يتعمروا...

العون كيف لقاها الحكاية طويلة و داخلة فيها تونس و إيطاليا، خاف لا يبلبزها، هزّو للبيرو متاع المدير اللي فرح بيه و استفسر ع العلّة و بنتها منها

سألو: و قدّاش عندو من تلميذ في القسم صاحبك الأستاذ التونسي؟

الطلياني ما عرفش يجاوب، يجبد التليفون و يطلب صاحبو الأستاذ التونسي و يقعد يستنى لين يهز عليه

الطلياني: برونتو

التليفون: ...

الطلياني: (بالإيطالية) قدّاش عندك من تلميذ في القسم؟

التليفون: ... ... ...

...

أيا علّق عليه و قال للمدير متاع البوسطة انو القسم تلقى فيه م العشرين للأربعين تلميذ (كل عام و قسمو، على خاطرها مادة اختيارية)...

السيّد المدير مد للكلياني قرابة العشرين فورميلار... و من كل فورميلار أربعين نسخة، بش كل تلميذ يتبّع الأستاذ بورقتو و يتعلملهم لغتهم على قاعدة صحيحة.

و الاكثر من هكة، كيف عرف أنهم الأوراق بش يوصلوا في الصيف، اتكفّل بأنو يتم إرسالهم بالبريد السريع (متاع إيطاليا) على نفقة البوسطة الإيطالية...

تبحيرة... نهار الإربعاء

2009-08-12T14:31:00.000+01:00

نتذكّر و انا صغير، عمري أربعة سنين (مازلت نقرى في الكتّاب، كنت اتحدّثت قبل علة ذكرياتي متاع الكتاب في تدوينة [ذكريات... أيام زمان])... الوالد بحكم خدمتو كان ما ينجّم يهزنا للبحر كان كل أحد و اربعاء... نهار الأحد نعديوه من صبحو لظلامو، و نهار الإربعاء مشية خفافي في القايلة متاع أعمل غطسة و روّح.

أيا علاش موش مرة. كيف ما اليوم هكة، نهار اربعاء... أنا قاعد نحضّر في روحي للتبحيرة و نتفقّد في الشمبرار و الكتافات اللي يتنفخوا بالهواء و السطل و ما تابعو من ماعون بش نقعد نلعب بالرمل... رغم انها الحكاية الكلها في قلب بعضها ما تتعدّاش الساعة اللي بش نقعدوها ع الشط... اما يلزمني كيف نمشي لغادي نهز معايا اللازم الكل.

عاد انا هكاكة زايط و جايب ما عندي، و خالة بابا تقول صب الزيت... مرى عزوزة اسمها تركية، ماركة عند الفطور تقول صب الزيت، منها تفطر و منها تتفقد الاحوال و تقيّل بحذى ولد أختها اللي هو محسوب في مقام ولدها... و عقاب العشية تروّح على روحها

بديت نشم فيها قارصة... حتى م الدار كانوا خايضين يحضروا في أرواحهم، ركحوا و قعدوا... و بديت نحس أنو المشية للبحر بش تبطل.

هو الرسمي، اللي مقلقني موش مشية البحر... و إنما الحكاية و ما فيها أنّي كنت نفتي بالتعب متاع البحر، و نقعد نتمرخى ما ندوّش كان ىخر واحد، بش العشية ما نمشيش للكتّاب... يعني كيف بش تبطل التبحيرة، بش ترصيلي عشية مقودة في الكتّاب

جاتني الوالدة، على وجهها ابتسامة مصفارة (اكيد تتخيّل في  الحالة النفسية اللي انا فيها وقتها)

قالتلي: أيا برباش... ايجى سلّم على خالتك تركية.

من غير ما نشعر، و بالإندفاع متاع براءة الطفولة... و من غير حتى نبرة يمكن أنو نعبّر بيها كيفاش حكيت وقتها، مشيت لخالتي تركية

قلتلها: أووووه... خالتي فرطيّة

و من غير ما نستنّاها لين تشدني و تبوسني هاك البوستين كمّلت

قلتلها: ياخي ما لقيت تجي كان تو بالله.

ما نتذكّرش مليح آش صار وقتها بالضبط من ردود فعل سواء متاع خالتي تركية او بقية أفراد العايلة... لكن اللي نتفكرو أني نهارتها ما مشيتش للكتّاب، على خاطرني كليت طريحة اللي هي.

و اللي نتذكرو مليح زادة انو كمالة الصيف هذاكة ما عاودناش مشينا حتى مرة للبحر بالإربعاء.

الحاجة... أم الإختراع

2009-08-10T17:38:00.006+01:00

طيّش البورطابل ع الطاولة و قعد يعيّط بنبرة كلها غش و تنرفيز و هو

يقول: يا و الله احوال، لا تليفون يطلب لا انترنت تمشي

غزرتلو على فرد جنب و بكل برودة دم

قالتلو: شبيك... ش ثمة؟

قاللها: الكلهم كيف بعضهم، لا تيليكوم لا تونيزيانا... ما عندك في الهم ما تختار

بإشارة بيدها (كيف اللي يعطيك دودة) مصحوبة بابتسامة خفيفة

قالتلو: هاو بش تجي فرانس تيليكوم، تو تكسرلهم كرايمهم... و تورّيهم كيفاش قاعدين يتمنيكوا ع الخلق

استغرب، و قعد يهز فيها و يحط قبل ما يسألها بنبرة كلها استغراب

و يقوللها: آه بون... فرانس تيليكوم بش تحل في تونس؟

جاوبتو: اي نعم... ماهم بش يدخلولنا أوبيراتور ثالث، أما هذا عاد يخدم كل شي، فيكس و بروطابل...

ابتسم، كدليل ع الفرحة متاعو

و قاللها: على بعضو... حشلو يعلف

منها قعد يخمم شوية قبل ما يتساءل بينو و بين روحو و بنبرة كلها حيرة

قاللها: اممممم، تروازيام أوبيراتو امالا!

قالتلو: ايـــه

قاللها: على حساب هكة... يلزمهم يخترعولنا بورطابل يهز trois puces

بالطاقة... الشمسية

2009-08-04T22:13:00.003+01:00

همز الشوفير من كتفو و

قاللو: رد بالك، في الدّورة ثمة ستة بوتوات... سايس روحك لا ترصيلك داخل فيهم

جاوبو: أوكي

وصلوا حذى البوتوات، ثمة بهرة خفيفة متاع ضو في السماء الفوق

اتلفّت الشوفير للي راكب مع جنبو و

سألو: علاه عاملينهم البوتوات هاذم؟

جاوبو: بش يركحوا عليهم الامبوبات

شي، ما اقتنعش بالإجابة، زاد

سألو: أي، و الامبوبات علاش حاطينهم

جاوبو: بش العباد ما تسطعش في البوتوات

باقي شي، اللي راكب من تالي (اللي تكلّم اول واحد)

قاللو: حتى شي يا خويا... يجربوا في الطاقة الشمسية

علاقة... عابرة

2009-07-31T18:58:00.006+01:00

شدتلو يدو بطريقة خلات الصوابع تتشابك بين بعضها، و كملت اتكات براسها على كتفو... و اتنهدت

قالتلو: عزيزي... ش قولك كان نحطوا أرواحنا أون كوبل مع بعضنا ع الفايس بوك

اتنفض المسكين م الفجعة، كيف اللي ضربو الكورون... اتحلست يديهم من بعضهم في الأثناء

قاللها: ش من فايس بوك... آش مدخّل الفايس بوك في حكايتنا؟

قالتلو: وووه... شنوة آش مدخلو زادة، تطلعشي قاعد تلعب بيّ

اتلحلح في قعدتو و تبدلت نبرتو بحيث أصبحت تكتسي شوية رصانة و تلفتلها بش يقعد يغزرلها في عينيها و عاود شدّلها يدها (من غير ما تتشابك الصوابع المرة هذي)

قاللها: لا لا... مانيش قاعد نلعب بيك... أما الفايس بوك... بصراحة

و سكت شوية كيف اللي يخمم ش بش يقول و بنبرة تدل على تردد شديد استطرد بإشارة رفض و تدارك براسو و

قاللها: بجاه ربي خلينا رايضين!

اتلحلحت زادة هي في قعدتها... جبدت يدها من بين يديه، و بصوت خافت (على خاطرها ما تحبّش تسمّع البقية ما قاعد يدور بيناتهم من حديث) و بنبرة كلها حزم و شدة تحمل في طياتها بعض التهديد

قالتلو: اسمع... هذي هي الفاصلة، اللي لا اتحلّت لا اتربطت بعدها

و سكتت شوية ما يكفي بش نجمت تبلع ريقها و تغزرلو بين عينيه بطريقة مباشرة بش تبيّنلو كيفاش أنها تحكي بجدها و ماهيش تفذلك... و زادت قامت حواجبها بطريقة خلات عينيها تزرڤ (تطلع على برّه) و بإشارة نفي بيدها المسيبة (اللي ماهوش شاددها)

تقوللو: يا نحطّو بعضنا أون كوبل ع الفايس بوك... يا إما كل حد يمشي على روحو يا ولد الناس.

