كونتور: مشكل في صفحة تعريف البلوڤر (Profile blogger) الخاصة بالمدونين...


الكونتورات الكل حابسة المدة هذي...

بالنسبة للصفحة متاعي (هنا)... العداد متبلوكي عند الـ 12000 زائر بالضبط

ملاحظة أخرى: للإخوة المدونين (القدم) اللي يستعملوا خدمة GooglePages لحفظ ملفاتهم، السرفيس هذا بش يندثر في جوان 2009...

بش يتم نقل الملفات لخدمة اخرى Sites Google بداية من شهر ماي.

مزيد من الملاحظات تلقاوها في الصفحة هذي


ملاّ مرجة... انا واحد م الناس عندي قرابة الـ 120 فيشيي يلزمني انقّلهم (بين فيديوات و تصاور و غيرو)، هذا غير المدونات اللي كان سبقلي و ساهمت في تزيينها (ليستة طويلة) يلزمني نعاود نريڤل الروابط متاع التصاور الكل قبل ما يتم نقل الملفات و تدخل بعضها.

خممت أنو نشري nom de domaine خاص بيّ، حاجة و حويجة، شوية بروفيسيوناليزم و زيد قلت شكون يعرف، يقعدوشي كل مدة يطلعولنا بطلعة متاع تبديل البلايص كيف ما هذي، اهوكة في محلي و هكاكة نربح شوية وقت... المشكل هو يلزمني نبعث ماندة بالدوفيز...

ههههههه... يلزمني ترخيص من عند البنك المركزي، سألت الجماعة اللي تريڤل في دوسيات لكندا... الحكاية هذي تستغرق بين الـ 12 و الـ 15 يوم، و في الآخر شوف يوافقوا شوف لا...



الدوفيز... ما يخرج من عندنا كان بالريق الشايح.

حكاية ع الطاير: توة قريب العام و نصف، الوالدة هبطت لفرنسا (وقتها عندي اختي بش تولد)... قاعدين نحكيو ع السكايب، سألتني إذا عنديشي فكرة علاش التليفون متاعها ما عادش يحب يطلبنا (الجماعة اللي قعدوا في تونس) رغم اللي احنا قاعدين نطلبوا فيها نورمال...

الوالدة لا تقرى لا تكتب، حاولت نفهمها حكاية الـ 00.216 و الـ roaming لكن زايد... ش علينا

قعدنا نحكيو و حديث يجبد حديث...

الوالدة: التليفون متاعي ماعادش فيه فلوس راهو

البرباش: تي آش تعمل بيهم الفلوس بالله، تو كيف تروّح تلقانا نستنّاو فيك في المطار

الوالدة: (بنبرة كلها حيرة) أي وليدي، ماهو نحب نطلبكم دوب ما نهبط م الطيّارة

البرباش: باهي، تو نبعثلك دينار

في عوض نبعثلها دينار، بعثتلها دينارين... و سمعت حس الميساج متاع MobiRacid كيف وصللها... في نفس الوقت اللي تدخل فيه اختي للبيت

الوالدة: (بنبرة كلها بهتة) يا سبحان الله، هاو وصلوا!

اختي: هاو جاك ميساج؟

الوالدة: خوك برباش، هاو بعثلي دينار...

اختي: (بعد ما تقرى الميساج)عجب، ياخي بعثلك دينار و إلا دينارين!؟


البرباش: (نصيح في الميكرو) دينار، دينار... ماهو خاطرها من تونس لفرنسا، تزيد!

تفهم اختي الحكاية... و تضحك ع الفازة.

الوالدة: (تتساءل) كيفاش ياخي، موش نعرف يقولوا فلوس فرنسا خير من فلوسنا!؟

أختي: أي، اما هاذم خاطرهم تبعثوا بالبورطابل، يولّيو أغلى...

الوالدة: و تو كيف نمشي بيهم لتونس، يقعدوا باقي ألفين؟

اختي: أي نعم...

الوالدة: (تخدّم في مخها) ها برباش... عاد كيف هي الحكاية هكة، أبعث عشرة و إلا عشرين الف فرد مرة...




