ما نعرفش علاش حسيت برهبة، و انقباض رهيب في صدري (أهوكة بالفصحى) و انا انّحي في النّوارة (هاك النوع اللي يشبه للبوق) م الجنينة متاع عم الهادي الله يرحمو...


رغم انو ليه قريب الشهر و نصف م اللي توفّى، إلا أنّي حسيت بنظرتو، أو بش تكون العبارة أوضح، ڤحرتو ليّا و انا نقسم في العرف بش نهز النوّارة... و من غير ما نجيب خبرة، نلقى روحي نتلفّت ع اليمين و ع اليسار نلوّج عليه...

و ابتسمت... رغم الموقف الخاشع و الفاتحة اللي نظن أنّي قد نكون قريتها بزربة في مخّي، ترحما عليه... تبسّمت و انا نتذكر في حكاية:

راس العام متاع 2008، العشية... قاعدين نصلّحوا في الفور اللي بش يطيبوا فيه الدجاجة، وقت ما هز اسامة ولد أختي السكينة و قعد يلعب بيها، كيف فاق بيه بوه الهادي عيّط عليه

قاللو: فاش تعمل... نحّي من يديك السكّينة

قعد أسامة (عمرو خمسة سنين، كان سبقلي و اتحدّثت عليه في تدوينة [العام... اللي كلي على راسو]) يغزر لجدّو على فرد جنب، من غير ما ظهرت على وجهو اي ملامح يمكن انها تعبّر عن موقفو... كيف اللي كان يعرف أنو بوه الهادي مازال عندو ما يقول، و فعلا، تحرّك عم الهادي، من غير ما يغادر بقعتو، فقط حركة يتظاهر بيها انو بش يمشي في الإتجاه متاع حفيدو اسامة، و نبرة كلها غش ما نجمش يمحي بيه الإبتسامة متاعو

قاللو: هيا نحّيتهاشي تو... لا نجيك!

نغزر لأسامة كيف ابتسم، و تلفّت لبوه الهادي

و قاللو: تي شبيك اتعيّط عليّ، ما عملت شي

قبل ما تزيد تكبر الإبتسامة متاعو، و تتغير نبرتو في الحديث و تولي تشبه التهديد الممزوج بالمزاح، و يلوّح بالسكّينة قدّام وجهو

و يقوللو: ريتها السكّينة هذي؟!؟


يحاول بوه الهادي أنو يداري ابتسامتو... يعرف انو حفيدو اللي طالع يشبّهلو في جميع تصرفاتو بش ينبزو بحاجة، قارين بعضهم قراية كيف ما يقولوا...

و يجاوبوا: نحّيتهاشي تو

يرد عليه أسامة اللي مازال يلوّح بالسكّينة قدّام وجهو المرتسمة عليه ابتسامة كبيرة، و بنفس النّبرة

يرد عليه: لو كان مازلت تعيّط عليّ... اللي ما النوّار متاعك الكل نحشهولك بيها

و دهش عم الهادي بالضحك... ما كانش ينتظر من حفيدو اسامة انو يهددو بالنوّار متاعو... رغم اللي م الواضح أنو الجنينة م كانتش تمثّللو مجرد تسليه لتمضية الوقت، و حتى الجايزة متاع اجمل حديقة اللي سبقلو و خذاها ما جاتش من عدم... إلا انو الطريقة اللي حدثو بيها أسامة خلاتو يدهش بالضحك.

الله يرحمو... خيالو مازال يدور في الجنينة، تهيّألي لوهلة انّي بش نسمع صوتو و هو يعاتب فيّ و يفهّمني بطريقة المعلّم القديم كيفاش انو النوارة في الأرض هي ملك الناس الكل، و في يدّي هي ملكي وحدي... و كنت بش نتظاهر أنّي مقتنع بكلامو، و نطبّس راسي و نثني رقبتي كدليل على تأسفي، رغم اللي نعرفوه الكلنا انو النوارة كانت تقعد في بلاصتها لين تذبل و تموت... و كنت نقترح عليه بكل أسف انو ياخو النوارة من عندي، إلا انو و بنفس الأسف زادة كان بش يخلّيني نهزها على امل انّي ما نعاودش صنعتي...

عاودت ترحّمت عليه مرة أخرى و أنا نكمّل نقصم فيما تبقّى م العرف متاع النوارة، و شدّيتها في يدّي... اتلفتت لليمين، منها لليسار، و قمت راسي شويّة لفوق... و عاودت اتبسّمت

الوقت هذا من كل عام... يعرف عندنا بالكياسات البيض... ماهوش ثلج او نظافة اكثر م اللازم... لكنها اوراق الكرارس و الكتب اللي التلامذة يعبروا عبر تقطيعهم و ترييشهم بابتهاجهم بانتهاء الدروس و إعلان العطلة الصيفية..

كنت كيفهم لا محالة (ما ننكرش هذا) لكن الفترة هذي من كل سنة، أو الفترة اللي تسبق أي عطلة، تذكّرني بحادثة بسيطة قعدتلي م الذكريات متاع القراية و المكتب...