اتنهّد، و كمّل جبد يدّو اللي كانت شادتلها يدها، و بإيماءة براسو تدل على رفضو للمقترح متاعها

قاللها: هذا آخر كلام عندك... يا بنت الناس؟

اتقعدت م البنك اللي كانوا قاعدين عليه، في نفس الوقت اللي كانت

تقوللو: أنا... هذاكة ش عندي

و خلاتو و مشات على روحها... بخطى وئيدة و بطريقة اتعمدت انها تبدو فينو، إلا انها كانت تهدف أنها ما تصدرش أي حس بصبّاطها... لعلّ و عسى تسمع نداء منّو يعلمها بالتراجع متاعو عن قرارو (ماركة ارجع برك و اللي تقول انتي مبروك... ههههه) و يكفكفلها الدمعتين اللي ما نجمتش تمنعهم من انهم يهبطوا

أمّا هو... فقد قرر التزام الصمت، ما نطق بحتى كلمة، قعد يغزرلها كيفاش قاعدة تبتعد بخطى وئيدة، بطيئة جدا لدرجة انو خيّل إليه انها قاعدة واقفة في بلاصتها... كان شالق بيها و بالغزرة متاعها كيفاش تغزر من تحت لتحت تستنى في اي إشارة او حتى همسة منو... و بش يزيد الطين بلّة، قام يديه لفوق بطريقة تتشابك فيها أصابعو وراء رقبتو و قعد يصفّر بفمّو... و كان لسان حالو

يقول: يعجبكشي زادة... اللعب ولّى بالفايس بوك يا بو ڤلب.

طلعت... بنتها

2009-07-28T03:03:00.004+01:00

قصّت عليّ في وسط الحديث، و بنبرة تحمل في طياتها شوية اسف ممزوج ببعض الحيرة، و إلا هي الحشمة (و الله ما نعرف عليها)

قالتلي: إسمع برباش، توتو بربشتلي اللابتوب الآخر، على خاطر ساعات نصبّلها بعض اللعب عليه.

توتو (أو توته كما يحلو لرؤى بنت أختي انها تسميها) هذي طفلة صغيرة، عمرها قريب العشرة سنين... نشوفها ديمة معاها، على غير ما نعرف (ديجا عمري ما سألت) شنوة العلاقة اللي تربطهم... لكني اعتقدت انها (بحكم المنطق) قد تكون اختها او بنت اختها باعتبار انو كل وين نجبد نحكي على رؤى، تحكيلي عي على توتو

قلتلها: أي، ياخي ش صار

قالتلي: الإيكرون ولّى مقلوب

بنبرة متاع واحد مفجوع، كيف اللي مشكلة كبيرة

قلتلها: آهــه

بنفس النبرة و نفس الحيرة

جاوبتني: و الله ما نعرف عليها على شنوة نزلت

عادة الحكاية هذي تتم عبر خصائص الكارت ڤرافيك... نرلتين و نزلة و إذا بيها الحكاية تكون مريڤلة و الامور الكلها في العنبر...

تي حتّى نتذكّر انو قبل في البيرو، ثمة طفل يخدم معانا (قوّاد عرفو، على هذاكة كنا عاملين فيه) كنّا مشيحينيلو الرّيق متاعو بالحكايات هذي و التفاسير اللي تخليه في احيان عديدة يقر انو هو اللي عمل الشي هذاكة غير يمكن ما جابش خبرة و برّه...

الحاصل، دقيقتين من زمان على ما جابت اللابتوب و خدمتو... بنبرة كلها ثقة بالنفس

نقوللها: بحذى المنڤالة... ثمة إيكون مستخضرة شوية، كليكي عليها بالفلسة اليمين

قعدت قريب الدرج تبربش قبل ما تأكدلي انو الإيكون اللي نحكي علاها ما ثماش منها.

قالتلي: انحس في وجهي ولّى في قفايا

اعتقدت انو ذلك كان مجرّد تعبير على شعورها  كيفاش خلاتني في الحشمة، لأنها الحكاية كبيرة ما انجمهاش

قلتلها: لا، نورمال... حكاية فارغة

ابتسمت و هي

تقوللي: تي لا... الإيكرون مقلوب!

نتذكّر ثمة طريقة اخرى نقلبوا بيها الإيكرون سفليه على عاليه... كومبينيزون متاع فلس معينين ع الكلافيي هاك الطفل اللي كان معانا في البيرو (اللي حكيت عليه قبولي) كيف كثرنالوا بقلبان الإيكرون جانا نهار يدز في صدرو، و بالواقفة ضربتين و ضربة يرجّع الأمور لنصابها...

قعدت نلهّي فيها بالحديث، حاجة و حويجة، نربح الوقت لعلّ نتذكر الحكاية كيفاش و زيد نجبدها بالحديث، ناخو كليمة و نعطي كليمة.

و بنبرة كلها رزانة و حكمة

قلتلها: أي، و الله فكرة

قالتلي: شنوة؟

قلتلها: منو هكة عود اقلبو الإيكرون

ضحكت، و دهشت بالضحك، لين خفت عليها لا يجيها كريز

قلتلها: كيف ما كانوا ناس بكري قبل يعملوا

تحاملت على نفسها أمام الموجة الهستيرية متاع الضحك اللي انتابتها

و قالتلي: كيفاش؟

قلتلها: على اول ما ولات عندنا تلفزة، النس كانوا يحلوا تلافزهم و يستناو البث كيفاش بش يكون.

قالتلي: أي

قلتلها: أي أكهو.. اهوكة كل نهار و قسمو، نهار يحطوا تلافزهم ع الجنب اليمين، بالمقلوب، ع اليسار... هوما و المذيعة كيفاش

قالتلي: آهــه

قلتلها: امالا شبيهم تلافز بكري يعملولهم الكادر متاعهم لوح، و صحيح.

قالتلي: معقول !

قلتلها: و الله كيف ما نحكيلك

قالتلي: تي في بالي... بنت الدومان راني!

وقتها برك وين انتبهت انها بالحق تعتبر بنت الدومان هذاكة كيف ما يقولوا... إلا انو تذكري للفلس ما خلانيش نعير المسألة أي اهتمام.
و بنبرة متاع تبهبير

قلتلها: تو بش نعملوا كيف ما هاك الـ ALT.CTRL.SUPPR

قالتلي: أي

قلتلها: اما المرة هذي CTRL.ALTGR.HAUT

قعدت لحظات تجرّب، اعتقدت انو الطريقة هذي موش بش تمشي زادة إلا انها شهقت فرد شهقة و هي

تقوللي: أووووه... سوبر... زايد معاك و الله

تبدلت لهجتي لنبرة متاع تواضع مصطنع و أنا

نقوللها: تي لا نورمال، ماهو ملزوم ما نلقاولها حل

قالتلي: عندو نهارين، درى علاش نزلت توتو ياخي اتقلب الإيكرون

يا والله توتو هذي، قريب لا تخليني في الحشمة... بنبرة فيها شوية حزم

قلتلها: نبه علاها ما عادش تبعول ياسر... ماهوش لعب الماتريال انفرماتيك هذا راهو

قالتلي: تي خليها... مازالت صغيرة

قلتلها: آش من صغيرة، هوما المفرخ متاع تو فيهم صغار و كبار، تي من صغرتهم جنون

حسيت انو ما عجبتهاش كلمة المفرخ، حتى انها كيف اللي عملت توخيرة صغيرة كيف نطقتها... إلا اني ما ترددتش، لكن بنبرة مرحو المرة هذي... و تفذليك طبعا

قلتلها: تي لو كان لزم عيّط عليها و اضرب... نورمال

بنبرة تدل ع الفجعة متاعها

قالتلي: نضرب... أمبوسيبل

و سكتت شوية قبل ما

تكمّل: تي انا بابا اللي هو بابا عمرو ما ضربني... بش انا نقوم نضرب بنتي!

ابتسمت... ما لقيت غير اني نبتسم ابتسامة الغلبة و انا نغزرلها، و نغزر لتوتو (اللي طلعت بنتها)، و بنبرة المغلوب على امرو

قلتلها: آه... صارة هي بنتك.

كوب... ڤلاس

2009-07-21T01:41:00.004+01:00

 طلب منّي أنو نهزّو لقهوة مذخمة يوسّع فيها بالو على خاطر عندنا نهارين قاعدين هوني و هو الحق متاع ربي أول مرة تقريبا بعد درى قداش من عام عرس (أولادو اندادي  محسوب) يخليهم وحدهم.

 جانا السيرفور رمالنا هاك الاوراق ع الطاولة و مشي على روحو... من غير ما يقراهم

قاللي: انا بش ناخو كوب ڤلاس  

كنت بش نقوللو انو الڤلاس هوني انواع، و ماذا بيه يقيس قبل ما يغيص، إلا انو الحماس متاعو خلاني نتردد... لحظة و عاود رجع هاك السيرفور، و من غير ما يسالوا ش يحب ياخو، و بنبرة كلها تبهبير

 قاللو: جيبلي كوب ڤلاس

جاوبو: الله يبارك

و ابتسم، و هو يكليكي على هاك الإيبود، بعد ما طلبت منو انا زادة يجيبلي كاس سيتروناد.