كتبهاالبرباش على الساعة 06:00 | عدد التعليقات:4


ساعات ندخل بعضي و ماعادش نعرف أنا شكون... محمّد و إلا برباش... برباش و إلا محمّد.

حتى شكون يكون قبل الآخر... ولات مسألة تحيّر!


نمشي لحمدي في الخدمة متاعو... نلقاه بالزهر يكلّم في مرتو...

حمدي صاحبي، هو بو ياسمين... البنوتة بطلة تدوينة [بابي... سيتر].

قاللها: طلّع شكون بحذايا تو؟

قالتلو: ...

قاللها: محمّد

قالتلو: ...

قاللها: ياخي عندنا مياة محمد... هو كعبة،

سكت شوية قبل ما يكمّل

يقوللها: تي محمّد... متاعنا!

قالتلو: ...

قاللها: أيواه... البربــــــــــــــــــــــــــاش

قالتلو: ...

قاللها: باهي باهي

ضحك و هو يمدلي في السماعة متاع التليفون و يطلب منّي أنّي نحكي معاها

قلتلها: اهلا، وينك... شنوة، سايي ما عادش تعرفني شكون، وليت مڤمرتني بالبرباش جملة واحدة

قالتلي: يا محمّد، يا محمّد... ايجى ايجى بحذانا و اكتب على ياسمين

ضحكت...

قالتلي: كان ترى... تو ولاّت تضحك و عاملين جو عليها

قلتلها: ربي يفضلهالكم... تو في اقرب فرصة إن شاء الله نجي

هيا ع الفازة... هذي تصويرتها و هي تبكي






كتبهاالبرباش على الساعة 02:04 | عدد التعليقات:2







كتبهاالبرباش على الساعة 03:29 | عدد التعليقات:3


مخيبها الموت ازززح...

العبد يكون رايض... حياتو ماشية على نسق روتيني معيّن....

تتقلب، أمورو الكلها تتفرعس... بين عشيّة و ضحاها....

مهما تكون علاقتو بالمتوفي... بش يتّخلق عندو نوع م الفراغ...

هو المتوفّي في حد ذاتو حاجة من اثنين... يا إما ارتاح، يا إما كلاها في عظامو...

لكن بما انو الحي أبقى م الميت... العباد اللي عرفتو و عاشرتو، كيف كيف زادة حاجة من اثنين...

ثمة اللي يعزّو و يحبّو... و يكون بالنسبة ليه جزء من حياتو... فراق... ألم... وفراغ...

ثمة اللي تلقاه عامل معاه كيف الفار و القطّوس... بش يولّي ماهوش لاقي ما يعمل... ڤينية... ملل... و فراغ...

و في الحالتين... دايما نقولوا: الله يرحمو، كان ناس طيبة...




كتبهاالبرباش على الساعة 00:51 | عدد التعليقات:4


حدث هام و بارز الاكيد انو العديد لاحظوه اليوم ع التن-بلوڤ


ألف صوت و صوت... ربي يكون في العون سي مهدي

هذي هي اللي يقولولها يفدي القديم و الجديد...

تحيين: بعد الكومنتار متاع حسين، تبيّن انو المسألة لا تعدو مجرّد خطأ على إثر محاولة تغيير في قاعدة البيانات... لكنّي بش نخلي التدوينة مع تحيّة للمدوّن مهدي اللجمي صاحب مدوّنة: الريشة، من اجل عالم أفضل...


كتبهاالبرباش على الساعة 00:04 | عدد التعليقات:8





تجاوبا مع العزيزة ولاّدة... هاني بش نلعب... وحدي... قدّام داري... هههههههههه

خمس هدايا أتمنّى الحصول عليها
  1. كيف كنت صغير... كانت المهبة متاع العيد، يعتبر قبولها عيب كبير، ما نعرفش علاش، هكاكة سنسونا... لو كان ترجع بيّ الأيام، نتمنّى يعرضوا عليّ المهبة و نقبلها
  2. كعبة الكلوروفيل اللي كنت دايما ما ناخذها من عند إيناس الله يرحمها.
  3. بوسة بالأحضان من عند طفلة صغيرة... يعجبوني الصغار و خاصة منهم البنات
  4. أي حاجة مهما تكون، لكن المهم انو اللي هداهالي يكون خمّم فيّ و هو يشريلي او يصنعلي فيها
  5. ...

