دخلت للدار، م الباب نشم في ريحة التاي الاخضر المنعنع... ندخل لبيتي، نحل الاورديناتور، تخلط عليّ الوالدة تجري

تقوللي: برباش، تحب نجيبلك كاس تاي

نجاوبها: هات!

تهم بش تمشي للكوجينة، نصف خطوة و اتعاود ترجعلي

تقوللي: كيفاش اتحبّو؟

كنت معوّدها اني نجاوبها على حسب نوع التاي اللي نعرف أنّو موجود... لكني المرة هذي، و كنوع م المشاكسة... و بكل هدوء و لا مبالاة

قلتلها: هات تاي احمر كان عندك

تتفاجا م الإجابة الغير منتظرة

و تقوللي: و انا منين بش نجيبهولك التاي الاحمر؟

نجاوبها: ماك سالتني، هاني قلتلك آش نحب!

تقعد تغزرلي شوية، و بنبرة كلها حنان

تقوللي: ما تحبّش كويس تاي اخضر، منعنع، يعمل ستة و ستين كيف

نعمل روحي كيف اللي ما عينتيش

نقوللها: و الله ماذا بيّ على كويس تاي احمر كان ثمة!

و نكمّل: كان ما ثمّاش مايسالش!

تڤحرلي على فرد جنب، دليل على انو حديثي موش عاجبها، تتبدّل النبرة متاعها إلى ما يشبه التهديد

تقوللي: آ، بابا برّه عرّس على روحك، و اتشرّط على بنت الناس كيف ما تحب!

و همّت بش تمشي...

نجاوبها: (ندوّح في راسي) كيف نعرّس... اللي ما نحكم علاها اتطّيبلي التاي الأحمر، و الاخضر... و ما نشربو كان شطار زادة

تمشي و تخلّيني... لكنّي سمعتها و هي اتمتم وحدها بنبرة كلها سخرية

و تقول: ههههه، مسهلو يا وليدي... برّه لو كان لقيت صحة عليك... اتشرّط و مد ساقيك، قد ما تقدر...


و جابتلي كاس التاي الاخضر، شربتو و انا فمي ساكت.

اما قعدت نتسائل بيني و بين روحي...

ياخي للدرجة هذي صعيب انو الواحد يلقى بنت الحلال اللي اتطيبلو التاي على زوز انواع؟؟


BONUS: بما انها الحياة طبعا مشاركة بين زوز، فقط للعلم بالشي، نعرف نطيّب القهوة راهو... خاصة كيف تكون من نوع النسكافي...


كتبهاالبرباش على الساعة 01:02

تعليق غير معرف ...

allah ykoun fi 3ounha bent le7lel elli bech tekhedhha!! hhhhhhhhhhhhhhhhh

29 مارس 2009 3:14 ص

تعليق Khalil ...

Mouch s3ib ya barbéch !
ama 9olli t7abbou bel bondo9 wala bellouz kés ettéy ? :))

29 مارس 2009 11:44 ص

تعليق البرباش ...

@ الغير معرّف: و علاه مسكينة... إلا عاد إذا بش تكون ما تعرفش اتطيّب التاي... وقتها مساكين أحنا الزوز... هههههههه

29 مارس 2009 12:05 م

تعليق البرباش ...

@ خليل: نعرف اللي موش صعيب... و زيد مانيش متشرّط برشا، حتى لو كان التاي يكون بالكاكاوية، قابلو...

P-:

29 مارس 2009 12:06 م

تعليق cactussa ...

jetik fi thé hak 3aris lo2ta zay may2oulou fi masr !!

29 مارس 2009 3:44 م

تعليق Bej ...

ija n5allass 3la 5ouya kes tey achtar fel kahwa, w 3la kestik zéda!!! hihihihi

29 مارس 2009 4:52 م

تعليق ولد بيرسا ...

يا ولدي ماو يلزم تتأقلم مع الموجود و تعرف تجيبو التّاي الأحمر
ياخي صحّة راس هي؟
أما هاني نقلّك: كان ما تلقاش التاي الأحمر، أشرب الأخضر.. ماهوش دوني زادا
أما حاجة برك.... ردّ بالك تطيح للتاي بالكاكاويّة.... على خاطر، وقتها، حتّى التاي الأخضر يا ذنوبي كان مازلت تخلط عليه :-))))))) ههههه

29 مارس 2009 5:43 م

تعليق البرباش ...

@ كاكتوسا: P-:

30 مارس 2009 1:52 ص

تعليق البرباش ...

@ باج: علاش لا... ههههههه

30 مارس 2009 1:53 ص

تعليق البرباش ...

@ ولد بيرسا: الواحد يرضى بالموجود لين ربّي يجود...

هههههههه... تقول انتي اكبس تلقى ما ترخف من بعد

P-:

30 مارس 2009 2:00 ص