درج من زمان، و كان هاك السيرفور جايب الكوب ڤلاس، معاه كيف الشمعة تشعل... دوب ما شافو، شهق م الفجعة

قال: ازززح، ش ثمة هذا الكل!

منها ابتسم و هو يجبد في البورطابل و يكومبوزي في نومرو، قعد يستنى شوية منها

قال: ألووو... أيّا وينك  

غمزني و هو يسمع في الرد ع التليفون قبل ما

يجاوب: آه... استاحشتنيشي

قعد يتهز و يتنفض و هو يهڤهڤ بالضحك قبل ما

يقوللها: أنا تو قاعد في قهوة مذخمة، ثمة واحد يدندنلي بالعود في وذنيّ... و قدّامي كوب متاع ڤلاس فيه خمسة طيقان بش ناكلو وحدي

و علّق التليفون، من غير حتى ما ينتظر رد او إجابة، منها ابتسم و هو يغمز فيّ و بنبرة مرحة  

يقوللي: هذيكة الليلة تقعد تفدفد م النغرة  

و سمّى بسم الله و هو يڤحر لهاك الكوب ڤلاس بعينيه الزوز  

و يقول: الهم... ش تحبلو هذا بش الواحد يكملو!

شاوش... في إدارة الحجب

2009-07-06T22:24:00.002+01:00

جبدت الساك متاعها و قعدت تصلّح في ماكياجها ع المرايا اللي كانت معبية الأسونسير (اللي كان هابط)، من غير ما تعطي حتى أهمية لوجود الشاوش معاها و في نفس الوقت اللي عينها كانت مرشوقة ع الكونتور اللي يبينلها الطابق اللي هي فيه...
كيف قريب يوصلوا، يتكلّم الشاوش اللي كان باين انو هو المسؤول ع الأسونسير بصوت أجش يظهر كأنو يحاول يتفينس شوية، لكن زايد حيث يبان بصورة واضحة انو قاعد يتقوّى على بدنو

يقوللها: قريب نوصلوا مدام!

ابتسمت، هاك الإبتسامة الصفراء المعلالة متاع العادة متاعها و هي تڤحرلو على فرد جنب في نفس الوقت اللي قاعدة فيه تحط في الماكياج وسط الساك

قالتلو: أوكي، اوكي

ما جاوبهاش، بل حتى أنو ما غزرلهاش جملة واحدة، رغم انها م اللي اتكلّم ما هبطتش عينيها من عليه، كانت تحاول جاهدة انها تعرف إذا كان قاعد يغزرلها بالسرقة و إلا لا، إلا انو المرايات الكحل اللي كان لابسهم ما خلاوهاش تتمكن من إيجاد إجابة شافية و قاطعة لتساؤلاتها...

ابتسم، رغم الجدية اللي حاول انو يتظاهر بيها و اللي وصاوه انو ملزوم ما تكون سمة م السمات اللي تميزو وقت ما تم اختيارو للخطة الوظيفية هذيكة... إلا انو ما نجمش يمنع ابتسامة خفيفة من انها تبان على ملامحو قدام الغزرة متاعها... و قعد يتمتم بينو و بين روحو

قال: الهم، ماصح رقعتها... لا حبت تهبّط عينيها

اعتقدت انو إبتسامتو كانت نوع م المجاملة، فابتسمت هي الأخرى، و بصوت منخفض

قالتلو: ميرسي

قعد يغزرلها باهت في عجب ربي، حتى أنو خاف لوهلة لا تكون قاعدة تقرالو في أفكارو... و هذا شي ما كانش يستغربو قدّام الشي اللي حكاوهولوا على قدراتها الخارقة و إمكانياتها الغير طبيعية و موهبتها الفذة، الشي اللي خلاها تترشح انها تكون اول مرى تترأس إدارة ليها وزنها و قيمتها في الكواليس السياسية متاع البلاد.

ابتسم، ابتسامة متاع تتليف جرة و قعد يلعن في النهار اللي وافق أنو يقبل الوظيفة هذي...

رجعت بيه الذاكرة عام لتالي، كيف ما تو، دخول صيف... كان قاعد رايض على روحو، راكش في هاك الإدارة المحنونة، يضرب في النوم على حساب صوردي، ما همّتوش فيها إذا طابت و إلا اتحرقت، حد ماهو ملوّج عليه إذا كان يخدم و إلا لا، موجود و إلا فاصع... أصلا ما ثمة حد بش يبربش في جرتو على خاطرو ما ثمة حد قاعد يخدم جملة واحدة.

اقترحوا عليه انو يشد شاوش في هـ الإدارة هذي مقابل إمتيازات ما كانش يمكن لمديرو في الإدارة السابقة انو حتى يحلم بيهم في منامو... خرجات و بريمات و سوايع زايدة، و عند نهاية الخدمة و قبل ما تتم إحالتو على شرف المهنة، عندو الحق في حجّة (من غير لا قرعة لا غيرو)...

و أمام حساسية الخطة الوظيفية هذي، كان من الضروري عليه أنو يكون يعرف يقرى و يكتب... عرضوا عليه أيضا انو ينضم لأحد فصول محو الامية الموجودة في دواير مسقط رأسو... فرحتو كانت ما تتوصفش، حاجة و حويجة، منو يعدّيه كونجي خالص في البلاد مع المرى و الصغيرات، و زيد يتعلّم يقرى و يكتب ع الأقل يولّي ينجم يقرى الدبلجة متاع الأفلام الهنداوية اللي مغروم بالفرجة فيهم ع النايلسات.

و أمام التغيّر المفاجئ اللي قاعد يشوف فيه قدّام عينيه، سألهم علاش ما يجيبوش واحد قاري بشهادتو يخدم الخدمة هذي... خاصة انو الإمتيازات المعروضة عليه تخلّي حتى واحد عندو الدكتوراه يوافق من دون أي تردد و يقبل يخدم في بلاصتو... إلا انهم اكدولو أنو حساسية الخطة تقتضي واحد ما يفهملهاش برشا، على خاطرو بش يقعد يسأل ع العلّة و بنتها و بش يطيرلهم الكيف متاعهم، لذا تم ترشيحو للوظيفة، و خاصة انو بعد تأهيلو كما يجب، بش يولّي كيف العجينة بين يديهم، يشكلوها كيف ما يحبّوا... و زادوا نبهوا عليه (من تحت لتحت، بصفة اخوية) أنو م المستحسن يسمع الكلام و هو ساكت، من غير ما يسأل...

فرح، و شعر بنخوة و اعتزاز لا مثيل لهما، مش لأنو تم اختيارو هو تحديدا لمثل ذلك المنصب الرفيع... و إنما لانو الكلام اللي سمعو خلاه يتأكّد أنو المبدأ متاعو في الحياة كان صحيح، و ما كانش غالط كيف عرّس بطفلة أصغر منو باثناش عام، لأنو حب مرتو تكون غشيمة زكيمة و يربّيها هو على يديه كيف ما يحب..

و التحق بالمدرسة الصيفية لمحو الامية اللي نظّمت (إلى جانب دروس تعليم اللغة العربية لأبناء عمالنا بالخارج) خصيصا على خاطرو هو، و بحكم علاقتو الطيبة بوالد المعلّم اللي اختاروه بش يقرّيهم، فكان من الطبيعي أنو يتميز وسط المجموعة، و يتحصّل على شهادتو... كيف كيف زادة، علاقة الصحبة اللي كانت تربطو مع واحد م القوّادة متاع المعتمد، خلات التقرير متاع الدورة التاهيلية (اللي كان موضوعها سرّي لدرجة أنو يخاف يتذكرو حتى في خيالو) يكون مضروب بالسّفود... و في ظرف وجيز اجمع الجميع على انو كان قياسي، كان مستعد تمام الإستعداد لمباشرة المهمة متاعو... و كانت سرعة تاهلو تعبّر عن انو اختيار السادة المسؤولين ليه لهاته المهمة ما كانش اعتباطي، و إنما يرجع لنظرة ثاقبةو رؤية مستقبلية لا متناهية الأبعاد...

حتى يتذكّر انو بالصدفة، يلقى إحدى قنوات النايل سات تعدّي في مسلسل رأفت الهجان، فواضب على متابعتو و ذلك حتى يمنح نفسو فرصة للتعرف مسبقا على اجواء العمل اللي اعتقد أنها بش تكون مشابهة لما يجري في المسلسل، لعل تتاح لبه الفرصة بش يتخطي بعض العقبات اللي يمكنلها تعترض مسيرتو و مستقبلو المهني اللي و على ما كان يتهيّألو م الكلام اللي قاعد يسمع فيه، فإنو بش يكون متميز و حافل بالتألق و التميز.