قبل عطلة الشتاء متاع السنة الأولى ابتدائي... الفترة اللي كنا نستناو فيها وقتاش المعلّم بش يعطينا الكرنيات...

الدّار، دخلوني للمكتب... الوالدة لا تعرف تقرى و لا تكتب، و الوالد لاهي في خدمتو و مشاكلها... يلزمهم يستناو الكرني الأول و يشوفوا الرتبة (اللي هي تعتبر اهم م المعدّل) بش يعرفوا إذا كان ولدهم طلع صالح و إلا طالح... جاب فيه ربي و إلا طلع عقوبة الله... من قبل بجمعتين و الوالدة كل وين نفل في راس النهج، نلقاها تستنّى فيّا، اوّل ما تشوفني

تقوللي: آه... آش عملت فيها

نولّي نجاوبها.

نقوللها: مازالوا ما عطاوناش الكرنيّات!


و قعدت هكاكة، لين ولاتلي سناسة، حتى كيف ما نلقاهاش موجودة... اول ما ندخل للدار نصيح وحدي وحدي

نقول: ما عطاوناش الكرنيات

اهوكة بش حتى حد ما يسألني...

الحكاية هذي، قعدت إلى يومنا هذا... كيف تلقاني نستنى في قضية او زيارة في امور تخص الخدمة خاصّة... أول ما ندخل للدار، ديركت

نقوللهم: ما عطاوناش الكرنيات

اهوكة يفهموا اللي هو ما صار م الشي شي.

و خذيت الكرني، و المعلّم قعد يشكر فيّ و يعاود (بما اني الاول متاع القسم طبعا) و صفقوا عليّ...

كانت هذيكة آخر حصة تسبق عطلة الشتاء، خذينا الكرنيات، و قعد المعلّم يوصّي فينا كيفاش يلزم الاولياء متاعنا يصححوا في الكرنيات، و أننا يلزمنا نرجعوهم ديركت بعد العطلة، منها خرج م القسم و قعد يحكي مع معلمين أخرين عاملين حلقة في الكولوار... و خلانا احنا، هيجوج و ميجوج

نغزر للتلامذة، اللي هذا يشد في يدو صبع طباشير، و يكتب ع الطاولة متاعو، ع القاعة، ع البلوزة متاعو

جرات العادة، اننا نقولوا حل الصرة تلقى خيط... معناها الحكاية راهي فارغة.

هذاكة عند ناس بكري... اللي الصرة حتى من قبل ما تحلها تعرف ش فيها، تعرف حتى الخيط اللي بش تلقاه في وسطها، لشنوة يصلح.

و ساعات... تحل الصرة ما تلقى فيها شي... الله غالب، المعطى معطة ربّي.

تتولّي تتحوذق، و تفتّق الصرّة و تحلس منها خيط.

حتى كيف يسألوك على حكاية الخيط... اتدز فيها مهف

و تقوللهم: (و انتي اتدوّح في راسك، كيف اللي جايب الصيد من وذنو) الخيط هذا... من هاك الصرة.


هذا عند ناس بكري... اللي حكاياتهم الفارغة، نعبّوا منها شكاير مليانة في وقتنا تو

من المبكيات المضحكات، و في خضم الستراس الكروي... و بعد تهنئة الترجي باللقب امام الرباعية قدّام النجم... بعض التساؤلات اللي يمكن أنها تعبّر عن حالة الوعي و اللاوعي اللي قاعدين نعيشوها.


س: أعطيني أسامي المدربين متاع الأربعة فرق الكبار في تونس؟
س: أعطيني أسامي متاع أربعة وزراء توانسة حاليا؟

س: شنوة اسم اللاعب اللي رفع رمز بطولة تونس لكرة القدم ؟
س: شنوة اسم الوزير اللي سلّم رمز البطولة للاعب هذاكة؟

س: اللاعب هذاكة، أصلو منين؟
س: الوزير هذاكة، أصلو منين؟

س: الترجي، قدّاش عندها من بطولة جملة؟
س: تونس، قدّاش عندنا من وزير جملة؟

س: شنوة حكاية الشعار متاع الترجي (وليدها)... و وقتاش تم اعتمادو؟
س: شنوة التسمية الصحيحة المعتمدة حاليا للوزارة اللاهية بالكورة؟
ملاحظة: موش بش نسأل، وقتاش تم إعتماد التسمية هذي؟


ملاّ حالة مكربة...

نفس القهوة، و نفس التركينة... آخر مرة كنا تقابلنا فيها ليها مدّة


قالتلي: برباش... ماكش ناوي بش تتلحلح شوية

قلتلها: كيفاش؟

قالتلي: (و هي تدوّح في راسها) صاره هذا الكل... مش فايق، و ما في بالكش؟

قلتلها: و الله ماني فاهمك فاش تحكي!

قالتلي: تي برّه اتكلّم... احكيلها

قعدت ساكت... ما لقيت ما نقول... للحظة ندمت انّي جبدتلها ع الهدرة

قالتلي: يعطيك القوّة ع الـ indifférence اللي عندك

ما عرفتش شنوة هي هـ الـ indifférence اللي تحكي علاها، لذا خيّرت اني نقعد نمهمه في الفارغ... أما حسّيتها كيف النّبزة