أوّل نهار في السنة الدراسية... معلمة قاعدة تثبّت في القصاصات اللي اعطاتهم للتلامذة اللي عندها (ثالثة ابتدائي) بش يعمروا فيها البيانات الشخصية متاعهم.

المعلمة: رمزي... ش تخدم امك؟

رمزي: طبيبة في المنزل... نيستي

المعلمة: كيفاش، حالة عيادة تابعة الدّار!

رمزي: لا، نيستي


المعلمة: امالا كيفاش؟

رمزي: ماما طبيبة، وقاعدة في الدّار، نيستي


شي، المعلمة ما نجمتش تستوعب الحكاية... و زيد التنسنيس متاع النساء... ديركت بعثت الوصاية متاع التلميذ لش أمو تجاها للمدرسة، تحب تحكي معاها.

جات أم رمزي (امراة في منتصف الثلاثينات) للمدرسة، قعدت المعلمة تهز و تنفض معاها شوية حول بعض الفازات المفبركة (اللي جعلت منها سبب للإستدعاء) منها دخلت ديركت في صلب الموضوع

المعلمة: بالله، رمزي كيف سألتو ع الخدمة متاعك... قاللي اللي انتي طبيبة، في الدار

أم رمزي: أي، عندو الحق

المعلمة: ما فهمتش كيفاش... طبيبة طبيبة

أم رمزي: أي أي... طبية، علاش؟

المعلمة: و شبيك قاعدة في الدار؟

أم رمزي: (بكل أريحيّة) ما لقيتش خدمة

المعلمة: علاه... ياخي البطالة خلطتلكم؟

أم رمزي: (تدوّح في راسها، مع ابتسامة خفيفة) أوووه، من بكري

المرى الدنيا ظلامت في عينيها... ألف حاجة و حاجة دارت في مخها... بنتها اللي تقرى سنة رابعة ميدسين... التبهبير متاعها قدام جيرانها و صاحباتها بالدكتورة... و الدكتورة مشات، الدكتورة جات، الدكتورة قالت
المعلمة: و علاش ما كمّلتش؟

أم رمزي: الله غالب، ما نجتش في الـ résidanat

المعلمة: و علاش ما خدموكش؟

أم رمزي: ما عنديش كتافات

المعلمة: حتى انتوما بالكتافات ولّيتو!

المعلمة: (تسكت شوية) و علاش ما حليتش وحدك؟

أم رمزي: (تعصر في وجهها) العايلة و الصغار...

العلمة: و ش قاعدة تعمل تو؟

أم رمزي: أهوكة... لاهية بداري و صغاري

المعلمة: و الميديسين... و قرايتك... و شهادتك؟؟؟

أم رمزي: (تبتسم إبتسامة من لا حول له ولا قوة) أهوكة نداوي في العيلة، و الحومة... و الاحباب و الأصحاب... بش ما ننساش


و كمل الحديث ما بيناتهم... و دخلت المعلمة للقسم، قعدت ع الكرسي متاعها، اتكات بمرفقها ع الطاولة... و اتنهدت.


كتبهاالبرباش على الساعة 02:13

تعليق kmr ...

ياما اطباء، و مهندسين، و اساتذة جامعيين، و معماريين، و محامين، و محاسبين خبراء...

ما ثماش ديپلوم ما وصلتلوش البطالة... كونش يمكن ديپلوم "سي فلان"...

:(

9 أفريل، 2009 9:22 ص

تعليق femme au foyer ...

moi aussi je suis "ostetha fiddar" mais je ne regrette jamais mes études w 7atta el 9a3da feddar ma 3andek ma t9oul fiha surtout ki debda oumourek el meliya ça va
ama ki nesma3 ennou meme les medecins wselhom ettach 9albi youja3ni

9 أفريل، 2009 4:43 م

تعليق femme au foyer ...

http://sahbiyahiaoui.blogspot.com/2009/04/soutien-au-doyen-de-la-faculte-de.html
el mochkel elli les médecins compétents ma yal9awech blasa wel jmey3a elli nej7in bedezzen w bel a9damiya houma elli yal9aw blayeshom testanna fihom

9 أفريل، 2009 4:47 م

تعليق حمـدي ...

يا خرباش، يعطيك الصحة كيف مازلت تتفكر حكاية ولد أختي رامي (موش رمزي)،
حبيت نقلّك إلي أختي هاذي تعمل توّة في 2 ماجستير متخصص وحدة في تونس وأخرى في سوسة ثماش ما ينوب ربي ...

10 أفريل، 2009 6:20 م

تعليق غير معرف ...

http://brisetunisienne.blogspot.com/2009/04/decision-presientielle-pour-enfreinre.html

23 أفريل، 2009 5:30 م

تعليق غير معرف ...

هههههههههههههههههههههههههههههههههههه مافهمت اشي

12 ديسمبر، 2012 2:11 م