رغم انو ما كان يفهم شي م الكلام الكبير اللي قاعد يتقاللو، و لا الأوراق اللي خلاّوه يصحح عليهم، بعد ما كان يتظاهر طبعا انو قاعد يقرى فيهم قراءة سريعة قبل ما يصحح، بش يظهر فايق و عارف... إلا انو كان متاكد في قرارة نفسو انو غير اسمو و اسامي مرتو صغارو و المعلم متاع محو الامية، و اللي كان حافظهم كيف التصويرة ما كان ينجّم يقرى حتى شي غير بصعوبة بالغة...

يتذكّر مليح اول نهار ليه في الخدمة، وقت ما اتحل باب الأسونسير لأول مرة، و قعد يحاول جاهدا أنو يقرى المكتوب ع البلاكة المعلقة في السقف في أول الكولوار الطويل، و بعد جهد جهيد، نجح انو يتهجّاها

إ.د.ا.ر.ة الـ.حـ.جـ.ب

يتذكّر مليح انو قلبو وقتها ولّى يدق، اعتقد أنو الحكاية قد يكون ليها علاقة بالدين الإسلامي و الحجاب و الاخوانجية، و اعتقد انو أول ما يقدّم في الكولوار بش يشوف غرف التعذيب على يمينو و شمالو كيف ما شافهم في فيلم الكرنك اللي تفرّج فيه درى قدّاش من مرة المدة الفايتة... إلا انو اتفاجأ كيف يلقى الكولوار مرشّق بالبيروات و الأورديناتورات، و انهم الموظفين الكلهم ماركة كوستيم و كرافات... و وقتها برك وين تذكّر أنهم قالولو انو خدمتو ليها علاقة بالانترنت، رغم اللي علاقتو بالانترنت ما تتعدّاش الدينار اللي كان يعطيه لولدو بش يمشي لهاك الحانوتة اللي في الحومة و يلعب الجي تي آ GTA و إلا البرو 6 PRO6، إلا انو اتنهّد كيف تاكد انو الحكاية ما عندهاش علاقة بالإخوانجية من قريب او من بعيد.

و يتذكّر مليح انو قعد ماشي بخطى كان حاول قدر المستطاع انها تبان ثابتة، لين وصل للباب المغلّف بالجلد الموجود في آخر الكولوار، و قبل ما يدق الباب، حاول أنو يتهجّى المكتوب بالاكحل على هاك البلاكة المذهبة، و بصعوبة بالغة لدرجة انو اضطر بش يستعمل صبعو و يتبّع الكلمات على خاطرها الكتيبة ما تشبهش للحروف اللي يعرفهم و اللي قرّاوه بيهم في القسم متاع محو الامية... و بشق الانفس نجّم يقرى المكتوب ع البلاكة

مـ.كـ.تـ.ب ا.لـ.مـ.د.يـ.ر ا.لـ.عـ.ـا.م
ا.لـ.سـ.يـ.ـد عـ.مـّـ.ــا.ر

ابتسم، كيف شلق اللي المدير اسمو عمّار. و دق الباب...

أصيب بحالة إحباط شديد، كيف عرف انو مهنتو بكل بساطة بش تكون تحضير القهاوي و التاي و ما إلى ذلك من مشروبات و حلويات للموظفين، إضافة إلى توليه نقل بعض الملفات بين المكاتب في أوقات الذروة كيف تشد بعضها بالخدمة و يكون ثمة نقص في الموظفين.

يتذكّر مليح صوت السيد المدير و هو يطبطبلو على ظهرو و بنبرة كلها جدية و حزم

يقوللو: ما انحبّش انبه عليك، هوني الخدمة و السكات

جاوبو: حاضر عرفي، كون متهنّي، ما عندك كان الرجال

و باشر مهمتو في كنف النشاط اللي كان يزداد يوما بعد يوم... رغم اللي كان م الاول ماهو فاهم شي، و كيف الأطرش في الزفة، إلا انو بالشوية بالشوية بدي يفهم في السيستام متاع الخدمة.

الحاجة الوحيدة اللي كان يسعى دايما للإلتزام بيها، هي انو ما يلزمش تربطو حتى علاقة بأي موظف مهما كانت درجتو... هو اصلا ما ثمّاش أسامي بش يتعامل معاهم، الموظفين الكلهم يتميزوا بكودات تكون مكتوبة ع البادج الإجباري انو الموظف يعلقو طيلة تواجدو بالإدارة... الوحيد اللي كان ليه إسم إلى جانب الكود متاعو هو المدير... عمّار 404

كان ماشي في بالو انو بالحق اسمو عمّار، إلا انو احد الموظفين أسرلو مرة في قالب بعض الحديث انو تسمية عمّار تطلق عادة ع اللي يتولّى المنصب هذاكة... و بش يفهمو بالفلاّقي اللي يفهم بيه، فهمو انها الحكاية كيف لقب السلطان... حتى انو عمّار هذا هو الثاني عشر في تاريخ إدارة الحجب.
و زادت اتطورت العلاقة متاعو ببعض الموظفين، حتى انو أصبح يكردي للبعض منهم و ساعات يدخللهم كسكروتات بالسرقة (على خاطرو ممنوع)... و كان يعتبر ناجح في خدمتو و مردودو الوظيفي كان محل رضا م السادة كبار المسؤولين في الإدارة، و كانت علاقاتو يوما بعد يوم تزيد تتطور مع الموظفين، و الكريدي ماشي و يزيد حتى انو يلقى روحو مجبر بش يستغل السبورة البيضاء المحطوطة ع الكوجينة بش يقيد عليها الكريدي متاعو، و كمّل شري ماركور اكحل غليظ بش يرشم بيه بالسّمح...

عدم التجاؤو لكنش او كراسة يقيّد عليها الكريدي كان لتاكدو انو نسي تماما شدّة الستيلو اللي تعلّمها في القسم متاع محو الأمية، ما حبّش يحط روحو في إحراج ذاتي لتاكدو انو اللي قراه الكل اتمحى من ذاكرتو، و ما قعد يربطو بالقراية كان هاك البلايك اللي كان حفظهم حفاظة بحكم التعود يوميا على رؤيتهم، و النوامر اللي كان مجبر انو يلعب بيهم لعب على خاطرهم كانوا يمثلوا الكودات اللي تميز اصحابها و الحسابات متاع الكريدي اللي كانت فلوس، معنتها اللعب لا.

و قعد هكاكة شهرين من زمان... يخدم من سكات كيف ما يحبّوه يخدم، و كان يشعر برضا تام كونو ملتزم بالضوابط اللي سطروهالو م الاول، لدرجة انو و حتى تلك اللحظة ما يعرفش شنوة الشي اللي قاعد يصير في الإدارة، و هذا الجيش م الموظفين اللي النهار و طولو يبققوا في عينيهم في هاك التلافز فاش قاعدين يعملوا بالضبط... لكنو بحكم تجولو بين جميع الأروقة و المكاتب متاع الغدارة، كان دائم التردد على بعض البيروات اللي كان أصحابها دايما يتفرجوا في حاجات متاع دين و تربية و إسلام، حتى انو كان ينظرلهم بنظرة إكبار و إعتزاز إعتقادا منو أنهم متمسكين بدينهم... على عكس بعض البيروات اللي كان يتحاشي الدخول ليهم او انو تربطو اي علاقة بالجماعة اللي يخدموا فيهم على خاطر في المرات القليلة اللي صادفت و دخللهم كان دائما ما يفاجأ بتصاور و فيديوات متاع قباحة و قلة تربية و تلقاهم الجماعة شايخين و عاملين جو. و كان م الطبيعة بالنسبة ليه انو ما يدورش بيهم و ما يكرديهمش على خاطرهم قلال تربية.

ثمة بعض البيروات اللي كان يدخللهم و يخرج منهم من غير ما يفهم حتى شي، حتى كلامهم و حديثهم كان غامض برشا و كلو رموز و زيد قليل وين يلقى تصاور محطوطة ع الاورديناتورات متاعهم بخلاف بعض الكاريكاتورات اللي ما كان يفهم منها حتى شي...

و رغم الشي هذاكة الكل، و دقة الملاحظة اللي كان يعتقد انو كان يتحلّى بيها، كان متاكد انو المتوظفين اللي في الادارة الكل كانت تجمعهم حاجة مشتركة في خدمتهم، على خاطرهم الكلهم و بدون استثناء، كانوا يعدّيوا اكثر من شطر الوقت و هوما يلعبوا بالكارطة ع الاورديناتورات متاعهم، حتى انو ساعات كان يستخايل روحو قاعد في قهوة غير أنو السكات المطبق و ريحة المعسل تفّاح المفقودة ما يخليوهش ينسجم مع الموقف...