خمس إجراءات أتّخذها لو كنتُ رئيس دولة


  1. نصحح لروحي في الرخصة متاع البناء متاعي... و دار جارتي متاع الكلاب، نهدها و نردها حديقة عمومية بش داري تولّي تطل على حديقة عمومية) و نكمّل نهد دار جاري اللي مقابلني (شماتة و برّه.. بش داري تولّي تطل مباشرة ع الكيّاس الرئيسي)... و نبني الدويرة متاعي
  2. نقتل جارتي متاع الكلاب... إعدام بدون محاكمة
  3. ندك ولد جارتي متاع الكلاب في الحبس... مؤبّد... و نزيد نوصّي عليه يحطّوه في زنزانة خاصة بالمثليين و نوصّيهم كل مين يستفعل فيه عشرة مرات فرد نهار، ينقصولو شهر م العقوبة متاعو... ههههههههه
  4. نحط الكاتب العام متاع البلدية متاعنا في الحبس... هوما يكفي انهم يبربشوا وراه تو يلقاو هموم زرقاء، يعديولوا شطر عمرو محاكمة و البقية حبس...
  5. نستقيل... بعد ما نضمن انو بش يتم السهر على تنفيذ ما ورد بالأربع نقاط اللي فاتوا بكل عناية... و نركش في دويرتي (اللي على يمينها حديقة و مقابلها كيّاس رئيسي، بالطبع ما نستقيل كان ما نقبض ما يمكنني بش نبني الدار متاعي كيف ما نحب و نشتهي، الله أعلم الرئيس قدّاش يقبض، و السلعة و اليد العاملة قداش تتكلّف)

السياسة ليها امّاليها... و انا الدّولاب هذا و الحق يقال خاطيني جملة و تفصيلا...

خمسة أشخاص أتمنّى أن أضربهم

  1. جارتي متاع الكلاب
  2. ولد جارتي... كريتلو مرة جماعة اعطاوه طريحة... لكن ماذا بيّ ياخوها من يديّ
  3. الكاتب العام متاع البلدية متاعنا.
  4. ثمة معلّم كلالي قلبي بالمسبط مرة، على قصيدة متاع شعر كتبتها فيه... رغم احترامي و تقديري لسنو لكن لو كان انحي العوامل هذي الكل و نحطها على جنب، قلبي مازال لتو مغلغل عليه و لو كان نلقى فيه الضربة ما نسلّمش
  5. اللي عدّالي الكوندويت المرتين الأولين... المرة الثانية طيّحني ظلم

خمسة أشخاص أتمنّى العيش معهم


  1. طفلة تكون بنت حلال و تهنّي
  2. ولد... يكون قد المسؤولية
  3. بنيّة... تعز والديها و تحطهم بين عيناها
  4. أمّي... نحطها بين عينيّ في كبرتها
  5. بابا... نتولهى بيه و يرتاح، يزّيه ما خدم علينا

خمسة أشياء أفعلها لو علمت أنّي سأموت غدا


  1. نقتل جارتي و نرتّح الناس من شرها... انا ميّت ميّت
  2. نتعلّم كيفاش نصلّي و نعمل ركعتين
  3. نطلب السماح من بابا و أمي و نجيب رؤى بنت اختي تعدّي بحذايا الليلة
  4. نقعد الليلة نخمم كان ثمة شكون يسالني حويجة نشوف كيفاش نوصّي يرجعوهالو
  5. نعطي كلمات السر متاعي الكل لواحد م الأصحاب... و نوصّيه يواصل المسيرة من بعدي

ما استدعاني حد... و ما نستدعى حد.


