قاعد على روحي، و ينوقز البورطابل... ميساج!

البورطابل عندو مدة أمورو ما تعجبش، كنت اتحدّثت في التدوينة اللي قبل هذي [مقوى... سعدي] ع الميساجات اللي يُقال أنها قاعدة تجي هكاكة وحدها وحدها (و لو انّو ماذا بيّ لو ما تكونش الحكاية بالرسمي هكاكة، هههههه)... زيد ولات فيه فازة ما نحلّو بش نشوف ميساج أو نطلب كونتاكت م الليستة إلا ما الروح متاعي تطلع و انا نحاول اني ننزل ع الفلس بطريقة فيها برشا حكمة بش تجي قد قد، و تخطف.


أيا مازلت نحاول أنّي نشوف من عند شكون الميساج المرة هذي، و إذا بيه يعاود ينوقز مرة اخرى (ميساج آخر)... هو البورطابل داخل بعضو و كمّل زاد دخّلني بعضي انا معاه.

أيا بعد بضع محاولات نجمت نشوف الميساجات نلقاهم ميساجات "بلاش عنوان" جاييني من عند بنت عايلة...


قبل كانوا يجيوني ميساجات "موش كاملين" و ما يتحلّوش جملة واحدة... و من نومرو آخر مش من عند بنت عايلة.

المرة هذي، الميساجات يتحلّو أما فارغين، و العين جات على بنت عايلة... صحيح قعدت متحيّر في الحكاية شنوة يمكن تكون، لكن هذا ما منعنيش من انّي في عز البهتة و الدهشة، لقيت وقت بش نبتسم في قرارة نفسي و أنا

نقول: مقوى سعدي

أيا مازلت هكاكة نكشّخ بيني و بين روحي، و يعاود ينوقز البورطابل مرة اخرى... ميساج!

أي عاد شبيه، حتى هوما ناس بكري

قالوها: كيف تجي تجي مع بعضها...

و زيادة الخير خيرين، و ثلاثة...

حليت نشوف في الميساج الاخراني، ياخي نلقاه كيف كيف من عند بنت عايلة، أما المرة هذي اتحل


و كيف جيت نقرى فيه نلقاها

تقوللي: حتى انا نحب بوست على ميساجاتي


هههههه... ملا عفسة بصراحة، يقوى عليك ربّي يا فاتن

حاضر باش، غالي و الطلب رخيص... و رغم كل شي نقعد شادد صحيح انّي نعاود

نقول: مقوى سعدي


كتبهاالبرباش على الساعة 22:03

تعليق غير معرف ...

ma7léh 7obb la blogosphère

7 مارس 2010 11:16 م

تعليق البرباش ...

ما عندك ما ربت؟

7 مارس 2010 11:38 م