يتذكّر مليح وقت اللي اتسربست في الخدمة، حتى انهم الجماعة الكل بطلوا الكارطة و اتلهاو في حاجات اخرى... كان يسمع في بعض الكلام اللي قاعدين يتداولوا فيه الموظفين خلسة، اعتقد م الاول أنو الاجواء متشنجة لدرجة انو الموظفين الكلهم طاحوا يبّوا في بعضهم، بحبث لاحظ انو كل زوز يجيو بش يحكيو ملزوم ما واحد فيهم يسب بو الآخر، ما فهمش علاش السبان كان دايما بالاب، موش بالام مثلا أو بالدين... لكنو كان شبه متاكد انو ثمة حاجة موش نورمال، زاد شجعو على تثبيت الشعور هذا الحركية الغير معتادة اللي ولات تميز جل الموظفين، و ما أسر ليه البعض منهم انو قد توقع بعض الإقالات و بعض الوجوه يمكن انها تختفي م الإداة، لذا مذابيه لو كان يخلص في الكريدي متاعو لا ترصّيلو من بعد ما يلقاش فلوسو.

و كان السبان اللي يسمع فيه يقترن عادة بكلمة فاس... اعتقد اول الامر انو الحكاية قد تكون ليها علاقة بالبوفاس، و ليه ليه ما ربط الأمر بتفشي مرض أنفلونزا الطيور اللي مازال وقتها حديث الشارع... و اعتقد انو التشنج الصاير قد يكون ناتج عن خوف بعض الموظفين من إصابتهم بالمرض هذاكة... إلا انو و كيف طولت الحكاية شوية اقتنع انو تفسيرو كان خاطئ، و حيث انو ما نجمش يلقى حتى تفسير لحكاية الفاس و البو هذي، فاكتفى أن ربطها في مخو بالمثل الشعبي القائل: جاء يعاون فيه على قبر بوه، هربلو بالفاس.

و زاد التشنج أيامات قبل عطلة نصف الثلاثي الأول متاع المكتب اللي كان يمنّي في روحو انو بش ياخو فيها كونجي و يروّح يعدّيه مع الغشاشر و المرى في البلاد، و يزيد يبدّل الجو شوية خاصة و انو م اللي شد الخدمة عمرو ما تحصّل على حتى نهار راحة... و زاد تاكّد أنو الحلم متاعو بالكونجي أصبح في حلم المستحيل كيف سمع قبل بأيامات أنو عرفهم، مدير الإدارة اتبدّل، و غدوة المدير الجديد بش يبدى... يمشي عمّار و يجي عمّار، كانت هذيكة الجملة اللي يسمع فيها من طرف جميع الموظفين اللي قعدوا، إضافة إلى كلمة حملة اللي كانت طاغية على معظم الاحاديث اللي يسمع فيها بين الموظفين دون ان يفهم الهدف متاع الحملةو لا شنوة هي... لكنو فهم انو كانت ثمة حملة تسببت في طرد عدد كبير م الموظفين و تبديلهم بإطارات جدد بش يتسلموا مهامهم ابتداء من غدوة مع المدير الجديد.

من غدوة... لاحظ انو ثمة حركية غريبة في الإدارة، فإضافة إلى بعض الوجوه الجديدة اللي كانت قد شرفت، و اللي كانت فيها بعض الاوجه النسائية... استغرب الامر خاصة و انو تعوّد انو الموظفين الكلهم كانوا رجال ريحة الانثى ما اتدبّش في وسطهم مما اتاح للعديد منهم انهم ياخذوا راحتهم في الكلام... و زادت دهشتو اكثر كيف سمع البعض يقول انو المدير الجديد... هو مرى زادة

قعد يحل ما يغلق، و هو يتمتم بينو و بين روحو

و يقول: يا والله احوال، مرى بش تنجّم القوم هاذم؟

بحيث ما انتبهش للموظفة الجديدة اللي كانت واقفة مع جنبو كيف اتلفتتلو على فرد جنب و بنظرة كلها ازدراء

قالتلو: شبيها المرى... ما تڤدها كان نساها راهو

قعد يمهمه ما لقاش ما يقول و ما يعمل غير انو يخليها و يمشي على روحو يلتحق بالموكب اللي كان اتجمّع قدّام الاسونسير ترحيبا بقدوم المديرة الجديدة.

اشرأبّت الأعناق، كيف سمعوا التنوقيزة متاع الاسونسير قبل ما يتحل الباب معلنا قدوم المديرة الجديدة... العباد الكل تحب تتعرف عليها و تشوفها.
و خرجت المديرة م الأسونسير، متأنقة كما يجب، ابتسامة خفيفة متاع مجاملة مرتسمة على شفايفها و هي تحيي في الموظفين اللي كانوا مرشقين ع الأجناب متاع الكولوار العريض و تتقدّم رويدا رويدا لين وصلت للباب المذخم المعلّف بالجلد و المخصص للمدير، و قعدت تقرى في هاك البلاكة المذهبة بصوت مرتفع

و تقول: مكتب المدير العام... السيد عمّار

و انهمر التصفيق من كل صوب و حدب، و تعالى للأسماع بعض عبارات الترحيب من نوع نوّرتنا، شرفتنا، مرحبا، هـ الخطى السعيد...

وقفت تغزر للوجوه ببعض من الجدية، برغم الإبتسامة اللي ما اتنحاتش من على وجهها إلا انو و على إثر الإلتفاتة متاعها الغير منتظرة، سرت موجة من الصمت المفاجئ... إلا انها و بنبرة مرحة تدل على ثقة مفرطة في النفس (ضاربتو في روحها كيف ما يحلالو انو يقول)، حبّت تقدّم الإضافة من اول دخلة للإدارة

قالتلهم: وووه... لا عاد، يلزم تبدلوها البلاكة

تلفتلها واحد م اللي يخدموا في الإدارة، مازالت ما تعرف حد وقتها، و بنفس النبرة المرحة اللي يقتضيها الموقف

قاللها: شنوة تحب نحطّوا مادام؟

ما جاوبتوش شخصيا، و إنما كانت تدوّر في وجهها بين الجموع المحتشدة قدّام الباب متاع البيرو

قالتلهم: توة عاد المنصب هذا، بان بالكاشف انو تنجّم تشدّوا المرى كيف الراجل

جاوبها واحد آخر قاعد من تالي، ما نجمش يشوف الملامح متاعو، إلا انو عرف من نبرة صوتو انو م الموظفين الجدد اللي جاو اليوم

قاللها: أي، شنوة تقترح سيادتك نحطّوا

بينما اتكلّم واحد آخر، من جماعة البيروات اللي ما كانش فاهم فاش قاعدين يعملوا بالضبط

و قال: أؤمر يا مدام... أحنا اللحم و انتي السكين

أشارت للبلاكة المذهبة بصبعها و هي

تقوللهم: بدلوها البلاكة، حطّو السيدة، و التاء المغلوقة حطوها بين قوسين... معنتها المنصب هذا راهو اتنجّم تشدّو المرى كيف الراجل

و انهالت عبارات الشكر و الثناء، ع الطلعة الهايلة اللي طلعت بيها، و التي و إن دلت على شيء فإنما تدل على المستقبل الباهر اللي ينتظر الإدارة تحت إشرافها، و كانت العبارات الكل تمدح في النظام اللي أرسى قواعد المساواة بين المراة و الرجل، إضافة إلى بعض ممن ترحموا ع الطاهر الحداد.

اتلفتلها راجل عزوز، شيوبة، كان باين من هيأتو انّو ولد إدارة صرف، و بنبرة كلها طحين

قاللها: حاضر مدام... في أقرب فرصة نسعاولك في بلاكة جديدة

و بصوت منخفض

كمّل: ماك تعرف الإجراءات

تلاشت الإبتسامة متاعها للحظات و هي تجاوب فيه بإيماءة سريعة براسها.

هذا الكل و هو (الشاوش) واقف على يمينها بدون حتى إبتسامة، كان يسعى جاهدا انو يسلّكها م النهار الأول و يظهّر وجه السوق... انتبهلها كيف تلفتللو من تحت لتحت على فرد جنب، و فهم انو كان معني بالغزرة هذيكة... ما فهمش ش يعمل، اعتقد لوهلة انها كانت دعوة منها أنو يتصرّف

ديركت، ضربت في مخو الفكرة، جب دهاك الماركور الاكحل الغليظ اللي مستانس يرشم بيه الكريدي من جيب السورية، و توجه للبلاكة المذهبة، قعد يغزرلها شوية و هو يحاول جاهدا يميّز الكلمات من بعضها، في الآخر ابتسم و هو يزيد في حرف تاء مربوطة قدام كلمة المدير بحيث أصبحت المديرة

شعر بسعادة مفرطة و هو يسمع في بعض الهمهمات اللي تدل على إعجاب شديد بالفكرة متاعو... حب يستغل الموقف، كان بينو و بين روحو

يقول: فرصة لا تعاد، يا مدام سعاد

زادها تاء مربوطة أخرى قدّام كلمة السيد بحيث أصبحت السيدة... و زاد ارتفع صدى الهمهمات بين وذنيه و أصبح يسمع في بعض عبارات الشكر مثل، فوالا، صحيت، برافو، آه وي...