كتبهاالبرباش على الساعة 23:31 | عدد التعليقات:5


وفات مرحلة... بش تبدى واحدة اخرى

ضمان لاستقرار... فبحث عن استقرار أضمن



و حاجة... تجيب حاجة


كتبهاالبرباش على الساعة 02:37 | لا يوجد أي تعليق




ما نعرفش علاش، ما نلقى روحي كان في الكبّي و القينية... كلمتي الباهية حتى كيف نقولها يلزمها تكون في إطار تعيس و إلا ما تكونش صادقة و خارجة من عروش قلبي، ما انجم نعبر إلا و أنا حزين، حتى و انا في عز فرحتي، ديمه نلوج ع الكادر اللي نلقى فيه روحي... لأنها حياتي الكل عبارة عن محطات متكررة كيف نجي نثبت، نلقى انو حتى النجاح اللي فيها، ما هو إلا تسبقة لفشل أكبر...



كتبهاالبرباش على الساعة 21:52 | لا يوجد أي تعليق


أوّل نهار في السنة الدراسية... معلمة قاعدة تثبّت في القصاصات اللي اعطاتهم للتلامذة اللي عندها (ثالثة ابتدائي) بش يعمروا فيها البيانات الشخصية متاعهم.

المعلمة: رمزي... ش تخدم امك؟

رمزي: طبيبة في المنزل... نيستي

المعلمة: كيفاش، حالة عيادة تابعة الدّار!

رمزي: لا، نيستي


المعلمة: امالا كيفاش؟

رمزي: ماما طبيبة، وقاعدة في الدّار، نيستي


شي، المعلمة ما نجمتش تستوعب الحكاية... و زيد التنسنيس متاع النساء... ديركت بعثت الوصاية متاع التلميذ لش أمو تجاها للمدرسة، تحب تحكي معاها.

جات أم رمزي (امراة في منتصف الثلاثينات) للمدرسة، قعدت المعلمة تهز و تنفض معاها شوية حول بعض الفازات المفبركة (اللي جعلت منها سبب للإستدعاء) منها دخلت ديركت في صلب الموضوع

المعلمة: بالله، رمزي كيف سألتو ع الخدمة متاعك... قاللي اللي انتي طبيبة، في الدار

أم رمزي: أي، عندو الحق

المعلمة: ما فهمتش كيفاش... طبيبة طبيبة

أم رمزي: أي أي... طبية، علاش؟

المعلمة: و شبيك قاعدة في الدار؟

أم رمزي: (بكل أريحيّة) ما لقيتش خدمة

المعلمة: علاه... ياخي البطالة خلطتلكم؟

أم رمزي: (تدوّح في راسها، مع ابتسامة خفيفة) أوووه، من بكري

المرى الدنيا ظلامت في عينيها... ألف حاجة و حاجة دارت في مخها... بنتها اللي تقرى سنة رابعة ميدسين... التبهبير متاعها قدام جيرانها و صاحباتها بالدكتورة... و الدكتورة مشات، الدكتورة جات، الدكتورة قالت
المعلمة: و علاش ما كمّلتش؟

أم رمزي: الله غالب، ما نجتش في الـ résidanat

المعلمة: و علاش ما خدموكش؟

أم رمزي: ما عنديش كتافات

المعلمة: حتى انتوما بالكتافات ولّيتو!

المعلمة: (تسكت شوية) و علاش ما حليتش وحدك؟

أم رمزي: (تعصر في وجهها) العايلة و الصغار...

العلمة: و ش قاعدة تعمل تو؟

أم رمزي: أهوكة... لاهية بداري و صغاري

المعلمة: و الميديسين... و قرايتك... و شهادتك؟؟؟

أم رمزي: (تبتسم إبتسامة من لا حول له ولا قوة) أهوكة نداوي في العيلة، و الحومة... و الاحباب و الأصحاب... بش ما ننساش


و كمل الحديث ما بيناتهم... و دخلت المعلمة للقسم، قعدت ع الكرسي متاعها، اتكات بمرفقها ع الطاولة... و اتنهدت.


كتبهاالبرباش على الساعة 02:13 | عدد التعليقات:6



أريد أن أحتج على شيء ما ...
أن أصطدم بشيء ما ..
أن أنتحر من أجل شيء ما ..
فلم يعد عندي ما أفعله ..
سوى أن ألعب الورق مع ضجري
هو يخسر .. وأنا أخسر ..
هو يضجر .. وأنا أضجر
هو يخبرني أنك كنت حبيبته ..
وأنا أخبره أنك كنت حبيبتي
هو يعطيني مسدسه لأنتحر ..