زادت ثقتو في روحو، خاصة بعد ما عمل نصف غزرة على فرد جنب و شاف الإبتسامة المرتسمة على شفاه المديرة الجديدة... حب يزيد يستغل الموقف على اكمل وجه، و بنفس الجراةو الإقدام زاد حرف تاء مغلوقة قدّام كلمة عمّار بحيث أصبحت... عمّارة

و التفت للجموع متاع الموظفين اللي كانت محتشدة قدّام الباب متاع البيرو و عينيها مرشوقة في هام البلاكة المذهبة

مكتب المديرة العام
السيدة عمـّارة

و لكنو المرة هذي ما سمع شي من العبارات اللي كانت للحظة سابقة تملأ الفضاء... فقط بعض النظرات المبهمة ممن كانت ليهم جرأة أنهم يرفعوا وجوههم و يغزرولوا، إلى جانب بعض الضحكات المكتومة اللي كان واضح أنها خرجت غصبا عن أصحابها...

قعد يدور بعينيه بين الوجوه، أملا انو يلقى و لو تفسير للصمت اللي أطبق ع المكان فجأة، على غير فايدة، ما فهم انو عمل عملة مزمرة كان ما غمزو هاك الشيوبة اللي تكلّم قبولي و بملامح عبوسة فهم انو في موقف لا يحسد عليه.

و بدون ان تنبس ببنت شفة، دخلت السيدة المديرة و سكرت وراها الباب، بقوة تدل على غضب شديد... و تناهى إلى مسامعه صوت القهقهات اللي تعالت وراءها.

حب يفهم شنوة اللي صار، عرف انو الموقف ليه علاقة بالمكتوب ع البلاكة، إلا أنّو ما جابش خبرة للحكاية عاود قرب من جديد للبلاكة و حاول جاهدا انّو يعاود يقراها م الأول و جديد، قعد يتهجّى في الأحرف بصوت مرتفع في نفس الوقت اللي كان يتبّع في الكتيبة بصيعو

و يقول: م.ك.ت.ب ال.م.دي.ر.ة ال.عا.م

ابتسم في بلاهة و هو يخمم بينو و بين روحو، و بصوت غير مسموع

يتمتم: تطلعشي ما تعرفش تعوم زادة

و رجع يقري في البلاكة م الاول و جديد بصوت مرتفع

و يقول: ال.س.يّ.د.ة ع.م.ما.ر.ة

و دهش، و عاود فرك عينيه كانّو موش مصدّق الشي اللي قاعد يشوف فيه، و عاود قراها م الاول و جديد... عمـّـارة

أحس بخطورة الموقف، امام القهقهات اللي ملاأت الكولوار م الموظفين اللي مازالوا يتبعوا فيه... حس بدوران شديد كأنّو الكولوار قاعد يتشقلب بيه و رويدا رويدا سرت في بدنو فشلة رهيبة و بدات الدنيا تظلام في عينيه.

و سقط مغشيا عليه.

صانصينيك...

2009-07-03T21:04:00.001+01:00

دخل للحانوت، يلقاني في خليقتو... بنبرة كلها تربية و فيناس استأذن في الكلام

و قاللي: بالله وقتكم في الصّيف كيفاش؟

قلتلو: و الله خاطيني خويا، جاي نعمل في طلّة و برّه

بالصدفة متعدّي صانع ما بيناتنا، شدّو من يدّو بكل لطف

و قاللو: خويا بالله وقتكم في الصيف كيفاش؟

اتلفتلو الصانع و بصوت أجش يحمل في طياتو بعض الإحترام المصطنع

جاوبو: صانصينيك

اتطرشقت بالضحك و انا نغزرلو كيفاش عينيه قعدوا مرشوقين في الصانع باهت فيه، و بنبرة كلها دهشة

سألني: شنوة معناها هذي؟

قلتلو: معنتها سيــونس أونيك

قاللي: آاااه.. إي وي

منها اتلفّت للصانع و عاود

سألو: أي، وقتاش اتكملوا؟

جاوبو: التسعة

وخّر فرد توخيرة م الفجعة، قبل ما يعاود

يسألو: وووه، امالا وقتاش تبداو؟

قاللو: نبداو السبعة... م السبعة متاع الصباح للتسعة متاع الليل على فرد نفس

و بلع ريقو قبل ما يكمّل

يقوللو: هذاكة الصانصينيك متاعنا في الصيف

و مشي و خلاّه...

الصبر... و برّه

2009-06-30T17:20:00.001+01:00

شهقت (هي) فرد شهقة كيف دخلت و لقاتني قاعد وراء البيرو نبعول في الأورديناتور... و بنبرة تدل على دهشة مصطنعة (مشلقة ياسر) و فرحة (مصطنعة زادة) غير عادية

قالتلي: كيف سبتك، مازلنا نشوفوه هـ الوجيّه!

و بنبرة المغلوب على أمرو

قلتلها: هاني

كنت قطعت رجلي م المحل جرتها... ياسر تتلبّط بصراحة، بطريقة موش نورمال... مشلقة ياسر، بالرغم م اللي عرفها ياما نبّه عليها أنها تبدّل من أسلوبها في التعامل مع الحرفاء إلا انو زايد...

ما كنتش جاي، جرتها هي... غير انو عم علي مولى المحل كلّمني و أكدلي أنو عندو بعض الاوراق اللي حاجتو بيهم يتطبعوا اليوم قبل غدوة، وليت عطيتو الكلمة اني ملزوم ما نمشيلو في أقرب.

قعدت نبربش في هاك الأورديناتور، انّظم في النص ع الوورد قبل ما نطبعو، و نغزرلها من تحت لتحت كيفاش تغزرلي، و على درى قداش من مرة تهم بش تقول حاجة غير انها تبطّل في آخر لحظة... برّه بعد قريب الربع ساعة قامت تدور في المحل تقلب فيه تحتاني فوقاني ما خلاتش تركينة من غير ما ثبتت فيها، منها و بنبرة كلها حيرة

قالتلي: بالله شفتشي البورطابل متاعي؟

قلتلها: لا... و الله ما ريتو

و قعدت باقي تدور من تركينة لتركينة و هي تلوّج... و بنبرة اقرب ما تكون للبكاء

قالتلي: يا و الله عملة... يطلعشي ضاع

قلتلها: لا لا، وشن عندو بش يضيع

و قعدت باقي تلوّج، بنفس الحماس... إلا انو عينيها قعدوا مرشوقين فيّ بطريقة خلاتني نخمم انو يمكن تكون شاكة فيّ انا اللي هزيتو (شكون يعرف عليها كيفاش تخمم)، و ليت بنبرة متاع تتليف جرّة، نحاول اني نعبرلها على اهتمامي

قلتلها: شوف في السّاك متاعك!؟!

بزربة، تقولشي عليها الإجابة متاعها حاضرة

قالتلي: لا لا... ما عوايديش نحطّو في الساك

طريقتها في الرد، كيف نزيدهم الغزرة متاعها الموش نورمال حتى طرف... خلاوني نرجع بالذاكرة للدرى قداش من مرة اللي سبقلها و طلبت منّي فيهم أنّي نعطيها النومرو متاعي، على غير فايدة على خاطرني نعرفهل بش تمرجني.

غزرت للبورطابل متاعي المحطوط قدّامي ع الطّاولة، و فهمت المخطط متاعها... مدّيت يدّي بالسرقة (من تحت لتحت) بالشوية بالشوية ناوي بش نهز البورطابل متاعي نحطّو في جيبي... إلا أني قبل ما نوصللو ببضع صنتيمترات، اختفى من قدّامي

و بنبرة مرحة و ابتسامة خبيثة

قالتلي: ماو مايسالش انّوقز لروحي

جاوبتها، بنبرة المغلوب على أمرو

قلتلها: خوذ راحتك

كومبوزات النومرو... و نوقز البورطابل متاعها، و بدهشة مصطنعة

قالتلي: آه... هاو طلع في الساك بالحق

قعدت ندوّح في راسي مع ابتسامة خفيفة و عامل روحي مركّز مع الاورديناتور، ما اعطيتهاش حتى انتباه و هي ترجّعلي في البورطابل تحط فيه فوق الطاولة و تجبد في الساك متاعها و تطلّع منها البورطابل

قالتلي: و الله يعطيك الصحة، ياخي كيفاش عرفتو اللي هو في السّاك

قلتلها: تي اهوكة عرفت و اكهو

ابتسمتلي ابتسامة النصر و هي تبعول في الفلس متاع البورطابل متاعها، و من غير ما تغزرلي بحكم انها لاهية درى فاش تقيّد

تقوللي: أهوكة بش نقيدو عندي النومرو متاعك... ماهو مايسالش

قلتلها: نورمال(بصحتك)... خوذ راحتك

كمّلت طبعت الوريقتين متاع عم علي، و مشيت على روحي.. مازلت ما وصلتش للدار، و نوقز البورطابل، نلقاها هي، مغصورة و مفجوعة و ريقها شايح على خاطر الأورديناتور، أوّل ما انا خرجت م المحل، فسد... و على خاطرني نعرفها حتى الحلاّن ما تعرفش تحلّو الاورديناتور، نصحتها انها تسكرو جملة (تقص علة الضّو) و تستنى لين يجي عم علي تو يعرف كيفاش يحلّو.

مازلت كيف دخلت للدار، و عاودت نوقزتلي... بش تقوللي انو الاورديناتور طلع لاباس عليه و هي غالطة... و تحبني نطل عليها العشية بش نعلّمها كيفاش تكتب عليه السخطة هذاكة (تحكي ع الاورديناتور)

بفففف.... الصبر و برّه

الشيب... و العيب

2009-06-26T23:20:00.001+01:00

قعدت قدّام الأورديناتور المحطوط في بيت النوم، سعيا لمنع الصغار من استعمالو بش يتلهاو في قرايتهم و امتحاناتهم...، و بديت نثبّت في البارامتر متاع الكونكسيون...

شكّيت م الأول انو لربّما يكون يستعمل في بروكسي و ما في بالوش، رغم علمي المسبق انو أبعد من أنو يعرف شنوة معناها بروكسي و شنوة معناها مواقع محجوبة أصلا...

ليه قريب الجمعتين يحاول فيّ انّي نمشيلو للدار بش نشوفلوا حكاية الأنترنت اللي ما تحبش تبعث حتّى شي هذي.

ما فهمتش وين يمكن يكون المشكل، تي أصلا مانيش فاهم شنوة هو المشكل، هذا إذا كان ثمة مشكل من اصلو... و بنبرة كلها حيرة

قلتلو: ما نعرفش شنوة الحكاية بالضبط... الكونكسيون تخدم نورمال

قاللي: غريبة، اساعة كل شي صحيح و الشات ما يحبش يتعدّى

قلتلو: ش من تشات... ما عندك حتى لوجيسيال متاع تشات مصبوب

قاللي: تي هذاكة، ش يقولولوا... إيمايل و إلا درى ش من هم

قلتلو: بش تبعث إيمايل؟؟؟

بنبرة متاع تبلفيط.. يتظاهر انو مزروب، بش يغطّي على كونو ما فاهم م الشي شي

قاللي: أي أي

قلتلو: ياخي عندك إيمايل انتي؟؟

قاللي: تي ماهو يتصب مع الويندوز

فهمت الحكاية... ديركت نمشي نحل الأوتلوك اكسبريس... نلقاه معبّي بالإيمايلات اللي ما تبعثتش... ثمة إيمايلات ليهم قريب الشهرين و هوما يستناو في رحمة ربّي

طلع السّيد يكليكي ع الرابط متاع الإيمايل، تتحلّو فوناتر يكتب و يمشي على روحو

قلتلو: أيواه، هوّاهم الإيمايلات... ما تبعثوش، الكلهم هوني

تغيرت نبرتو في الحديث، لتتحول إلى جدّية مفبركة، و طبّس يتفرّج في الشاشة متاع الاورديناتور لين قريب يلصّق وجهو فيها، و بنبرة كلها اسف

قاللي: ما تبعثوش، ما تبعثوش

قلتلو: تي هاهم قاعدين يغزرولك... بالامارة حبيت مرة تبعث إيمايل لواحد اسمو حافظ، و واحدة اسمها أحلام و واحدة اسمها سنية و واحدة اخرى اسمها نادية و حنان و نورهان و حلا

و ببلادة و ركاكة، عملت روحي ماني فاهم شي

قلتلو: تي هاهم الكلهم بنات

سكتت شوية، محاولا أنّي نشد ضحكتي... فحاول انو يبدّل الهدرة، و بنررة متاع واحد يحب يتلّف الجرّة

قاللي: حتى شي، و الله ما نعرف عليهم شكونهم

قلتلو: صارة موش انتي حبيت تبعثلهم؟

قاللي: لا لا... ش مدخلني فيهم

كليكيت ع الإيمايل اللي كان م المفروض أنو يتبعث لنورهان، و ظهرت ع الشاشة مكتوبة:

مرحبا، انا محسن من تونس، انتي حلوة جدّا و أنا أريد ان اتعرف عليك

و الإيمايل المحطوط يرجع لأحد مواقع التعرف قصد الزواج الحلال المتوفرة هذه المدة.

قعدت نغزرلو، في نفس الوقت اللي دخلت مرتو جايبة طبق القهوة، و بنبرة مرحة

تقوللي: يعيش وليدي شوفلو شنية حكاية الأنترنت هذي اللي ولّى يعدّي الليل الكلو و هو يبقق في عينيه قدّامها

ابتسمت، و انا نغزرلو كيفاش وجهو قاعد يتبدّل من لون للون... و بنبرة كلها فدّة

قلتلها: حتى شي يا حاجة، حكاية فارغة، ما بيها حتى شي الانترنت.

ياخي اتنهّد... و شد الفنجان بيد ترعش و هو يتلفتلي على فرد جنب، بالسرقة، و يغزرلي كيفاش ندوّح في راسي... ماهو اللي موش مستانس بالبخور

ما تفكّرنيش... يا صاحبي

2009-06-24T03:00:00.000+01:00

ما تفكّرنيش يا صاحبي...

ما نعرفش شنوة الحاجة اللي ما حاجتوش بصاحبو بش يفكّرو بيه... كل اللي نعرفو انها الغناية هذي تحديدا، م النهار اللي بعثولوا فيه الميساج و قالولوا هاك نجحت في الباك، و هي مصدعتلي راسي.

و تقول عامل بلعاني، ما يحطها كان من نصف الليل لتالي... و كل ليلة و ش يظهرلو حد وين توصل بيه السهرية.

و هو حد معذور، معذور... خامس عام بش خذاها الباك المحنونة هذي... نصحتو، كيف ما نصحوه برشا غيري انو يخطاه م الهدرة متاع عقدة الباك هذي و يمشي يشوف حل في مستقبلو... إلا انو شد صحيح، و ما كفاوهوش الثلاثة سنين اللي عداهم في الليسي على غير فايدة، زادهم عامين في معهد خاص... و رغم الخمستاش و نصف معدّل في وسط العام، إلا انو نجح، بالإسعاف، و من ثاني عام (الثاني في الليبر، الخامس جملة)...

دزّيت باب الدّار برجلي و انا نهز في الستيكة متاع الڤازوز بيدي، نلقاه واقف في الوسطية، مبتسم

قلتلو: أيّا سيدي إن شاء الله مبروك عليك الباك... العاقبة في الإجازة و في ما اهم إن شاء الله

ابتسملي، ابتسامة النصر، و هو يحضن فيّ بالاحضان

و يقوللي: موش قلتلك ناخذها ناخذها الباك

قلتلو: يا ولدي زايد معاك... ما يجيبوها كان رجالها.

و جات أمو، بش تطير م الفرحة المسكينة

قالتلي: يكثّر خيرك، علاه اتّعب في روحك يا وليدي

قلتلها: لا لا، ش من تعب... ياخي عندنا منّو ميا احنا

اتلفتلو، و بنبرة كلها حماس يقتضيه الموقف

و قلتلو: اي، و تو آش ناوي بش تعمل

ظنيت انو بش يسألني ع المسلك متاع التكوين المهني، الشعب القصيرة اللي ما تتطلبش برشا قراية و تخديم مخ، و اللي يمكن أنو ينجّم روحو فيها، بش لف لف ما ياخو شهادتو و يشوف امورو... إلا انها أمّو ما خلاتلوش الفضوة بش يتكلّم

قالتلي: كان يحب أمو و يسمع كلامها، تو يمشي يقرى في الجامعة متاع القضاة... أنا ولدي حليلتو و زيد مذخم و كلمتو ما يردهاش... و عندو الوهرة متاع القضاة

ابتسمت، و انا نحاول جاهدا انّي ما نتطرشقش بالضحك قدّامها

قلتلو: و انتي... آش تحب تعمل يا ولدي؟

ما خلاتوش يتكلّم، و ما خلاتليش النفس بش نجاوبها على اقتراحها... او بلغة اوضح، الحلم متاعها، اللي كيف العبد ياخو بعين الإعتبار كونو الطفل هذا هو الوحيد ليها في العايلة، و هي و بوه اسمهم ع القلّة ما يعرفوش يكتبوه، و الحالة المادية اللي تخلي العامين متاع المعهد الخاص في حد ذاتهم يعتبروا تضحية كبيرة... يعتبر حلم مشروع، و واجب منتظر تأديتو من ولدهم

قالتلي: و بوه يحّوا يمشي يقرى في الجامعة متاع مديرين البنوك

قلتلها: كيفاش جات هذي؟

بنبرة تعبّر انها بش تحكي على حاجة خشينة

تقوللي: هذي جامعة في تونس، تخرّج المديرين متاع البنوك

قلتلها: آهــه!

و بنبرة احتقار

تقوللي: موش البنوك متاعنا اللي في البلاد هوني

قلتلها: امالا شنوة؟

قالتلي: لا لا... هاذم يشدّوا مديرين في البنوك الكبار متاع تونس العاصمة... و إلا متاع الخارج.