وأنا أطلعه على مكاتيبك القديمه ..
فيقتل نفسه ..
ويقتلني ..

الحب في الإقامة الجبرية (10) ... نزار قباني




كتبهاالبرباش على الساعة 01:44 | عدد التعليقات:1



الحكاية ماهيش حكاية زطلة بالذات، أو حرابش او أي نوع من انواع المخدرات...

سؤال محيّرني عندو مدة... أمام تكاثر وجود الوجوه المقلبة و الخلايق و ترددهم على حومتنا بشكل مستمر خاصة الأيامات هذي.


معروف انو ترددهم على ولد حومتي (ولد جارتي متاع الكلاب) إنما هو بقصد اقتناء ما يسد رمقهم من حبوب مخدرة و سواڤر زطلة (السواڤر في الويكاند فقط و إلا في الصيف وين تكثر الإحتفالات بمناسبة او بدونها).


المشهد المتكرر هو عملية تبادل بين زوز يدين: يد تلقى فيها زوز صفايح بيض يلمعوا (ألفين فرنك) و اليد الأخرى تلقى فيها حربوشة بيضاء...

عملية منظمة لدرجة انو عمرو ما واحد يغلط مثلا مرة و ينسى ما يجيبش معاه الصرف و يقعد يستنى لين ابراهيم يمشي يجيب الصرف من عند أمو و يرجّعلو الباقي متاعو... و إلا أي حاجة من هذا القبيل.


لكن الغريب في الامر انو مؤخرا... الألفين ماعادش يقضيو.

و غالبا ما صارت عملية التبادل ما تتمش (على خير) كيف ما جرات العادة.

خممت إني نمشي نبلّغ السلط المختصة... لكن الحق متاع ربي خفت على روحي... لا نمشيلهم طالب، نولّي مطلوب


لأنو السلط المختصة اكيد في بالها بيه، على خاطرو حاكمنا ما يفوتو شي... و ما عملولو حتى شي.

و زيد بالك يحبّوا بربطوهالو على قاعدة... ياخي كيف انا نمشي نقوّد بيه... نفسدلهم الملعوب متاعهم اللي قاعدين يخططولوا تو ليهم سنين.

هذا بصرف النظر عن انو يكون اللي يكون... اللي يوصّل حاجة للحاكم... يطلع و إلا يهبط... يقعد في نظر المجتمع، ماهو إلا قوّاد متاع حاكم.

هذا بصرف النظر عن انو من الشايع في بلاد الفرح الدائم... الخلايق و الباربوات تلقى عندهم الأكتاف... مصاحبين البوليسية...


إبتسم... إنها تونس


كتبهاالبرباش على الساعة 14:39 | عدد التعليقات:13


كنا أربعة... قاعدين نتفرجوا في الأحد الرياضي و مركزين معاه


ما نفيقوا كان بالقناة كيف تبدلت وحدها وحدها... شوية و عاودت رجعت

التفتلنا مسكين و علامات الخجل باينة على وجهو

قاللنا: المرى عندها مسلسل... متبعتّو

قلنا مايسالش... الله لا يجعلنا جرة... و استمر الحال هكاكة سهرية كاملة


رابعنا كان خو المرى... واحد عصبانة، ما عندوش وين يدور الريح... مسكين استحمل استحمل منها في الآخر نطق

قاللها: بالله سامحني، مسلسليك وقتاش يبدى؟

قالتلو: العشرة و نصف

قاللها: مازالوا نصف ساعة بش يبدى

قالتلو: شكون يعرف عليهم


قاللها: أي، فاش قام عندك ساعة مارجتلنا الكبدة متاعنا لا هنيتنا بيه هـ الأحد الرياضي

هزت خشمها على فرد جنب، كيف اللي موش عاجبها الحديث متاع خوها

قالتلو: محسوب، اهوكة قاعدين يحكيو... ياخي ريتهم يتجاروا ورى هاك المحنونة الكورة

قاللها: باهي، ع الأقل كيف تدوّر بش تشوف مسلسليك بداشي، ازرب رجعلنا الكورة متاعنا، موش لازم تعمل دورة ع الشانات الكل ش فيهم و آش ما فيهمش

قالتلو: ووه... ماهو انكمّل نشوف المسلسلات الأخرين ش عاملين

ما لقاش ما يجاوبها، يتلفتلي و بنبرة كلها غل

يقوللي: برباش... رد بالك تعرّس، راك تتهرّس.