قلتلها: علاش لا... غير يقرى على روحو برك

و اتلفتلو، ننتظر منو في ابتسامة يظهّرلي بيها موقفو م المسألة و تمنيات الوالد و الوالدة مقارنة بالمستوى الدراسي، و خاصة إمكانياتو... إلا أنو كان متجاوب مع الكلام مع امو... و ما على بالوش

قلتلو: و انتي، ش تخمم بش تعمل؟

بنبرة كلها لا مبالاة

قاللي: انا حكاية البنوك هذي موش هاضمها... الكلها حسابات و تكسير روس... و برشا قراية، و انا بصراحة فدّيت م القراية، نحب على حاجة خفافي

قلتلو: امالا شنوة ناوي بش تعمل؟

قاللي: يمكن نمشي دروا (حقوق)... شكون يعرف تخطفشي و نولّي قاضي كيف ما تحب الوالدة

اتدخلت أمّو، و بنبرة كلها تشجيع

تقوللو: و حتى لو كان الله غالب ما قبلوكش بش تولّي قاضي، أهوكة تشد محامي

و تتلفتلي، بنبرة الدوام لله

تقوللي: حتى محامي... ش جرالو!

ما عادش عارف، إذا كنت نضحك، او نشد نلصقهم الزوز بشوية كفوف ثماشي ما يفيقوا على ارواحهم... إلا اني حاولت جاهدا نخفي الضحكة متاعي، نغمزو بطرف عيني

و نقوللو: أي و الله ، و زيد جماعة الحقوق ما ثمة كان الكونكورات، مصلّي ع النبي

يقوللي: يا خويا، انا قد ما عشت و ريت، ما ريش شكون مسلّكها في حياتهم قد جماعة الدروا... النهار الكل و هوما في قعداتهم و نصباتهم و شيخاتهم، تقول الفلوس يجيبوا فيها م الواد

و يكمّل: و زيد حتى كان اتخذت، نشد حتى عقاب عدل منفّذ... ش جرالو!
تقوللي: اللطف على وليدي... عدل منفّد، يعدّي عمرو في دعاء الشّر

و قعدنا نتناقشوا حول الآفاق العريضة اللي تنتظر المستقبل الواعد و المشرق اللي ينتظر في الطفل، عيني ما تضرّو... و على درى قدّاش من مرة، كنت بش نفكرو انو الباك متاعو، و للأسف هي باكالوريا تقنية... إلا انّي كنت كل ما نغزرلو في وجهو، نتذكّر الليالي اللي الستيريو يصدّعلي في وذني بهاك الغناية... ما تفكّرنيش يا صاحبي

أخـطــانــي.

جد عليه... كلامها

2009-06-19T03:08:00.010+01:00

قعدت ع الاورديناتور، و بديت نبربش... الحق متاع ربي نسيت ش عملت وقتها بالضبط، الحكاية قديمة برشا... لكن اللي نتفكرو مليح هو انو بعد قرابة الربع ساعة، م اللي قعدت طلعتلي نافذة متاع المسنجر

يقول: ياخي منين قاعدة تكونكتي؟

طلعت الطفلة ناسية المسنجر متاعها محلول...

هو مسكين، م اللي كمّل قرايتو و تحصّل ع الديبلوم متاعو و هو يدادي يحب على طفلة ياخذها، اللي يقوللو علاه راك ما زلت صغير، يجاوبو انو مستقبلو سايي، اصبح مسطّر و واضح المعالم... توة يخدم سيرفير في قهوة (بالعربي قهواجي)

عاد الطفل، في انتظار انو يرسم المعالم متاع المستقبل متاعو، باعتبارو من اصحاب الشهايد (ديبلوم صنايع)، دبرولو خدمة في بوبلينات... شطر الحريفات (و خاصة المزيانات منهن) عرض عليهم الزواج، على غير فايدة، مسكين ظل اللي تقوللو صباح الخير، يقوللها تاخذيني!

بما فيهم الطفلة (موضوع التدوينة) اللي نسات المسنجر متاعها محلول، ما نعرفش إذا كان من سوء حظها، او سوء حظو، او سوء حظي انا... الحاصل انها نسات المسنجر متاعها محلول، وهو دوب ما دخل يلقاها كونكتي، بعث السلام... جاوبتو على لسانها

قلتلو: م البوبلينات اللي في مقابلة الفاك

رد: و علاه ما جيتش كونكتيت من هوني

جاوبتو: ولّيت نحشم منك، ما تحبش تاخو حق الكونكسيون

كنا نعرفوه انو يمشي ياسر بالمعاملات متاع الصحبة في الخدمة، أنا بيدي واحد م الناس كنت م اللي ما يخلّصوش زادة (علاوة ع الصحبة، كنت كاري من عند صاحب البوبلينات، عامللنا وفقة، الدار و الكونكسيون)

رد: ياخي انتي اللي يجي... ما تعرفش معزتك عندي

قلتلو: نعرف و الله نعرف... يعطيك دودة محلاك

رد: صارة في بالك؟

قلتلو: أبـّــي... عند شك!

رد: امالا شبيك ديمة مطفيتني و عمرك ما عطيتني ريق حلو؟

قلتلو: عاد انتي تظهر وليدها... قلت ملزوم ما تعرف

و كمّلت: و اللي في القلب، يقعد في القلب

و زدتو: غريبة، ياخي مش ظاهر عليّ؟

يرد: لا... و الله ما فقتها بيك اللي انتي في بالك

نجاوبو: ناري على روحي و برّه

و قعدنا هكاكة قريب النصف ساعة... يبعث السمايلي متاع قلب حب ، نرجعلو السمايلي متاع البوسة...

يقول: نحبّك

نقوللو: نموت عليك

يقول: محلاك

نقوللو: ينعنبو زينك

في الآخر (كيف حسّيت بروحي كثّرتلها)، استاذنت، بكل حسرة و أسى، في الإنصراف... لكنّي وعدتو في المقابل أنو في القريب العاجل بش يوصللو ايمايل فيه تصويرة... بش يطيّر بيها الوحش.

قمت بش نخلّص، نلقاه في حالة م السعادة المفرطة... لدرجة أنو علاوة ع الخلاص اللي رفض بش ياخذو، عرض عليّ انو يجيبلي كاس عصير متاع "المبروك"... و بالطبيعة رفض يقول ع السبب، لأنو سر شخصي بينو و بينـ(ـي)ـها...

بعد نهارين... قاعدين في امان الله الاحباب الكل في البوبلينات، ملمومين نلعبوا في طرح كونتر سترايك ضد بعضنا... و دخلت هاك الطفلة (صاحبة الكونت مسنجر)... سي وخينا سيب الخلاء في الخلاء، و خلّى الاورديناتور متاعو و مشي قعد مع جنبها... طفّينا الضو و قعدنا مركزين في الحرب (الإفتراضية) متاعنا درج من زمان، ما نسمعوا كان في اللطخة متاع الكف... اتلفّتنا الكل فرد ضربة لمصدر الصوت، نغزرولو مدلدل راسو م الحشمة و حالل فمّو م الدّهشة و قاعد يغزرلها كيفاش واقفة قدّام الباب متاع المحل

قالتلو: الهم... ما قعدت كان انتي بش ناخذك... عقاب عمري

و سكتت شوية، قعدت تڤحرلو و تهز فيه و تسبط بعينيها قبل ما تزيد، و بنبرة كلها ازدراء و احتقار يدل على خيبة امل كبيرة

تقوللو: مش منّك... م اللي تعمللك قدر و تحسبك عبد كيف العباد

و تحل الباب متاع البوبلينات، و تهم بش تخرج، لكنها في آخر لحظة تتلفتلو، و بنبرة كلها شماتة ممزوجة بغضب شديد

تقوللو: اللطف، كيف البق، عبّيتو البلاد

و خرجت م البوبلينات، بعد ما سكرت الباب وراها بالقوي...

هذاكة الكل صار و هو واقف على نفس الوضعية، ما حلش فمو حتى بربع كلمة... و زاد قعد ع الحالة هذيكة قريب الدقيقة بعد ما خرجت، و عينيه مرشوقين في الباب، و بنبرة تدل على حيرة شديدة، تلفتلنا

و قاللنا: غريبة فيها... و الله نهارين لتالي كانت راكحة تقول مصلّي ع النبي عليها

تلفتلو واحد فينا، و بنبرة مبهمة، متاع واحد ماهو فاهم شي (على خاطر وقتها فينا شكون في بالو بحكاية المسنجر)، و على نيتو

سألو: امالا شبيها دارت عليك فرد دورة؟

جاوبو: و الله ماني عارف عليها!

قلتلو: منك انتي ياخويا اللي تعطي جنبك لأنثى... ياخي ما قالولكش إنّ كيدهنّ لعظيم

بنفس النبرة المبهمة اللي تدل على حيرة شديدة، جاوبني و هو يدوّح في راسو من غير ما يتلفتلي... كأنو قاعد يعمل في حساباتو و يضرب في احماسو بأسداسو

و قاللي: أي و الله... انا المهبول، اللي يجد عليّ كلام طفلة

http://ayoude.free.fr/tkharbich/madhonnesh.mp3