كتبهاالبرباش على الساعة 04:05 | عدد التعليقات:2



لأوّل مرة نحس بتأنيب الضمير... جرة صراحتي.


و لو أنو صراحتي ما جاتش من عدم... من لا شيء

ظنيت انو علاقتنا... يمكن تسمحلي انو نتدخل

مانيش نادم... فقط ما ظنيتش انو قد توصل الأمور لهذا

و حتى لو كان تعاودت الحكاية... هذاكة موقفي.

لكن منو هكة... سأعمل بشعار: آش لز حمة يغنّي
مجرد حكمة: الصديق هو الذي يبكّيك بش الناس ما تضحكش عليك


كتبهاالبرباش على الساعة 03:14 | عدد التعليقات:9



قاعد نخدم على روحي... ينوقز البورطابل... جاني ميساج

عادة، نتجنب اني نستعمل البورطابل وقت الخدمة... لأسباب تفرضها طبيعة الخدمة بيدها، و احتراما لنفسي و لغيري... و لطبيعة العمل (ما تشلقوش عاد، فضحتوني في التدوينة اللي قبلها هههههه)

ما يجيش دقيقتين، و ينوقز البورطابل... ثمة شكون يطلب فيّ


نثبّت في النومرو (92.328.920) ما نعرفوش... لكن شكون يعرف

البرباش: ألو عسلامة

يجاوبني صوت متاع كهل، بين الأربعين و الخمسين من عمرو

السيّد: (بنبرة مرحة) اهلا... عسلامة

البرباش: وي... اتفضّل

السيّد: بالله سامحني، غلطت و بعثتلك ثلاثة آلاف فرنك ع النومرو متاعك

نفهم طبيعة الميساج اللي جاني

البرباش: أي، يظهرلي بالحق

السيّد: بالله لو كان تعمل مزيّة... ترجّعهملي على خاطرني حاجتي بيهم

البرباش: باهي، داكوردو... الله يبارك

البرباش: اتو ربيّع ساعة من زمان و نرجعهملك... ما ثمة حتى مشكلة

السيّد: بارك الله فيك.. أما بالله ما تبطاش

البرباش: باهي باهي، خاطر تو مشدود في الخدمة... تو من بعد

رجعت نخدم على روحي... اول فرصة نتفاضى فيها، قلت ما فيهاش

خير البرّ عاجله... نجبد هاك البورطابل... نقرى الميساج


نقيّد النومرو في عقاب كاغط نلقاه قدامي... و نحاول اني نرجع للسيد فلوسو



التيليكوم تتأسفلي... رصيدكم غير كافي... للحظة شكيت اني في عوض نبعثلو ثلاثة آلاف، قيدت ثلاثين ألف (الخير كثير و لا خوف علينا من الفقر، اللي يقوللك الفلوس ندز فيهم بالركبة هههه)... نعاود الحكاية... كيف كيف، رصيدكم غير كافي


نمشي نثبّت في الكونت متاعي... نلقى روحي مكسبني 1270 فرنك... كيفاش جات هذي... غريبة!


نرجع للميساج اللي وصلني نلقاه السيد باعثلي ميساج من عندو بنفس الصيغة اللي تبعث بيها التيليكوم عبر خدمة موبي رصيد MobiRacid


حمدت ربي ع الفقر و الـ 1270 اللي عندي في الكونت انهم ما كانوش اكثر من 3000 فرنك و إلا راهو اتعدّات عليّ و اترزيت فيهم...

عاد لقيتش اكثر من اني نكافأ السيد هذا بنشر رقمو على صفحات البلوغسفير (و الفايس بوك، بما انهم التدونات متاعي قاعدين يهبطوا اوتوماتيكيا على الفايس بوك) على ما ياتي.

92.328.920


و ردّوا بالكم تحصلوا...


كتبهاالبرباش على الساعة 03:34 | عدد التعليقات:19